JOB 20 - Biblia Guarani Tumpa Iñee

Zofar imiari jeko pɨ̈chɨi vae oiporara vae re

¹ Zofar Naamat pegua jei ye Job pe:

² Rere vae chemboyemongeta jare aropɨa guasuä, jáeramo aipota amoë cheñee.

³ Ñee remboeta vae pe rere cheve jasɨ katu vae, ërei che aikuaa kërai jaeta ndeve vae.

⁴ ¿Mbaetɨ pa reikuaa jökorai avei vae? Kuimbae oiko güive ɨvɨ pe:

⁵ Iyoa vae reta iyerovia mbaetɨ ɨma oiko, oyerovia michi peguaño.

⁶ Yepe tëi ara oupitɨ, jare iñäka oupitɨ amapɨtu reta.

⁷ Jepoti rami, opata ko jekuae avei pegua, oecha vae reta jeita: “¿Ketɨ pa oime?”

⁸ Okañɨta mbaɨu ramiño, mbaetɨta kia oväe, ipaɨu pe mbae oecha vae ramiñota.

⁹ Oecha vae, ngaraa ye ma ipuere oecha, ani jëta pegua reta ave, ngaraa ma oecha ye.

¹⁰ Taɨ reta oekata mboroparareko paravete vae reta pe, tu oñomigüe, taɨ reta güeru yeta iya reta pe.

¹¹ Taɨrusu jare oikove katu reve, omano retata.

¹² Ikavimbae ipöra yae chupe, omomora yae imiari pɨpe.

¹³ Iyuru pe güɨreko jókuae omomora vae, mbegüe pe jou güɨreko.

¹⁴ Ërei jaɨkue rupi, jɨe pe, oyepoepɨ chupe mboi imbayachi rami.

¹⁵ Omogüëe mbaeyekou omokoigüe, Tumpa güɨnoe jɨe güi.

¹⁶ Oipɨte oiko mboi imbayachi, jare jókuae mbayachi oyukata ko.

¹⁷ Mbaetɨta oecha ei jare neche ɨ rami osɨrɨ ɨ̈aka rupi vae.

¹⁸ Opaete güɨnoigüe, omboekovia yeta iya reta pe, mbaetɨta oyekou jókuae mbaeyekou re.

¹⁹ Ipogüɨrai oeya paravete vae reta, opɨ̈ro o mbaetɨ jae omopüa vae.

²⁰ Jáeramo, mbaetɨ yangapɨɨ opɨta mbae re, ngaraa vi güɨroasayepe oipota rai vae.

²¹ Mbaetɨ etei mbae ojoyepe chugüi, jáeramo mbaetɨta oiko kavi avei,

²² jeta mbae güɨnoi pɨte pe, mbaetɨta ovɨakatu, jeko pɨ̈chɨi vae reta opüata jese.

²³ Oñemoɨ̈vɨata oï ramboeve, Tumpa oitɨta iyarasɨ jese; iyarasɨ ombouta jese jare jembíu re.

²⁴ Otekuarai tëi tembiporu jiero pegua ñeraro pegua güi yave, uvɨ jiero iyu vae pegua pe oñɨvo retata.

²⁵ Uvɨ oëta ojo ikupe kotɨ, juvɨ jakua jembipe vae oipɨarasa etei. Okɨɨye yaeta.

²⁶ Opaete mbaesusere oñeñovatu oï chupe, Tumpa opata omokañɨ tata pe, omokañɨteita opaete jo pe jembɨregüe.

²⁷ Ara omboyekuaata chupe iyoa, jare ɨvɨ opüata jese.

²⁸ Jo pegua mbaembae reta opata oyereraja, opata oñemoai moai Tumpa iyarasɨ iara pe.

²⁹ Jae ko kuae Tumpa omokätɨro iyoa vae pe vae; chupeguarä jei kuaekuae.