JOB 27 - Biblia Guarani Tumpa Iñee

Job imiari jeko pɨ̈chɨi vae reta oiporara vae re.

¹ Job jekuae imiari ye, jei:

² ¡Tumpa jee re jae, opɨ̈ro chegüi anoi tëi vae, Imbaepuere yae ete vae oiporarauka cheve,

³ jae omee ramboeve cheve aikove aiko vaerä,

⁴ ngaraa chemiari ikavimbae re, ngaraa cheapu!

⁵ Aikove aiko ramboeve, ngaraa ayemboekouka. ¡Ngaraa amaeño pe reta chemboeko!

⁶ Jupi aiko vae re ayepɨɨta, ngaraa ayemboeko cheyemongeta pe, opaete ara aikove aiko ramboeve.

⁷ ¡Opaete oyovaicho che ndive vae, toiporara iyoa vae jeko pɨ̈chɨi vae rami!

⁸ ¿Güɨnoita ra mbae ikavigüe ipɨapochɨ vae, Tumpa opɨ̈ro ma jekove chugüi yave?

⁹ ¿Oenduta ra isapúkai Tumpa chupe, ou jese tembiporara guasu yave?

¹⁰ ¿Oyeroviata ra Imbaepuere yae ete vae re? ¿Omboete pɨi pɨita ra?

¹¹ Che toromboe Tumpa imbaepuere re, ngaraa etei añomi ndegüi Imbaepuere yae ete vae regua.

¹² Ërei pe reta opaete ko peecha ma, ¿maera pa pemiariiño?

Zofar:

¹³ Jae kuae tembiporara Tumpa Imbaepuere yae ete vae, oiporaraukata kuimbae ipïrimbae pe jare ipɨapochɨ vae pe.

¹⁴ Taɨ reta jeta oñemuña yave, omano retata ñeraro pe, imichia raɨ reta mbaetɨ jɨ̈vɨata tembíu re.

¹⁵ Jembɨregüe oikoveño vae reta, mbaerasɨ pɨ̈chɨi oyukata, jare imemano vae reta ngaraa oäpiro.

¹⁶ Omboatɨ tëita korepoti ɨvɨkúi rami, jare güɨnoi temimonde jeta rupi,

¹⁷ jókuae temimonde reta omboatɨgüe pe, jupi vae oyemondeta, jare jekombae opɨtata jeko kavimbae ikorepotigüe ndive.

¹⁸ Jeko pɨ̈chɨi vae jo güɨraraitɨ ramiño, tapɨi ko järoa jo ramiño.

¹⁹ Oikokatu vae jaeño ma oyapakuata jupa pe, opüa ye yave, mbaetɨ ma mbae güɨnoi.

²⁰ Ara pe etei opüata jese oporoiämondo vae reta, jare ɨvɨtuai pɨ̈tu yave güɨrajata.

²¹ Ɨvɨtu kuaraɨ oëa kotɨ güi ou vae güɨroveveta, jökorai ama ɨvɨtuai reve vae güɨnoeta jo güi.

²² Tumpa oiporaraukata chupe, jare ngaraa iñɨ̈ro chupe, ikɨ̈reɨ tëita ojoyepe vaerä imbaepuere güi.

²³ Oyepopete retata ikotɨ, jare ñogüɨnoia güi otuvɨñee retata jese.