San Juan 1 - Biblia Guarani Tumpa Iñee

Ñee oyeapo Kuimbaerä

¹ Iyɨpɨ ete pe oiko Ñee. Jare jókuae Ñee oiko Tumpa ndive. Jae ko Tumpa etei.

² Jókuae Ñee oiko Tumpa ndive iyɨpɨ ete pe.

³ Opaete mbaembae jae etei oyapo. Jae oyapombae reve mbaetɨi mbae oyeapogüe.

⁴ Jese ko oï tekove, jare jókuae tekove jae ko tembipe ɨvɨ pegua reta pe.

⁵ Tembipe pɨtumimbi pe jembipe, jare pɨtumimbi ipuereä etei ombogüe.

⁶ Oiko metei kuimbae Juan jee vae Tumpa ombou vae.

⁷ Jae ou omombeu vaerä jókuae tembipe regua, opaete vae reta güɨrovia vaerä jei vae rupi.

⁸ Juan jaeä ko jókuae tembipe. Jae ko ou jókuae tembipe re omombeu vaeräño.

⁹ Jókuae tembipe añetete pegua vae, omboesape opaete vae reta re vae ou kuae ɨvɨ pe.

¹⁰ Jae oiko kuae ɨvɨ pe, jae rupi oyeapo kuae ɨvɨ. Ërei ɨvɨ pegua reta mbaetɨ oikuaa.

¹¹ Ou jëtaɨgua reta pɨri, ërei jëtaɨgua reta mbaetɨ omboresive.

¹² Ërei opaete omboresive vae reta, güɨrovia jese vae reta pe, omee ipuere vaerä yogüɨreko Tumpa taɨ retarä ani tayɨ retarä.

¹³ Tumpa etei kuae oyapo, mbaetɨ ou reta ichɨ ani tu rupi, jaeño ou Tumpa jemimbota rupi.

¹⁴ Jókuae Ñee oyeapo Kuimbaerä, jare ou oiko orepɨte rupi mbɨakatu ndive jare añetegüe rupi. Jare ore roecha iyemboetea, Tumpa Taɨ jae vaeño vae iyemboetea.

¹⁵ Juan imiari jese ïru vae reta pe, jei reve: “Kuae ko jae chemiari jese vae, jae yave: ‘Cheraɨkue rupi outa vae, jae ko tuichagüe yae chegüi vae, echa oikoño mai ndei aiko mbove.’ ”

¹⁶ Echa ipɨakavi yae güi yamboresive avei jekuaekuae iporerekua reta.

¹⁷ Moisés rupi oñemee mborookuai. Ërei Jesucristo rupi ou, Tumpa ipɨakavi jare añete vae.

¹⁸ Mbaetɨi kia oecha Tumpa vae. Ërei Tumpa Taɨ jaevaeño vae, oiko jae ndive etei vae oikuaauka yandeve.

Juan oporombobautisa vae omombeu vae

¹⁹ Kuae ko jae Juan omombeu vae, judío reta Jerusalén pegua omondo yave sacerdote reta jare levita reta oparandu vaerä chupe, kia ra jae vae.

²⁰ Jare Juan omombeu kavi chupe reta, jei: —Che jaeä ko Cristo.

²¹ Jae reta oparandu ye chupe: —Jayave, ¿nde pa ko jae Elías? Juan jei: —Jaeä ko che. Jei reta chupe: —¿Nde pa ko jókuae ñeemombeúa? Juan jei chupe reta: —Jaeä ko che.

²² Jayave oparandu reta ye chupe: —Jayave ¿kia pa nde? Romombeu vaerä orembou vae reta pe. ¿Mbae pa rere ndeyé?

²³ Jayave Juan jei: —Che ko jae metei ñuu pe asapúkai reve jae vae: “Pembosɨmbi yandeYa japerä.” Ñeemombeúa Isaías jei rami.

²⁴ Kuae Juan oïa pe yogüɨraja vae reta fariseo reta ko.

²⁵ Oparandu reta Juan pe: —¿Maera pa reporombobautisa? Nde jaeä ko Cristo ani Elías ani jókuae ñeemombeúa yave.

²⁶ Juan jei chupe reta: —Che aporombobautisa ɨ pe. Ërei pepɨte pe oime oï metei mbaetɨ peikuaa vae.

²⁷ Jae ko tuichagüe yae chegüi vae, mbaetɨ jupi che ipɨapaa iïcha ayora vaerä ave vae.

²⁸ Opaete kuae oasa Betábara pe, ɨ̈aka Jordán jovaicho pe, Juan oporombobautisaa pe.

Jesús, Tumpa iVecha kuimbae taɨrusu vae rami vae

²⁹ Pɨareve pe Juan oecha Jesús ou ikotɨ jare jei: “Mase, kuae ko jae Tumpa iVecha kuimbae taɨrusu vae. Omboai opaete ɨvɨ pegua reta iyoa vae.

³⁰ Kuae ko jae chemiari jese vae, jae yave: ‘Cheraɨkue rupi outa vae, jae ko tuichagüe yae chegüi vae, echa oikoño mai ndei aiko mbove.’

³¹ Che mbaetɨ aikuaa kia ko jae vae. Ërei ayu aporombobautisa ɨ pe Israel pegua reta oikuaa vaerä.”

³² Juan omombeu vi chupe reta, jei: “Aecha Espíritu ogüeyɨ ara güi jese pɨkasu rami.

³³ Che mbaetɨ aikuaa kia ko jae vae. Ërei chembou aporombobautisa vaerä ɨ pe vae jei cheve: ‘Reecha Espíritu ogüeyɨ jese vae, jae ko jókuae kuimbae oporombobautisa Espíritu Santo pe vae.’

³⁴ Jókuae aecha jare amombeu peve, jae ko jókuae Tumpa Taɨ.”

Jesús jemimboe ɨpɨ reta

³⁵ Pɨareve pe Juan oï ye joko pe mókoi jemimboe reta ndive.

³⁶ Jare oecha Jesús oasa jokoropi yave jei: —Mase, kuae ko jae Tumpa iVecha kuimbae taɨrusu vae.

³⁷ Jare jókuae mókoi jemimboe oendu yave, yogüɨraja Jesús jupíe.

³⁸ Jesús oyerova yave, oecha yogüeru jupíe, jare jei chupe reta: —¿Mbae pa peeka? Jae reta jei chupe: —Oporomboe vae, ¿kia pe pa reiko?

³⁹ Jesús jei chupe reta: —Peyu jare peecha. Jayave yogüɨraja oecha Jesús oikoa, jare opɨta jókuae ara jae ndive. Echa kaaru yae ma.

⁴⁰ Andrés, Simón Pedro tɨvɨ jae ko metei jókuae mókoi vae güi oendu Juan jei vae jare ojo Jesús jupíe vae.

⁴¹ Andrés, tenonde oeka tɨkeɨ Simón, jare jei chupe: —Roväe ma Mesías (kuae oipota jei: Cristo.)

⁴² Jayave Andrés güeru Simón Jesús oïa pe. Jesús omae ngatu Simón re jare jei: —Nde ko jae Simón, Jonás taɨ. Ndereeta Cefas (kuae oipota jei: Pedro.)

Jesús oenɨi Felipe jare Natanael

^43-44 Pɨareve pe Jesús oipota ojo Galilea pe. Jare oväe Felipe Betsaida pegua. Andrés jare Pedro jëta guasu pegua. Jesús jei Felipe pe: —Eyu cherupíe.

⁴⁵ Jayave Felipe oväe Natanael jare jei chupe: —Roväe jókuae Moisés oikuatía jesegua mborookuai pe vae. Jare ñeemombeúa reta. Jae ko Jesús, José Nazaret pegua taɨ.

⁴⁶ Jayave Natanael jei: —¿Oime ra mbae ikavi vae oë vaerä Nazaret güi? Felipe jei: —Eyu emae jese.

⁴⁷ Jesús oecha Natanael ou ikotɨ yave, jei: —Mase, ko ou metei Israel pegua añete vae. Mbaetɨ oñeväe yembotavɨ jese vae.

⁴⁸ Natanael oparandu Jesús pe: —¿Kërai pa chekuaa? Jesús jei chupe: —Ndei Felipe nereenɨi mbove, ɨva igüɨ pe reï yave, che roecha.

⁴⁹ Jayave Natanael jei chupe: —Oporomboe vae. ¡Nde ko jae Tumpa Taɨ. Nde ko jae Israel pegua reta Juvicha guasu!

⁵⁰ Jesús jei chupe: —¿Amombeu ndeve che roecha ɨva igüɨ pe jeko pegua pa reporogüɨrovia? Reechata mbae tuichagüe kuae reecha vae güi.

⁵¹ Añetete che jae ndeve, reechata ara oyepea oï, jare reechata vi Tumpa iaraɨgua reta oyeupi jare ogüeyɨ che Kuimbaerä oyeapo vae re.