JUECES 7 - Biblia Guarani Tumpa Iñee

Gedeón omoamɨri Madián iñemuña reta

¹ Ndeimbove yave opüa Jerobaal, jae ko Gedeón, jare opaete jae ndive ñogüɨnoi vae reta, jare yogüɨraja oyembojeyupa reta ɨesaɨ Harod iyɨpɨ pe; jare Madián iñemuña reta jeyupa oï chugüi reta ɨvɨtuguasu kotɨ, ɨvɨtɨ More ipäu ipe kavía pe.

² Jare yandeYa jei Gedeón pe: “Tëta ñogüɨnoi nde ndive vae jeta yae ko amee vaerä Madián iñemuña reta pepo pe, echa Israel iñemuña reta oyererovia katuta jae reta aeño ko oporomoamɨri vae.

³ Jáeramo, añave ere opaete vae pe, kia ñavo okɨɨye yave, toyerova ye jëta kotɨ kuae Galaad iɨvɨtɨ güi.” Jare oyerova ye veintidó mil kuimbae, jare opɨta diez mil.

⁴ Jare yandeYa jei Gedeón pe: “Jeta yae vɨteri ko; eraja reta ɨ̈aka pe, jare joko pe aiparavota ndeve; jare che jaeta ndeve: Kuae tojo nderupíe; jae ojota nderupíe; ërei oipotagüe vae pe jae yave ndeve: Kuae agüɨye tojo, jókuae kuimbae agüɨye tojo.”

⁵ Jayave Gedeón güɨraja tëta pegua reta ɨ̈aka pe; jare yandeYa jei chupe: “Opaete ipo pe oupi ɨ jou vae reta, jókuae eñono tee; jaeramiño vi opaete oyetavatɨka ɨ jou vae eñono tee.”

⁶ Jare oyepapa tresciento kuimbae reta, ipo pe oñono ɨ jou vae, jare opaete ïru reta oyetavatɨka jou ɨ.

⁷ Jayave yandeYa jei Gedeón pe: “Kuae tresciento kuimbae ipo pe ɨ jou vae reta rupi poepɨta, jare ameeta Madián iñemuña reta ndepo pe; jare opaete ïru reta toyogüɨraja ye jëta jëta ae kotɨ.”

⁸ Jare omombɨta tembíu jare mimbɨguasu kuimbae reta peguarä yave, opa ye omondo jëta jëta ae kotɨ opaete ïru Israel reta, jaeño omombɨta jókuae tresciento kuimbae reta. Madián iñemuña reta jeyupa opɨta ɨ́vɨkotɨ chugüi reta, ipe kavía pe.

⁹ Jayave jókuae pɨ̈tu yandeYa jei chupe: “Epüa, jare egüeyɨ teyupa kotɨ; echa che ko amee reta ndepo pe.

¹⁰ Ërei rekɨɨye regüeyɨ jokotɨ yave, egüeyɨ nderembiokuai Fura ndive,

¹¹ jare eendu imiari reta vae; jayave reñemoäta ngatuta, jare reporepeñata teyupa re.” Jayave Gedeón ogüeyɨ jembiokuai Fura ndive, tovaicho reta köi yae ñogüɨnoi chugüi retaa kotɨ.

¹² Jare Madián iñemuña reta, jare Amalec iñemuña reta jare kuaraɨ oëa kotɨgua reta, oñemoai ɨvɨpe kavi rupi, tuku jeta yae vae rami, jare jɨmba camello reta oyepapa rapeä, ɨguasu jembeɨ pe ɨvɨkuitï jeta yae rami.

¹³ Jare Gedeón ojo oväe yave, metei kuimbae imiari oï ipaɨu re iñeïru pe, jei reve: —Che apaɨu. Cheke pe aecha cebada pegua mbɨyape, otokororo ou Madián iñemuña reta jeyupa kotɨ, ou oväe metei küaraɨa guakapi pegua pe jare oa jese yave opaetei oitɨ jókuae küaraɨa guakapi pegua.

¹⁴ Jare iñeïru jei chupe: —Kuae mbaetɨ ye ïru mbae, Gedeón, Joás Israel iñemuña pegua taɨ ikɨsepuku ko, Tumpa ko opa omee ipo pe Madián iñemuña reta, opaete jeyupa ndive.

¹⁵ Jare Gedeón oendu jókuae miari mbaɨu regua yave, jare mbae oipota jei vae yave, omboete Tumpa. Jare ou ye Israel iñemuña reta jeyupa pe yave jei: —¡Pepüa, echa yandeYa omee pepo pe Madián iñemuña reta!

¹⁶ Jare omboyao jókuae tresciento kuimbae mboapɨ yemboyao pe, jare omee opaete vae ipo pe mimbɨguasu jare tinaa ipombae japɨpe pe mechero jendɨ reve.

¹⁷ Jare jei chupe reta: —Pemae cheré, jare peyapo che ayapo rami. Che aja ma aväe teyupa jembeɨ jovaicho pe yave, pe reta peyapo che ayapo rami.

¹⁸ Che amoñeeta mimbɨguasu, jare opaete che ndive ñogüɨnoi vae reta; jayave pe reta pemoñee vi mimbɨ guasu opaete teyupa jembeɨ rupi, jare pesapúkai: “¡OreYa jee re jare Gedeón re!”

¹⁹ Gedeón jare cien kuimbae jae ndive güɨraja vae reta opa yogüɨraja oväe teyupa jembeɨ ïru pe, pɨare mbɨte yave sundaro omaeäro vae reta opa ramo oyopoepɨ yave; jare omoñee reta mimbɨguasu, jare oyoka reta tinaa ipo pe güɨraja reta vae.

²⁰ Jare jókuae mboapɨ yemboyao vae reta omoñee mimbɨguasu jare oyoka reta tinaa, jare oipɨɨ reta iyasu kotɨ imechero, jare iyakatu kotɨ mimbɨguasu omoñee reta vae, jare osapúkai reta: “¡OreYa jee re jare Gedeón ikɨsepuku re!”

²¹ Jare metei ñavo vae oyemboɨ sɨmbi jenda ñavo pe teyupa iyɨ́vɨri rupi; jayave opaete tovaicho reta oë osɨi jäse reve otekuarai reta.

²² Jare jókuae tresciento vae reta jeiete omoñee mimbɨguasu. Jare yandeYa omoñerarouka oyoupii aeño opaete teyupa pegua reta. Jare tovaicho reta otekuarai yogüɨraja regua oväe Bet-sita kotɨ, Zerera re katu, Abel-mehola jembeɨ pe, Tabat pe.

²³ Jayave oyomboatɨ Neftalí iñemuña reta, Aser iñemuña reta, jare opaete Manasés iñemuña reta oaɨkuemoña vaerä Madián iñemuña reta.

²⁴ Gedeón omondo vi ñee jerajaa reta opaete ɨvɨtɨ Efraín pegua rupi oyókuai reve kuimbae reta ogüeyɨ vaerä oñoraro Madián iñemuña reta ndive jare opɨ̈ro reta vaerä ɨ̈aka Bet-bara jare Jordán rupi tape oasa vae, ndei yogüɨraja oväe joko pe mbove. Efraín iñemuña reta oyapo jókuae mborookuai,

²⁵ jare oipɨɨ reta mókoi reve mburuvicha guasu Madián iñemuña reta juvicha, Oreb jare Zeeb. Oreb oyuka reta ɨ̈vavira Oreb jee añave vae pe, jare Zeeb oyuka reta Zeeb jee vae pe, uva oñetɨamisea pe. Jare oaɨkuemoña poi reta ma yave, güɨraja reta Gedeón pe, Oreb jare Zeeb iñäkagüe, ɨ̈aka Jordán jovaicho pe.