San Mateo 14 - Biblia Guarani Tumpa Iñee

Juan imano regua

¹ Jókuae ara reta rupi mburuvicha guasu Herodes oendu Jesús jërakua yae vae regua.

² Jare jei jembiokuai reta pe: “Jae ko Juan oporombobautisase vae. Oikove ye omanogüe reta ipɨte güi. Jáeramo ko güɨnoi kuae mbaepuere reta.”

³ Echa Herodes yepe oipɨɨuka Juan, oipokuauka karena pe, jare oñoñauka tembipɨɨrɨru pe, Herodías jeko pegua. Echa Herodías jae ko Herodes tɨvɨ Felipe jembireko.

⁴ Echa tenonde yave Juan jei Herodes pe: “Mbaetɨ ko kavi rereko vaerä nderɨvɨ jembireko.”

⁵ Jáeramo Herodes oipota tëi oyukauka Juan. Ërei okɨɨye opaete vae reta güi. Echa jae reta güɨrovia Juan jae ko metei ñeemombeúa.

⁶ Ërei Herodes iara iaño oupitɨ ye vae omboaretea pe, Herodías imemɨkuña ou opɨrae mbɨtea pe, jare omboyerovia yae Herodes.

⁷ Jókuae jeko pegua Herodes oñererökuavee Tumpa jee re omee vaerä jókuae kuñatai pe oipotagüe mbae oiporu chupe vae.

⁸ Jare ichɨ omboemboe ma tenonde voi ramo, jei: —Emee cheve kuaeñae pe Juan oporombobautisa vae iñäkagüe pe.

⁹ Jayave mburuvicha guasu ipɨatɨtɨ. Ërei oñererökuavee Tumpa jee re chupe ramo, jare mesa pe ñogüɨnoi jae ndive vae reta oendu ramo, oporookuai oñemee vaerä chupe.

¹⁰ Jayave oyókuai sundaro reta oñäka-sɨa vaerä Juan tembipɨɨrɨru pe.

¹¹ Jare güeru iñäkagüe metei ñae pe omee kuñatai pe. Jare jae güɨraja omee ichɨ pe.

¹² Jayave Juan jemimboe reta yogüeru güɨraja jetegüe jare oñotɨ reta. Javoi yogüɨraja omombeu Jesús pe.

Jesús omongaru cinco mil vae reta

¹³ Jesús kuae oendu yave, ojo metei barco raɨ pe kïrii ngatúa pe. Ërei jeta vae reta oikuaa yave, yogüɨraja ɨvɨ rupi tëta guasu reta güi Jesús oïa pe.

¹⁴ Jare Jesús ogüeyɨ barco raɨ güi yave, oecha jeta yae vae, jare oiparareko omae jese reta. Ombogüera imbaerasɨ vae reta jae reta ndive ñogüɨnoi vae.

¹⁵ Kaaruasɨ ma yave, Jesús jemimboe reta yogüeru jei chupe: —Kuae rupi mbaetɨ kia ave oiko, jare kaaruasɨ yae ma. Emondo kuae jeta vae reta, ogua vaerä mbae jou reta tëta raɨ reta rupi.

¹⁶ Ërei Jesús jei chupe reta: —Agüɨye toyogüɨraja. Pe reta pemee tokaru.

¹⁷ Jae reta jei: —Jaeño rogüɨnoi pandepo mbɨyape jare mókoi jevae ɨ rupigua.

¹⁸ Jesús jei chupe reta: —Peru cheve kuae pe.

¹⁹ Jayave Jesús oyókuai jókuae jeta vae reta oguapɨ vaerä kapiata re. Jayave oipɨɨ jókuae pandepo mbɨyape jare mókoi jevae ɨ rupigua, jare omae reve ara kotɨ omee yasoropai Tumpa pe jese. Jayave opɨ̈saa mbɨyape, jare omee jemimboe reta pe, jare jae reta omee vaerä jeta vae reta pe.

²⁰ Opareve okaru, jare yangapɨɨ reta. Jayave Jesús jemimboe reta omboatɨ doce kanata mbɨyape jembɨregüe.

²¹ Okaru vae reta oupitɨ cinco mil kuimbae reta, oyepapambae reve kuña reta jare michia reta.

Jesús oguata ɨguasu iárambo

²² Jupiveiño Jesús oyókuai jemimboe reta oyeupi vaerä barco raɨ pe, yogüɨraja vaerä jenonde ɨguasu jovaicho pe, jae omboyupavo omondo ramboeve jeta vae reta.

²³ Jare opa ma omondo reta yave, Jesús oyeupi jaeño ɨvɨtɨ guasu re oyerure vaerä Tumpa pe. Jare pɨ̈tu yave, jaeño etei Jesús oï joko pe.

²⁴ Ërei barco raɨ ojo ma oväe ɨguasu mbɨte pe yave, echa ɨ tuicha oyemboɨaparúa jare ɨvɨtu täta oövaiti reta.

²⁵ Jare köeta ma yave, Jesús oguata ou ikotɨ reta ɨguasu iárambo.

²⁶ Jare Jesús jemimboe reta oecha oguata ou ɨ iárambo rupi yave, okɨɨye yae reve jei reta: —¡Mbae iä ko kuae! Jare jäse reta okɨɨye güi.

²⁷ Ërei jupiveiño Jesús ombou iñee chupe reta jei reve: —¡Agüɨye pekɨɨye, che ko!

²⁸ Jayave Pedro jei chupe: —CheYa, nde ko yave, ere aguata vaerä aja ndekotɨ ɨ iárambo rupi.

²⁹ Jare Jesús jei chupe: —¡Eyu! Jayave Pedro ogüeyɨ barco raɨ güi, jare omboɨpɨ oguata ɨ iárambo rupi ojo vaerä Jesús kotɨ.

³⁰ Ërei oecha yave ɨvɨtu täta yae, okɨɨye jare omboɨpɨ ojo ɨ́vɨkotɨ, jare osapúkai reve jei: —¡CheYa, chemborɨ!

³¹ Jupiveiño Jesús omondo ipo jare oipɨɨ Pedro. Jayave jei chupe: —Michi yae ndeporogüɨrovia. ¿Maera pa mbaetɨ rerovia ete cheré?

³² Jare oyeupi reta yave barco raɨ pe, opɨta ɨvɨtu.

³³ Jare barco raɨ pe ñogüɨnoi vae reta oya Jesús re. Jare omboete reta jei reve: —¡Añetete yepe, nde jae Tumpa Taɨ!

Jesús ombogüera Genesaret pe imbaerasɨ vae reta

³⁴ Opa oasa reta ɨguasu, jare yogüɨraja oväe ɨvɨ Genesaret pe.

³⁵ Jare joko pegua reta oikuaa Jesús. Jáeramo jae reta oikuaauka opaete vae pe jókuae ɨvɨ pe, jare güeru Jesús oïa pe imbaerasɨ vae reta.

³⁶ Jare omoñera reta Jesús omaeño vaerä imbaerasɨ vae reta opoko jemimonde jembeɨ re yepe. Jare opaete jemimonde re opoko vae reta okuera.