JEREMÍAS 6 - Biblia Guarani Tumpa Iñee

Tovaicho reta oimama Jerusalén

¹ ¡Benjamín iñemuña reta Jerusalén pegua, petekuarai! Pemoñee mimbɨ guasu Tecoa pe, pemoätati ikañɨmaa vaerä Bet-haquerem pe, echa susere yavaetegüe oyekuaa ou ɨvɨtuguasu kotɨ güi.

² Amboaita Sión ikavi yae jare ipöra yae vae,

³ mɨmba iyangarekoa reta yogüeruta chupe reta jɨmba ndive; oyembojeyupa retata iyɨ́vɨri rupi, jare jɨmba ñavo omongaru retata, ñogüɨnoia rupi.

⁴ Tovaicho reta jei: “¡Peyeapo katu ñañoraro vaerä! ¡Pepüa, ñaporepeña Jerusalén re, kuaraɨ ara mbɨte ma yave! Ërei, ¡kaaru yae ma, kuaraɨ oa ma!

⁵ ¡Jayave, pɨ̈tu yave ñapüa jese, yamboai chugüi reta jo ñepɨ̈roka reta!”

⁶ Echa yandeYa Imbaepuere yae ete vae jei körai: “¡Peyasɨa ɨvɨra reta jare pemopüa yeupika, Jerusalén pe peike vaerä! Kuae tëta guasu oiporara vaerä etei ko oï, echa tɨnɨe oï ikavimbae pe.

⁷ Jerusalén güi oë ikavimbae, ɨesaɨ güi ɨ iyapɨmbae oë rami. Ikavimbae jare jupimbae reño oyemongeta reta; aecha avei yombopere reta jare mbaerasɨ reta.

⁸ Jerusalén, eyapo kavi ndereko, echa mbaetɨ yave, asɨrɨta ndegüi, jare ñuurä repɨtata, ɨvɨ ipombae vaerä.”

Oñemoërakua tembiporara

⁹ YandeYa Imbaepuere yae ete vae jei: “Israel iñemuña reta jembɨregüe opaeteita oyeeka, uvarupa iya, opaetei oyevɨka uva re rami.”

¹⁰ Che jae: “¿Kia pa oenduta cheñee, amoërakua yave kuae re? Oyeapete ko oï iyapɨsa reta, cheYa, mbaetɨ ipuere oendu reta, oyóyai yoyaiño ko neñee reta, mbaetɨ oaɨu reta iyeupe.

¹¹ Chearasɨ yae vi ko aï ndearasɨ ramo cheYa, mbaetɨ ma chepuere chepɨaguasu.” YandeYa jei cheve: “Eitɨ chearasɨ michia reta kaye rupigua re, taɨrusu reta yatɨ yatɨ vae re. Toyereraja tembipɨɨrä kuimbae reta jembireko reve reve, ndechi reta jare indechiasɨ vae reta.

¹² Jo reta, iɨvɨ reta, jare jae reta jembireko oñemeeukata ambuae vae reta pe. Echa chepo ko amopüa aiporarauka vaerä kuae ɨvɨ pegua reta pe. Che ndeYa jae kuae.

¹³ Opaete vae, michia güive okuakuaa vae pe, iyeupeguaräño imbaepotarai yae reta, ñeemombeúa reta jare sacerdote reta ave, opaetei oporombotavɨ vae reta ko.

¹⁴ Chembae vae reta ombopɨakatu vaerä jei reta, opaete mbae jaekavi ko oï, mbaetɨ tëi ikavi oï reve.

¹⁵ ¡Jae reta imarata tëi ko kuae oyapogüe re, jókuae che mbaetɨ ma aropɨa vae! Ërei mbaetɨ, ¡mbaetɨ oikuaa imara vaerä kërai ave yepe! Jáeramo, aiporarauka chupe reta yave, ïru reta rami opata oa. Che ndeYa jae kuae.”

Israel oyembopɨapochɨ

¹⁶ YandeYa jei imbae vae reta pe: “Peyemboɨ tape reta rupi jare pemae, peparandu tape reta ñɨma yae vae re, kia nunga tape ra jae ikavi vae; peguata jupi jare peväeta mbutuu peyeupe.” Ërei jae reta jei: “Mbaetɨ, ngaraa roguata jupi.”

¹⁷ YandeYa oñono sundaro reta ɨvate güi omae vae rami vae, jae reta jei vaerä imbae vae reta pe: “Peyeapɨsaka peï mimbɨguasu iñee re.” Ërei chembae vae reta jei: “Ngaraa royeapɨsaka jese.”

¹⁸ Jáeramo yandeYa jei: “Peyeapɨsaka tëtaguasu reta, peikuaa vaerä mbae ra oasata chembae vae reta ndive vae.

¹⁹ Ɨvɨ, eyeapɨsaka: Aruta susere kuae tëta re, iyemongeta kavimbae jeko pegua; echa mbaetɨ oendu reta cheñee, güɨröɨro reta cheporookuai.

²⁰ Judá, ¿maera pa reru cheve ikäti kavi vae incienso Sabá pegua, jare mbae ikäti kavi yae vae matɨ güi? Mbaetɨ ikavi ndeve mɨmba oyeyukagüe opaetei oyeapɨ vae, ani ïru mɨmba oyeyukagüe reta ave mbaetɨ ndembopɨakatu.”

²¹ Jáeramo yandeYa jei: “Ko añono kuae tëta chembae oyepɨaka jare ogüɨapi vaerä. Tu reta jare taɨ reta; jëta-ɨpɨ rupigua reta jare iñeïru reta omanota vi.”

Tovaicho oporepeña ɨvɨtuguasu kotɨ güi vae

²² YandeYa jei: “Ɨvɨtuguasu kotɨgua ɨvɨ güi, oyeapo katu oï ou vaerä metei tëtaguasu imbaepuere yae vae.

²³ Jembiporu reta ñeraro pegua uvɨ jare mii; ipɨa-pïrimbae reta ko jare mbaetɨ etei oporoparareko reta; isapúkai reta ɨguasu jɨapu rami, opo reta yogüeru kavayu re, oïndaivi oñeraro reta vaerä, pe Sión pegua reta ndive.”

²⁴ Jerusalén pegua reta jei: “Roikuaa yave jërakua yae vae reta regua, opa orerëogüe; orepɨatɨtɨ yae jare jasɨ oreve, kuña imembɨrasɨ oï yave vae rami.

²⁵ ¡Agüɨye peë tëta güi ikatu kotɨ, agüɨye vi peguata tape rupi! Echa ¡tovaicho reta jembiporu ñeraro pegua ndive ñogüɨnoi; kɨɨye oime opaete rupi!”

²⁶ ¡Cherëtaɨgua reta, pemonde temimonde mbɨatɨtɨ pegua, peyapayere tanimbu rupi, peyemonde temimonde mbɨatɨtɨ pegua pe jare peyaeo jasɨ katu yae reve, michia jaevaeño vae omano yave oñeäpiro rami; echa oporomokañɨtei vae outa ete ma yandekotɨ!

²⁷ YandeYa jei cheve: “Roñono remae vaerä reiko chembae vae reta re. Emae kavi jese reta, reikuaa kavi vaerä jeko reta.”

²⁸ Opaete jae reta ipɨapochɨ vae reta ko, iñee ndaye reta, opaete oikomegua vae reta ko, jiero jare jiero iyu vae reta rami ko.

²⁹ Tata moendɨka pe oyepeyu tata oyemondɨkui vaerä plomo. Ërei mbaetɨ etei ikavi jókuae, omondɨkui ombokavi vaerä tëi vae pe, echa ikɨa mbaetɨi okañɨ chugüi. Jökorai etei ko tëta chembae vae.

³⁰ Ikavi ko oyembojee “jatɨgüegüe”, echa nde cheYa ko, reröɨro.