LEVÍTICO 24 - Biblia Guarani Tumpa Iñee

Asaite mechero reta peguarä

¹ YandeYa jei Moisés pe:

² “Eyókuai Israel iñemuña reta togüeru ndeve temitɨ olivo ia oyeapasogüe iasaite oyeambae, jendɨ avei vaerä mechero reta.

³ Aarón toyangareko jese, opaete pɨ̈tu jendɨ vaerä ogüembae cheróvai, tupao guakapi pegua pe; käjou yemomaendúa pegua jóvai oï asoya vae güi ikatu pe. Mborookuai jekuae avei pegua toiko peñemuña reta pe.

⁴ Mechero renda ikɨambae re toñono kavi avei mechero cheróvai.

Mbɨyape reta mbaemboete pegua

⁵ Peipɨɨ trigokúi ipɨuasɨ vae, jare peyapo doce mbɨyape jare metei ñavo togüɨnoi irundɨ kilo y medio,

⁶ jare pemboyoarambo peñono mókoi atɨ mesa ikɨambae re cheróvai, metei atɨ ñavo toñogüɨnoi ova mbɨyape.

⁷ Peñono vi mbɨyape mókoi atɨ vae re ikäti kavi vae incienso, oyeapɨ vaerä mbɨyape reta jekovia pe, mbota oyeapɨ cheve vae ko.

⁸ Ara mbutuu pegua oväe ñavo peñono kavi avei cheróvai Israel iñemuña reta jee re, morogüɨrökuavee päve jekuae avei pegua ko.

⁹ Aarón jare iñemuña reta imbaerä toiko jekuae avei pegua, jae reta tou o oñeñono teea pe; echa mbota reta oñemee cheve vae, mbota reta oñeñono tee kavi yae vae ko.”

Tumpa oyangao vae reta oiporarata vae regua

¹⁰ Jókuae ara rupi oiko metei kuimbae, ichɨ ko Israel iñemuña pegua jare tu ko Egiptoɨgua, kuae kuimbae oyoaka metei kuimbae Israel iñemuña pegua ndive teyupa pe.

¹¹ Jare kuae kuña Israel iñemuña pegua imembɨraɨe oyangao Tumpa; jare güɨraja reta Moisés jóvai. Ichɨ ko jee Selomit, Dibri tayɨ, jae ko Dan iñemuña pegua;

¹² jare oñono reta tembipɨɨrɨru pe, yandeYa omombeu regua chupe reta mbae ra oyeapota chupe vae.

¹³ Jare yandeYa jei Moisés pe:

¹⁴ “Jókuae cheangao vae penoe teyupa güi ikatu pe; jare opaete iñee oendu vae reta toñono ipo jókuae kuimbae iñäka re, javoi opaete vae toyapi ita pe toyuka.

¹⁵ Jare nemiari Israel iñemuña reta pe, körai: Oipotagüe jei yave ñee ikavimbae iTumpa kotɨ, toiporara jeko re.

¹⁶ Kia nunga vae cheangao yave, tomano; opaete yatɨ vae reta toyapi ita pe toyuka; ketɨgua reta ani pegüi reta, oyangao yave Tumpa, tomano.

¹⁷ Jaeramiño vi kia nunga vae oyuka yave japicha, jae tomano vi.

¹⁸ Kia nunga vae oyuka yave mɨmba ambuae, tomboekovia ye jókuae mɨmba oyukagüe.

¹⁹ Kia nunga vae maratu oporoapo yave, jókuae oporoapo rami toyeapo vi chupe:

²⁰ Oporomopë vae, toñemopë vi; oporomboesakuape vae, toyemboesakuape vi; täi omopë vae, jäi toñemopë vi; jókuae oporoapo rami toyeapo vi chupe.

²¹ Kia nunga vae oyuka yave mɨmba ambuae, tomboekovia ye jókuae mɨmba oyukagüe. Ërei japicha oyuka vae, tomano.

²² Metei mborookuaiño toiko peveguarä jare ketɨgua reta peguarä. Echa che ko peYa Tumpa.”

²³ Jare Moisés imiari Israel iñemuña reta pe, jare jae reta güɨnoe teyupa güi, jókuae Tumpa oyangao vae, jare oyapi reta ita pe oyuka. Jökorai Israel iñemuña reta oyapo, yandeYa oyókuai Moisés vae rami.