JONÁS 2 - Biblia Guarani Tumpa Iñee

Jonás iyerure

¹ Jayave Jonás oyerure yandeYa Tumpa pe jevae ɨ rupigua jɨe güi,

² jei körai: “CheYa, roenɨi chepɨatɨtɨa güi, jare nde chereendu; omanogüe reta ñogüɨnoia güi asapúkai jare reendu cheñee.

³ Chemombo ɨguasu iyɨvɨte pe; jare cheöva ɨ, ɨ omembe vae opaetei cheasoi.

⁴ Jayave jae: Chemombo ma nderesa róvai güi; ërei aecha vɨterita nerëta ikɨambae.

⁵ Ɨ opaetei cheasoiasɨ, ɨvɨsoro guasu cheöva; yaguapei oñemama cheäka re.

⁶ Aja ɨvɨtɨ reta iguapɨa pe; ¡ɨvɨ oyokenda jöke cheárambo jekuae avei pegua! Ërei nde cheYa Tumpa cherenoe tɨvɨa güi.

⁷ Cherekove ipɨtu yae ma yave, chemaendúa nderé, cheYa, jare cheyerure ojo oväe ndeve, ndero ikɨambaea pe.

⁸ Ikavimbae omomoe vae reta ndeporoparareko güi ko osɨrɨ reta.

⁹ Ërei che cheñee pe romboete reve, tamee ndeve mɨmba oyeyukagüe; tambopo arökuavee ndeve vae. ¡Yereroasayepe yandeYa imbae ko!”

¹⁰ Jare yandeYa omondo jevae ɨ rupigua ɨ jembeɨ kotɨ jare joko pe ogüëe, jare omoë Jonás ɨ jembeɨ pe.