Judas 1 - Biblia Guarani Tumpa Iñee

Tamaraeme

¹ Che Judas, Jacobo tɨvɨ, Jesucristo jembiokuai, aikuatía yandeRu Tumpa oiparavo jare oñeñono tee vae reta pe. Jesucristo re oñeñovatu vae reta pe.

² Tumpa iporoparareko jare ipɨakatu jare iporoaɨu toï jeta pe reta ndive.

Añetembae oporomboe vae reta

³ Cherɨvɨ aaɨu vae reta, chekɨ̈reɨ yae aikuatía peve yandeyemboasa regua. Ërei ikavi cheve aikuatía vaerä peve pomboarakuaa vaerä peñemoäta ngatu mborogüɨrovia oñemee oñeñono tee vae reta pe vae re.

⁴ Echa amogüe kuimbae reta oike vɨari pepɨte pe, ɨma ma Tumpa oikuaauka voi jae reta oiporarata vae, ikavimbae vae reta ko, Tumpa ipɨakavi oipoepɨ reta jae reta jei vaeño oyapo vaerä. Oikuaku reta Tumpa Imbaepuere yae vae jare yandeYa Jesucristo.

⁵ Jáeramo yepe tëi peikuaa ma, ërei aipota pomomaendúa ye kuae re: YandeYa güɨnoe Israel pegua reta Egipto güi. Ërei taɨkue rupi opa omokañɨtei jese güɨroviambae vae reta.

⁶ Jare araɨgua reta mbaetɨ opɨta Tumpa oñonoa pe vae, jaeño oeya reta oikoa, jáeramo Tumpa oyokenda oñono reta pɨtumimbi pe, tembipɨɨrɨru opambae pe, Tumpa iporojäa iara peguarä.

⁷ Jaeramiño vi Tumpa oiporarauka Sodoma jare Gomorra jare iyɨvɨrigua tëta guasu reta pe. Echa joko pegua reta oyapo aguasa jare kuimbae reta oyogüɨreko oyoupii. Jáeramo oiporara reta tata opambae oikuaauka vaerä ïru vae reta pe agüɨye vaerä oyapo jae reta oyapo rami.

⁸ Jaeramiño vi mboromboe añetembae re oporomboe vae reta oñemona etei ma ko jókuae nunga pe, güɨröɨro reta yandeYa imbaepuere, mbaetɨ oipoɨu reta jei vaerä ikavimbae vae Tumpa iaraɨgua reta kotɨ.

⁹ Ërei araɨgua tenondegua Miguel etei oñoraro yave aña guasu ndive oyoaka reve Moisés jetegüe re, oipoɨu omboeko vaerä aña guasu. Jaeño jei chupe: “YandeYa toñeengata ndeve.”

¹⁰ Ërei mboromboe añetembae re oporomboe vae reta jei ñee ikavimbae vae oikuaambae vae kotɨ. Jae reta mɨmba reta oikuaa ramiño ko oikuaa. Echa yogüɨreko jei vae reño.

¹¹ ¡Paravete jae reta! Echa omomoe reta Caín jeko. Jaeramiño vi ikorepoti pota güi opa opia reta Balaam rami; jaeramiño vi opa omano reta ipɨa pochɨ jeko pegua Coré rami.

¹² Kuae reta ko pemomarai peyemboatɨ pekaru peyoaɨu revea pe, echa jae reta okaru pe reta ndive imarambae reve, iyé aeño oyangareko reta; jae reta ko amapɨtu iamambae vae rami, jókuae ɨvɨtu täta güɨroveve rami; temitɨ iambae iara pe vae rami, mókoi ye omano, jare oyeapomondoro.

¹³ Jae reta ko ɨguasu iɨaparúa tuicha vae oñaro vae rami, jókuae ɨ tɨrɨyɨi rami ko jembiapo ikavimbae, yasɨtata jopa vae rami ko. Pɨtumimbi opambae vae oñeñovatu oï chupegua retarä.

¹⁴ Enoc jae ko chiu ñemuña pegua Adán güi vae, jae kuae reta re vi omoërakua, jei reve: “Mase, ko ou yandeYa jeta yae vae iaraɨgua reta ndive

¹⁵ ojäata vaerä opaete vae, oiporarauka vaerä opaete iyoa vae jupimbae oyapo vae reta pe, jare opaete ñee ikavimbae vae iyoa vae reta jei ikotɨ vae pe.”

¹⁶ Jae reta ko iñeenguru vae reta, oporoangao vae reta, yogüɨreko ipɨa jemimbota reño vae reta. Jae reta imiari oyemboete reve, iñee kavi jaanga reta oipota ïru vae reta omee mbae chupe ramo.

Yemboarakuaa reta oporogüɨrovia vae reta pe

¹⁷ Ërei pe cherɨvɨ aaɨu vae reta, pemaendúa yandeYa Jesucristo jemimondo reta omombeu peve vae re,

¹⁸ echa jae reta jei yepi peve: “Ara taɨkuegua reta pe oimeta oporoyóyai yóyai vae reta, isoo jemimbota ikavimbae reño vae yogüɨreko vae reta.”

¹⁹ Kuae reta ko oporomboyaouka, echa jókuae reta ko jemimbota reño yogüɨreko vae jare mbaetɨ güɨnoi Espíritu Santo.

²⁰ Ërei pe cherɨvɨ aaɨu vae reta, peñemomɨ̈rata peporogüɨrovia ikɨambae pe, peyerure reve Espíritu Santo rupi.

²¹ Peiko avei Tumpa iporoaɨu pe. Peäro reve yandeYa Jesucristo iporoparareko rupi omee vaerä peve tekove opambae vae.

²² Peiparareko amogüe iporogüɨrovia pe mbaetɨ ipɨ̈rata vae.

²³ Amogüe pemborɨ, penoe tata güi. Jare ïru vae peiparareko, ërei peyeandu reve iyoa reta güi. Echa ikavi ko peröɨro vaerä chugüi jemimonde ave omongɨa iyoa pe vae.

Mbaemboete Tumpa pe

²⁴ Jókuae imbaepuere yae ñaneovatu vaerä yagüɨapimbae reve vae, jare ñaneñono vaerä ikɨambae jare yayerovia yae reve jae jóvai iyemboetea pe,

²⁵ Tumpa jaeño vae jare yarakuaa vae, Yandemboasa vae pe toñemee mbaemboete, yembotuicha jare mbaepuere, añave jare jekuaekuae avei rupi. ¡Amén!