JEREMÍAS 48 - Biblia Guarani Tumpa Iñee

Moab maratuta vae regua

¹ YandeYa Imbaepuere yae ete vae Israel iTumpa jei körai Moab regua: “¡Paravete tëta Nebo, echa opa oyemboai oï! ¡Tëta guasu Quiriataim oñepɨ̈ro jare oñemomichi! ¡Iñepɨ̈roa opa oyemboai!

² Moab jërakua yae vae jaema opa. Hesbón pe tovaicho reta oyapo yemongeta, tëtaguasu Moab omboai vaerä. Jökoraiño vi nde Madmena, reyemboaita, ñeraro ngaraa osɨrɨ ndegüi.

³ Horonaim güi täse jasɨ katu reve oyeendu körai: ‘¡Kañɨtei yavaetegüe oväe!’

⁴ Moab oyemboai oï; michia reta jäse jasɨ katu reve vae oyeendu.

⁵ Oyaeo reve oyeupi reta tëta Luhit oï ɨvɨtɨ re vae kotɨ; jäse jasɨ katu reve susere güi vae, tovaicho reta oendu Horonaim yagüeyɨa kotɨ.

⁶ ¡Petekuarai! ¡Peroasayepe perekove! ¡Peiko mburika jesaetegüe rami ñuu pe!

⁷ Moab, reyerovia yae yepi mbaembae renoi vae re, ërei nde vi reñepɨ̈roukata. Netumpa-raanga Quemos oyererajata ïru ɨvɨ pe, isacerdote reta jare mburuvicha reta ndive.

⁸ Kañɨtei outa tëta guasu ñavo re, metei ave ngaraa oasayepe; ɨvɨtɨ päu ipe kavi vae jare ɨvɨpe kavi oyemboaita vi. Che ndeYa ko jae kuae.

⁹ Pemee Moab ipeporä, oveve vaerä ojo, echa okañɨteita; jëta guasu reta ipombae opɨtata, jare mbaetɨ eteita kia oiko pɨpe.”

¹⁰ (¡Tijeko jókuae ipɨakatumbae reve oyapo yandeYa iparavɨkɨ vae! ¡Tijeko jókuae ñäteɨ oparapiti vae!)

¹¹ Tëta Moab oyeapo ramo güive oiko pɨagüive, mbaetɨi oyereraja tembipɨɨrä ïkotɨa. Jae ko, vino oguapɨ kavi jɨru pe vae mbaetɨi oyekuavo jɨru güi ïru jɨru pe vae rami, jáeramo mbaetɨ okañɨ chugüi jëe ngatu vae.

¹² Ërei yandeYa jei: “Oväeta ara ambou vaerä jókuae vino oikuavo reta vaerä ïru jɨru pe; jare jókuae jɨru mɨmbapire pegua oyekuavo chugüi vae opa vaerä ombojaɨ jaɨ.

¹³ Jayave Moab imarata itumpa-raanga Quemos jeko pegua, Israel iñemuña reta imara Bet-el re oyerovia tëi yave vae rami.

¹⁴ Moab agüɨye tei: ‘Orerëia yae ko, ore ko ñeraro regua imbaepuere yae vae.’

¹⁵ Oväe ma Moab imboaia jare jëta guasu reta imboaia; itaɨrusu reta ikavigüe opata omano. Jökorai jei Mburuvicha guasu, jae ko jee yandeYa Imbaepuere yae ete vae.

¹⁶ Moab oyemboai vaerä köi yae ma, isusere iväea oyearo yae ma.

¹⁷ Moab iyɨvɨrigua tëta reta, jare opaete jërakua yae vae re oikuaa vae reta, peyaeo jese jare, pere: ‘¡Mase, kërai opɨta imbaepuere tuicha yae vae jare iyemboetea yae vae!’

¹⁸ Tëta guasu Dibón, egüeyɨ nderenda yemboetea pegua güi, eguapɨ ɨvɨ re, echa Moab imboaia oporepeña ndekotɨ, omboai vaerä ndegüi nekësea.

¹⁹ Tëta guasu Aroer pegua reta, peyemboɨ tape jembeɨ pe jare pemae; peparandu otekuaraigüe pe, mbae ra oasa oï vae re.

²⁰ Ñemomarai pe oï Moab jare mbɨatɨtɨ tuichagüe pe. ¡Peyaeo jasɨ katu reve jese! ¡Pemoërakua ɨ̈aka Arnón pe Moab oyemboai oï vae re!”

²¹ Oväe morojäa oñemoërakua tëta guasu reta ɨvɨpe kavi rupigua reta kotɨ vae: Jae ko Holón, Jahaza, Mefaat,

²² Dibón, Nebo, Bet-diblataim,

²³ Quiriataim, Bet-gamul, Bet-meón,

²⁴ Queriot, Bosra jare opaete tëta guasu reta Moab pegua, köiño oï vae reta re jare mombɨrɨ oï vae reta re.

²⁵ YandeYa jei: “Moab imbaepuere oyeasɨa, jare iyɨva oñemopë.”

²⁶ Pembosavaɨpo Moab, echa oyembopɨapochɨ yandeYa kotɨ. Jayave Moab oyapayereta igüëegüe pe, jare opaete opukata jese vae.

²⁷ Moab, ¿reyóyai yoyaiä pa ko Israel yepi, jare nemiari jese reröɨro reve, metei imonda vae re rami?

²⁸ Moab pegua reta, peeya tëta guasu reta; pekua ɨ̈vavira kotɨ, jare joko pe peiko, pɨkasu oyembojaitɨ ɨ̈vavira ipäu vae rupi rami.

²⁹ Yaikuaa katu Moab iyembotuicha; ipɨarai, ipɨayemboete jare ipɨapochɨ.

³⁰ YandeYa oikuaa vi Moab iyarasɨ katu yae vae, iñee añetegüe nunga vae, ërei mbaetɨ etei mbaerä ikavi chupe.

³¹ Jáeramo jasɨ katu reve aäpirota jare chepɨatɨtɨta, opaete tëta Moab pegua reta re, jare Kir-hares pegua reta re.

³² Uvarupa Sibma pegua, roäpirota vi, oasa ete yeta Jazer oñeäpiro vae güi. Nderembo reta oasa ye yepi ɨguasu, ojoi oväe Jazer pe. Ërei añave uva reipoose vae oyemboai opɨta.

³³ Mbaetɨ ma oyeendu sapúkai yerovia pegua Moab pegua kó kavi reta rupi. Vino opa jɨru pe. Mbaetɨ ma uva itɨamía, mbaetɨ ma tairari yerovia pegua.

³⁴ Hesbón pegua reta omoäse jasɨ katu vae, jare jäse oyeendu Eleale jare Jahaza pe, jare Zoar güi Horonaim, guakiya mboapɨ año vae rami, echa ɨesaɨ Nimrim pegua ave opa tɨpa.

³⁵ YandeYa jei: “Che amboaita Moab pegua reta, mbaemboete renda reta ɨvɨtɨ rupigua re omee mɨmba oyeyukagüe vae reta, jare oapɨ ikäti kavi vae incienso vae reta.”

³⁶ Jáeramo chepɨatɨtɨ Moab re, jare opaete Kir-hares pegua reta re, mimbɨñee mano pegua rami, echa imbaeyekou reta opa okañɨtei.

³⁷ Opaetei ia jare jendɨvaa oñapi reta; opaete oyembopere ipo reta rupi, jare oyemonde reta temimonde mbɨatɨtɨ pegua pe.

³⁸ “Opaete o Moab pegua iárambo rupi, jare opaete ikaye rupi oyeendu yaeo katuaiño; echa che ayoka Moab ɨ jɨru ikavimbae oyeyoka rami. Che ndeYa ko jae kuae.”

³⁹ ¡Pepɨatɨtɨ yae Moab re! ¡Kërai opa oyemboai oï! ¡Ikupeño omee jare imara yae! Moab iyemboai opɨta kɨɨyearä jare omae kaviä vaerä jese, opaete iyɨ́vɨri rupigua reta peguarä.

⁴⁰ YandeYa jei körai: “Moab jovaicho oporepeña ikotɨ, güɨraké ipepo oipɨso kavi oporepeña rami.

⁴¹ Tëta guasu reta jare ñepɨ̈roa reta opata oa jovaicho reta ipo pe. Jókuae ara jëia vae reta Moab pegua, orɨrɨita kuña imembɨ oa oï vae rami.

⁴² Moab mbaetɨta ma oiko tëtaguasu, echa oyembopɨapochɨ chekotɨ.

⁴³ Jáeramo, kɨɨye, ɨvɨkua jare ñuai okätɨro oï nderé. Che ndeYa ko jae kuae.

⁴⁴ Okɨɨye güi otekuarai vae, oata ɨvɨkua pe, jare ɨvɨkua güi oë tëigüe, oata ñuai pe, echa che aruta Moab re tembiporara. Che ndeYa ko jae kuae.

⁴⁵ Amogüe reta otekuarai tëi ipuerembae reve, oeka oñepɨ̈ro vaerä tëta guasu Hesbón pe; ërei Hesbón, mburuvicha guasu Sehón jëta jendɨ oï, jare tata oñemoai oapɨ ɨvɨtɨ Moab pegua, jovaicho pota yae vae reta.

⁴⁶ ¡Ndeparavete, nde Moab! ¡Quemos jëta, opa rekañɨtei! ¡Nderaɨ reta jare nderayɨ reta opa oyereraja tembipɨɨrä!

⁴⁷ Ërei metei ara, Moab aru yeta kuri iɨvɨ pe tembipɨɨrä oikoa güi. Che ndeYa ko jae kuae.” Jae kuae Tumpa iporojäa oiko vaerä Moab ndive.