LEVÍTICO 5 - Biblia Guarani Tumpa Iñee

Mɨmba reta oyeyuka ïru mbaeyoa reta regua

¹ Kia nunga vae oñeenɨiuka yave mburuvicha reta jóvai imiari vaerä oechagüe re, jae ko oecha ani oikuaa ërei mbaetɨ ojo imiari yave, iyoa ko opɨta, toiporara jókuae iyoa re.

² Jaeramiño vi kia nunga vae opoko yave mɨmba ñana rupigua ani tëta rupigua oyeumbae vae jëogüegüe re ani ipɨtía re oguata vae jëogüegüe re, yepe tëi mbaetɨ oikuaa, tikɨa topɨta Tumpa jóvai, oyapo ko teko.

³ Ani opoko yave japicha ikɨagüe oporomongɨa Tumpa jóvai vae re oikuaambae reve vae, ërei jaɨkue rupi ou oikuaa yave, tijeko topɨta Tumpa jóvai.

⁴ Kia nunga vae jei yave Tumpa rovake oärombae reve oyapo vaerä ikavi vae ani ikavimbae vae, oipotagüe mbae re kuimbae reta ikɨ̈reɨ omoañete vae, ndei oyemongeta kavi jese mbove jare jaɨkue rupi ou oikuaa, tijeko topɨta oipotagüe kuae mbaembae reta re.

⁵ Iyoa yave kuae mbaembae reta rupi, toyemombeu jókuae mbaeyoa oyapogüe re.

⁶ Togüeru cheve mɨmba rókai güi metei mɨmba kuña, cheɨ̈ro vaerä chupe iyoa re; metei vecha taɨrusu vae ani kavara, jare sacerdote toyapo chupe cheɨ̈ro vaerä iyoa re.

⁷ Jare mbaetɨ korepoti oupitɨ chupe ogua vaerä vecha kuimbae taɨrusu vae yave; togüeru cheve, cheɨ̈ro vaerä chupe iyoa re, mókoi pɨkasui ani mókoi pɨkasutï: Metei toñemee, cheɨ̈ro vaerä mbaeyoa re, ïru opaetei oyeapɨ vaerä.

⁸ Jare togüeru sacerdote pe, jare jae tomee tenonde cheɨ̈ro vaerä mbaeyoa re vae, toiyayu mondoo ërei agüɨye tomondoo etei iñäka;

⁹ jare jugüɨgüe pe toñapiramo mɨmba oyeyuka oyeapɨ jese vae iyɨke; jare jugüɨ jembɨregüe toitɨami mɨmba oyeyuka oyeapɨ jese vae iyɨpɨ re, echa cheɨ̈ro mbaeyoa re vaerä ko.

¹⁰ Jare ïru tomee opaetei oyeapɨ vaerä, mborookuai jei rami, jökorai sacerdote toyapo chupe cheɨ̈ro vaerä mbaeyoa oyapo vae re, jare cheɨ̈rota chupe.

¹¹ Ërei mbaetɨ korepoti oupitɨ chupe ogua vaerä mókoi pɨkasui ani mókoi pɨkasutï yave, mbaeyoa oyapo vae togüeru mókoi kilo trigokúi ipɨuasɨ vae Tumpa iñɨ̈ro vaerä chupe iyoa re, agüɨye toñono jese olivo iasaite ani ikäti kavi vae incienso, echa cheɨ̈ro mbaeyoa re vaerä ko.

¹² Togüeru sacerdote pe jare jae toekɨ metei poagua joko güi, jókuae mbota jekovia pe, jare toapɨ mɨmba oyeyuka oyeapɨ jese vae re mbota reta oyeapɨ cheve vae iárambo; echa cheɨ̈ro mbaeyoa re vaerä ko.

¹³ Jare sacerdote toyapo chupe cheɨ̈ro vaerä iyoa re, jókuae mbaembae reta güi oyapogüe, jare cheɨ̈rota; jare jembɨregüe topɨta sacerdote peguarä, mbota temitɨ jäɨgüe oñemee vae rami.”

Mbota ñɨ̈ro pegua jare mbaemboepɨ oñemoïru reve

¹⁴ YandeYa jei Moisés pe:

¹⁵ “Kia nunga vae oyavɨ yave jare iyoa oikuaambae reve chekotɨ, mbaembae oñeñono tee vae omeeä yave, togüeru jeko re cheve metei vecha kuimbae jete kavi vae jɨmba reta güi, nde emae kavi jepɨ re, o mbaemboetea pe korepoti ipoɨ oñejäa rami, mbota mbaeyoa re oñemee vae ko.

¹⁶ Jare tomboepɨ jókuae mbaembae oñeñono tee vae güi omeembae, pandepo yave tomboekovia pandepo reve jare metei ye, jare tomee sacerdote pe; jare sacerdote toyapo chupe, cheɨ̈ro vaerä iyoa re, jókuae vecha kuimbae oyeyukagüe mbaeyoa re vae rupi, jare cheɨ̈rota chupe.

¹⁷ Kia nunga vae mbae oyapo vae rupi iyoa yave, cheporookuai kotɨ agüɨyeta tëi oyeapo vae oyapo yave, yepe tëi oikuaambae reve oyapo, tijeko topɨta, toiporara iyoa re.

¹⁸ Kuae jeko pegua togüeru sacerdote pe metei vecha kuimbae jete kavi vae, cheɨ̈ro vaerä mbaeyoa re; nde emae kavi jókuae mɨmba jepɨ re, jare sacerdote toyapo chupe cheɨ̈ro vaerä iyoa re, oikuaambae reve oyavɨ vae re, jare cheɨ̈rota chupe.

¹⁹ Echa oyavɨ ko, iyoa ko chekotɨ.”