JOB 29 - Biblia Guarani Tumpa Iñee

Job imaendúa oyeroviase vae re

¹ Job jekuae imiari ye.

² ¡Mbae mona aiko ye tenonde yave rupi aiko rami! Tenonde yave rupi Tumpa oyangareko cheré rami.

³ Jae chemboesape yepi jembipe pe, jare che chepuere aguata pɨtumimbi pe.

⁴ Chetaɨrusu yave aikose rami, Tumpa oyangareko chero re.

⁵ Imbaepuere yae ete vae oikose che ndive yave, jare chemichia reta cheɨ́vɨri rupi.

⁶ Chepɨ ñäkɨ yepɨ neche osɨrɨ vae pe, jare asaite jesaɨ yepi cheve ita güi.

⁷ Aë yepi tëta guasu jöke pe aporojäa vaerä, jare oka guasu pe ayapokaviuka cherendarä.

⁸ Taɨrusu reta chereecha yave osɨrɨ chegüi, jare okuakuaa vae reta ñogüɨnoi ipɨ re.

⁹ Mburuvicha reta oñemokïrii, oyeyuruopɨ reta.

¹⁰ Mburuvicha reta mbaetɨ iñeeäta, ikü oya iñäpeku re rami.

¹¹ Jeta vae reta chereecha yave ani oyeapɨsaka cheré yave, chemboyerovia reta jare imiari kavi reta cheré.

¹² Echa che amborɨ yepi paravete vae, oiporu yemborɨ vae, jare tɨ̈reɨ mbaetɨ kia omborɨ vae.

¹³ Osusere oï vae omee iporerekua cheve; jare cheporomborɨ omboyerovia imemano vae reta.

¹⁴ Aiko ayemonde jupi vae pe rami, jare jae cheöva, ñeapevaka jare äka-regua rami cheve isɨmbi aiko vae.

¹⁵ ¡Che aiko jesambae jesarä, jare oguatambae ipɨrä!

¹⁶ ¡Mbae re oata vae reta turä, ketɨgua reta aepɨ vaerä!

¹⁷ Che amopë ipɨapochɨ vae reta jäimbuku, jare jäi güi apɨ̈ro paravete vae.

¹⁸ Jae cheyeupe: “Aikopuku yaeta, chendechi pe ae tamano chero pe.

¹⁹ Ɨvɨra ɨ jembeɨ pe oï vae rami, pɨ̈tu yave ɨsápɨi oa jese vae rami.

²⁰ Cheyemboetea oyembopɨau ye cheré, jare ngaraa oata mɨ̈rata cheve.”

²¹ Opaete oyeapɨsaka cheré vae, jare kïrii ngatu oyeapɨsaka reta cheporomboarakuaa re.

²² Opa yave chemiari mbaetɨ kia iñee omoë, jare cheyemongeta opɨta jese reta.

²³ Cheräro reta ikɨ̈reɨ ngatu reve, araku yave ama okɨta vae oäro vae rami.

²⁴ Apukavɨi yave, ayeapea chererovia reta, jare mbaetɨ ikuérai omae reta cheyerovia katu re.

²⁵ Amae jae reta oyapogüe re, aguapɨ jae reta ndive mburuvicha rami, jare aiko mburuvicha guasu rami jae reta ipɨte pe. Oporombopɨakatu vae rami oyaeo vae reta pe.