JOSUÉ 13 - Biblia Guarani Tumpa Iñee

Ɨvɨ ndeiño oñepɨ̈ro vae

¹ Josué indechi yae ma yave, yandeYa jei chupe: “Nde nendechi yae ma, jare jeta vɨteri oata ɨvɨ oñepɨ̈ro vaerä.

² Kuae ko jae ɨvɨ opɨtagüe: Opaete ɨvɨ filisteo reta imbae, jare opaete ɨvɨ Gesur iñemuña reta imbae,

³ Sihor, Egipto güi kuaraɨ oëa kotɨ oï vae güive Ecrón jembeɨ kotɨ ɨvɨtuguasu kotɨ, cananeo reta oyemombae jese vae; joko pe oime pandepo filisteo juvicha reta ñogüɨnoia, jae ko Gaza, Asdod, Ascalón, Gat jare Ecrón. Opɨta vi aveo reta iɨvɨ,

⁴ arayevɨ kotɨ, jare opaete ɨvɨ cananeo reta imbae, Mehara, Sidón pegua reta jëta guasu güive Afec kotɨ, amorreo reta iɨvɨ jembeɨ pe.

⁵ Opɨta vi Gebal-ɨgua reta iɨvɨ, jare opaete Líbano kuaraɨ oëa kotɨ, Baal-gad güive, ɨvɨtɨ Hermón igüɨ pe, Hamat oyemboɨpɨa kotɨ.

⁶ Opaete ɨvɨtɨ guasu rupi jëta vae reta, Líbano güive Misrefot-maim kotɨ, opaete Sidón pegua reta; che amboaita Israel iñemuña reta jenonde güi, jaeño nde emboyao ɨvɨ suerte rupi Israel iñemuña reta imbaerä, che royókuai rami.

⁷ Emboyao añave kuae ɨvɨ chau ñemuña pe, jare Manasés iñemuña reta oyemboyaogüe pe.”

Manasés, Rubén jare Gad iñemuña reta iɨvɨ

⁸ Echa Rubén jare Gad iñemuña reta jare Manasés iñemuña reta oyemboyaogüe güɨnoi reta ma iɨvɨ, Moisés omee chupe reta ɨ̈aka Jordán jovaicho kotɨ, kuaraɨ oëa kotɨ.

⁹ Aroer, ɨ̈aka Arnón jembeɨ pe oï vae güive, jare tëta guasu ɨvɨtɨ päu pe oï vae, jare opaete ɨvɨpe kavi Medeba güive Dibón kotɨ,

¹⁰ opaete tëta guasu reta Sehón, amorreo reta juvicha guasu Hesbón pegua imbae, ojoi oväe Amón iñemuña reta iɨvɨ jembeɨ pe.

¹¹ Ɨvɨ Galaad jare tëta Gesur jare Maaca pegua reta iɨvɨ, jare opaete ɨvɨtɨ Hermón, jare opaete ɨvɨ Basán, Salca kotɨ,

¹² jare opaete Og iporookuaía Basán pe, kuae oiko mburuvicha guasurä Astarot pe jare Edrei pe, jae ko refaita reta güi jembɨregüe, kuae reta Moisés opa omoamɨri jare omombo iɨvɨ güi.

¹³ Ërei Israel iñemuña reta mbaetɨ omombo tëta Gesur jare Maaca pegua reta, kuae reta oime yogüɨreko añave rupi Israel iñemuña reta ipɨte pe.

¹⁴ Ërei Moisés mbaetɨ omee ɨvɨ Leví iñemuña reta pe, echa mɨmba oyeyuka oñemee yandeYa Tumpa pe vae ko jae reta imbaeyekou, jae etei jei chupe reta rami.

¹⁵ Moisés omee ɨvɨ Rubén iñemuña reta pe, jëtara ñavo rupi.

¹⁶ Jayave Rubén iñemuña reta iɨvɨ oyemboɨpɨ Aroer, ɨ̈aka Arnón jembeɨ pe oï vae güive, jare tëta guasu ɨvɨtɨ päu mbɨte pe oï vae jare opaete ɨvɨpe kavi Medeba kotɨ;

¹⁷ Hesbón, jare opaete iyɨvɨrigua tëta ɨvɨpe kavi rupi ñogüɨnoi vae ndive, jae ko: Dibón, Bamot-baal, Bet-baal-meón,

¹⁸ Jahaza, Cademot, Mefaat,

¹⁹ Quiriataim, Sibma, Zaret-sahar, ɨvɨtɨ päu ipe kavi vae iɨvɨtɨ re,

²⁰ Bet-peor, ɨvɨtɨ guasu Pisga ikúa, Bet-jesimot,

²¹ opaete tëta guasu reta ɨvɨpe kavi rupigua jare opaete Sehón, amorreo reta juvicha guasu imbae, Hesbón pe mburuvicha guasurä oiko vae. Echa Moisés opa omoamɨri Sehón jare mburuvicha reta, jare jeia re yogüɨreko vae reta Madián pegua: Evi, Requem, Zur, Hur jare Reba.

²² Israel iñemuña reta oyuka vi jeta vae reta ndive Balaam, Beor taɨ, maratuta vae imombeúa.

²³ Ɨaka Jordán jae ko Rubén iñemuña reta iɨvɨ jembeɨ. Kuae jae ko Rubén iñemuña reta pe ɨvɨ oyemboyao vae, jëtara reta ñavo rupi, kuae tëta guasu reta, tëta raɨ reta ndive ndive.

²⁴ Moisés omboyao vi ɨvɨ Gad iñemuña reta pe jëtara ñavo rupi.

²⁵ Gad iñemuña reta iɨvɨ jae ko Jazer, jare opaete tëta guasu reta Galaad pegua, Amón iñemuña reta iɨvɨ mbɨte güive tëta Aroer kotɨ, Rabá jóvai oï vae pe,

²⁶ jare Hesbón güive Ramat-mizpa kotɨ, jare Betonim; jare Mahanaim güive Debir jembeɨ kotɨ;

²⁷ jare ɨvɨtɨ päu pe: Bet-aram, Bet-nimra, Sucot jare Zafón, opaete Sehón, mburuvicha guasu Hesbón pegua imbae jembɨregüe. Jayave Gad iñemuña reta iɨvɨ oyemboɨpɨ ɨ̈aka Jordán jovaicho kuaraɨ oëa kotɨgua güive ojoi oväe Ɨguasu Cineret pe.

²⁸ Kuae ko jae Gad iñemuña reta imbaerä ɨvɨ oyemboyao vae, jëtara ñavo rupi, kuae tëta guasu reta, tëta raɨ reta ndive ndive.

²⁹ Moisés omboyao vi ɨvɨ Manasés iñemuña reta oyemboyaogüe pe, jëtara ñavo rupi.

³⁰ Manasés iñemuña reta oyemboyaogüe iɨvɨ, jae ko Mahanaim güive opaete Basán, opaete Og mburuvicha guasu Basán pegua imbae, jare opaete tëta raɨ reta Jair imbae Basán pe ñogüɨnoi vae, opareve sesenta tëta,

³¹ jare Galaad mbɨte rupi, jare tëta guasu Astarot jare Edrei, tëta guasu reta Basán pegua Og imbae. Opaete kuae ɨvɨ jae ko Manasés taɨ, Maquir iñemuña reta oyemboyaogüe peguarä, jëtara ñavo rupi.

³² Kuae ko jae ɨvɨ Moisés omboyao ɨvɨpe kavi oï Moab pe vae, ɨ̈aka Jordán güi kuaraɨ oëa kotɨ, Jericó jóvai.

³³ Ërei Moisés mbaetɨ omee ɨvɨ Leví iñemuña reta imbaerä, echa jei chupe reta: “YandeYa, Israel iTumpa jae ko pembaeyekou rami.”