JEREMÍAS 46 - Biblia Guarani Tumpa Iñee

Egipto maratuta vae regua

¹ YandeYa imiari ñeemombeúa Jeremías pe tëtaguasu reta regua.

² Kuae jae ñee reta Egipto regua, jae ko Faraón Necao mburuvicha guasu Egipto pegua isundaro reta regua; oï yave ɨ̈aka Éufrates jembeɨ pe, Carquemis pe; Nabucodonosor, mburuvicha guasu Babilonia pegua omoamɨri vae; Joacim, Josías taɨ irundɨa año ma oiko mburuvicha guasurä Judá pe yave:

³ “¡Peyapo kavi yeopiaka reta! ¡Jare pekua ñeraroa pe!

⁴ ¡Peyokua kavayu reta! ¡Kavayu regua reta, pepo jese! ¡Peñono äka-regua peäka re jare peñesɨro! ¡Pemboakuarovi mii reta! ¡Pemonde perete regua temimonde ñeraro pegua!

⁵ Ërei ¿mbae pa ko aecha? Oyerova ye reta okɨɨye yae reve. Jëia yae vae reta iñamɨri jare opa oñemoai moai; oë osɨi reta, oyerovambae etei omae jaɨkue kotɨ. ¡Oime kɨɨye opaete rupi! Che ndeYa ko jae kuae.

⁶ ¡Mbaetɨ ipuere otekuarai iñäkua yae vae reta, ani oasayepe jëia yae vae reta ave! Ɨvɨtuguasu kotɨ, ɨ̈aka Éufrates jembeɨ pe ipɨ̈sa-yeyuka jare oyepɨaka reta.

⁷ ¿Kia pa jókuae okuakuaa ɨ ɨ̈aka Nilo pe rami vae, ɨ täta yae oguata rami vae?

⁸ Jae ko Egipto, ɨ okuakuaa ɨ̈aka Nilo pe rami, ɨ täta yae oguata rami vae. Egipto jei: ‘Akuakuaata, javoi añovata ɨvɨ, opata amboai tëta guasu reta jare pɨpe yogüɨreko vae.’

⁹ ¡Kavayu regua reta toë tenonde! ¡Toë vi käretou ñeraro pegua reta! ¡Ñeraro regua reta tomboɨpɨ vi toguata; sundaro reta Etiopíaɨgua jare Put pegua reta, iyeopiaka reve reve; sundaro reta Lud pegua reta oikatu yae uvɨ ojäa vae!

¹⁰ Jae ko kuae yandeYa Imbaepuere yae ete vae iporojäa iara, jae ko ara oiporarauka vaerä oyovaicho ikotɨ vae reta pe, kɨsepuku oporoyukata yangapɨɨ regua, tugüɨ pe oyembosavaɨpo regua. Echa yandeYa Imbaepuere yae ete vae etei ko oporoyukaukata Ɨvɨtuguasu kotɨgua tëtaguasu pe, ɨ̈aka Éufrates jembeɨ pe.

¹¹ ¡Egipto, ekua Galaad pe eeka moa! ¡Yepe tëi jeta moa reiporu, mbaetɨ eteita ikavi ndeve, echa mbaetɨ moa ndeveguarä!

¹² Tëtaguasu reta oikuaa ma reñemoamɨriuka vae, jare opaete ɨvɨ rupi oyeendu neräse; echa jëia yae vae reta oa oyoe, jare oyoitɨ reta ɨvɨ rupi.”

Nabucodonosor oporepeña Egipto re

¹³ YandeYa jei ñeemombeúa Jeremías pe, kërai Nabucodonosor mburuvicha guasu Babilonia pegua oporepeñata Egipto re. Jei:

¹⁴ “Emoërakua Egipto pe; jae ko Migdol pe, Menfis pe jare Tafnes pe: ‘¡Pemae ngatu, peï kavi peï! ¡Echa tovaicho reta oyere, omboai vaerä peɨvɨ!’

¹⁵ ¿Maera pa oa toro iä pemboete vae? Mbaetɨ ipuere oyemboɨ, echa che, peYa ko aitɨ.

¹⁶ Ndesundaro reta ipɨ̈sa-yeyuka jare oyepɨaka reta, jare jei reta oyoupe: ‘¡Yaja kuae güi, yaja ye yandeɨvɨ pe, jókuae ɨvɨ yaa pɨpea pe! ¡Yatekuarai ñeraro yavaetegüe güi!’

¹⁷ Peero Faraón mburuvicha guasu Egipto pegua körai: ‘Iñeegüeño, ërei mbaetɨ mbae ipuere oyapo.’

¹⁸ Cheyé aeño arökuavee, jei Mburuvicha guasu yandeYa Imbaepuere yae ete, jee vae. Ɨvɨtɨ guasu Tabor tuicha yae ïru ɨvɨtɨ reta güi rami, jare ɨvɨtɨ guasu Carmelo ɨvate ɨguasu güi rami, jökorai jókuae tovaicho outa vae.

¹⁹ Egipto pegua reta, peyupavo peyererajauka tembipɨɨrä, echa Menfis oyepoepɨta tëtagüerä, mbaetɨta kia oiko pɨpe.

²⁰ Egipto guaka taɨrusu ipöra yae rami vae, ërei ɨvɨtuguasu kotɨ güi ou chupe oporomokañɨtei vae.

²¹ Sundaro reta omboepɨ güeru imborɨarä vae, toro taɨrusu oyemongɨragüe rami vi ipɨte pe, ërei jae reta vi oë otekuarai, mbaetɨ ipuere oyeepɨ, echa oväe ma isusere iara, jare oiporara vaerä iara.

²² Egipto otekuarai yave, mboi iñee ramita jäse; echa oporepeñata jese tovaicho reta yɨɨ ndive, yepea iyapoa reta rami.

²³ ¡Oyasɨa retata kaa tëɨ yae vae rami! Jei yandeYa. Echa jeta yaeta tuku reta güi, mbaetɨ kia ipuere oipapa.

²⁴ Egipto oñemomaraiukata, oata ɨvɨtuguasu kotɨgua reta ipo pe.”

²⁵ YandeYa Imbaepuere yae ete vae Israel iTumpa jei: “Amboaita Amón, Tebas itumpa jare Egipto itumpa-raanga reta, aiporaraukata Egipto pe, jare juvicha guasu reta pe; aiporaraukata Faraón pe jare güɨrovia katu jese vae reta pe.

²⁶ Ameeta jovaicho ipɨarai vae reta ipo pe, jae ko Nabucodonosor mburuvicha guasu Babilonia pegua jare isundaro reta pe. Ërei oväeta ara oï kavi ye vaerä Egipto, tenonde rupi yave rami. Che ndeYa ko jae kuae.

YandeYa güɨroasayepeta imbae vae reta

²⁷ Cherembiokuai Jacob agüɨye ekɨɨye; agüɨye ekɨɨye Israel. Echa nde jare neñemuña reta poyorata jókuae ɨvɨ mombɨrɨ peyererajaukaa güi. Peyu yeta peiko mbɨakatu pe, peiko pɨagüiveta, ngaraa kia pemongɨɨye.

²⁸ Che peYa jae: Cherembiokuai Jacob agüɨye ekɨɨye, echa che ko aï nde ndive. Amokañɨteita opaete tëtaguasu reta jókuae opa romoai moai jupi vae. Ërei nde mbaetɨta romokañɨtei opaetei, jaeño ronupata ndereko oï rupi, ngaraa roeya reiporarambae.”