JOB 30 - Biblia Guarani Tumpa Iñee

Job güɨroäse oiporara oï vae

¹ Ërei añave cheyóyai kunumi reta taɨrusu yae chegüi vae, tu reta aröɨro añono cherɨmba iyangarekoa reta ipɨte pe.

² ¿Mbae pe ra chemborɨta? Jae reta ave mbaetɨve ma ipuere,

³ paravete jare yɨmbɨaɨ jeko pegua oguata reta jae aeño, otekuarai reta ipombaea kotɨ pɨtumimbía kotɨ, ñuu kotɨ.

⁴ Omonoo reta güɨrakɨyo ñana pɨte rupi, mangara jou reta.

⁵ Oyemombouka reta jeta vae reta ipɨte güi, jeta vae reta osapúkai ikotɨ imonda vae re rami.

⁶ Yogüɨreko reta ɨ̈aka iñɨ̈vɨa rupi, ɨvɨkua rupi jare itakua rupi.

⁷ Oyeendu reta ipu ñana pɨte rupi, oyemboatɨ reta yuu reta igüɨ rupi.

⁸ Osirivembae reta, mbaragüe reta, tëta güi oyemombogüe reta.

⁹ Añave jae reta cheyóyai yóyai, opuka reta cheré vaeräño aiko.

¹⁰ Oyuguaru reta jare osɨrɨ reta chegüi, ondɨvɨ reta cherova re.

¹¹ Echa Tumpa oyora ichikote jare oiporarauka cheve, jáeramo mbaetɨ chemboete reta.

¹² Cheakatu kotɨ opüa cheve chemboeko vae reta, chereitɨ reta, oipota cheyuka reta.

¹³ Cherape oyopia reta chemokañɨtei vaerä, mbaetɨ kia oyopia reta vaerä.

¹⁴ Yogüeru reta öke ipɨguasu vae rupi rami, oyere reta aiporara aï vae re.

¹⁵ Chemongɨɨye yae reta, ɨvɨtu rami ojo chegüi anoita tëi vae, aiko kavi vae oasa chegüi amapɨtu rami.

¹⁶ Añave mbaetɨ ma aipota aiko vaerä, tembiporara reta chemoamɨri.

¹⁷ Mbae jasɨ ojo chekägüe reta pe oväe; mbaetɨ oasa chegüi jasɨ vae pɨ̈tu yave.

¹⁸ Tumpa chepɨɨ cheayu rupi, jare omotumo cheremimonde ipɨ̈rata yae pe.

¹⁹ Jae chereitɨ tuyuapo pe, ɨvɨkúi ani tanimbu rami.

²⁰ Chetumpa, asapúkai ndeve yave mbaetɨ reendu cheve, ayu nderóvai jare nde mbaetɨ remae cheré.

²¹ Ndepɨapochɨ reyeapo chekotɨ, ndembaepuere pe reiporarauka cheve.

²² Chererajauka ɨvɨtu pe, jare chemboaiuka ɨvɨtuai pe.

²³ Echa che aikuaa ko chereraja mano kotɨ, opaete oikove vae reta yogüɨraja ñogüɨnoia kotɨ.

²⁴ Ërei ngatu, che amborɨ paravete vae, aepɨ osusere oï vae.

²⁵ Aäpiro oiporara vae, aiparareko mbae oata chupe vae.

²⁶ Aäro ikavi vae yave, ou cheve ikavimbae; aäro tembipe, ou cheve pɨtumimbi.

²⁷ Chembopɨanduku aputuumbae, ou oväe cheve ara reta mbɨatɨtɨ pegua.

²⁸ Cherüu aguata, ërei mbaetɨ kuaraɨ cherapɨ güi, opaete vae jovake aiporu yemborɨ.

²⁹ Ayu apɨta aguarayaɨmba rami, yandu reta ïrurä.

³⁰ Chepire opa moroü jare osururu, jare chekägüe jasɨ cherete jaku jeko pegua.

³¹ Arpa reta jare mimbɨ reta iñee, oyepoepɨ cheve yaeo mbɨatɨtɨ pegua pe.