JEREMÍAS 11 - Biblia Guarani Tumpa Iñee

Morogüɨrökuavee päve oyemboetembae vae regua

¹ YandeYa jei che Jeremías pe, körai:

² “Israel iñemuña reta toyeapɨsaka kuae morogüɨrökuavee päve pegua ñee reta jei vae re. Nemiari ɨvɨ Judá pegua reta pe jare Jerusalén pe yogüɨreko vae reta pe,

³ ere chupe reta: YandeYa, Israel iTumpa jei: ‘Tijeko topɨta jókuae morogüɨrökuavee päve pegua ñee reta mbaetɨ omboete vae.

⁴ Jae ko jókuae morogüɨrökuavee päve ayapo peñemuñagüe reta ndive vae, anoe reta yave Egipto güi, jókuae horno jiero oyemondɨkui pɨpe rami chupe reta vae güi. Jae chupe reta: Peendu cheñee reta, jare peyapo cheporookuai. Jayave peikota chembaerä jare che aikota peTumparä.

⁵ Jökorai, che ambopota morogüɨrökuavee päve ayapo peñemuñagüe reta ndive vae, amee vaerä peve ɨvɨ kavi yae añave penoi vae.’ ” Jare che jae: “Añete ko cheYa.”

⁶ Jayave yandeYa jei cheve: “Emoërakua opaete kuae ñee tëta guasu reta Judá pegua pe jare kaye Jerusalén pegua rupi, körai: ‘Peyeapɨsaka morogüɨrökuavee päve pegua ñee reta jei vae re jare peyapo.

⁷ Peñemuñagüe reta anoe Egipto güi rupive, amombeu kavi voi chupe reta oendu katu vaerä che jae vae; jayave güive añave regua, jekuae avei amombeu chupe reta oendu vaerä che jae vae.

⁸ Ërei mbaetɨ oyeapɨsaka ani oyapo reta che jaegüe, oyapo reta ipɨa jemimbotaño. Mbaetɨ oipota oyapo reta che jae vae ramo, ambou chupe reta tembiporara reta kuae morogüɨrökuavee päve pe oyekuatía oï vae.’ ”

⁹ YandeYa jei ye cheve: “Judá pegua reta jare Jerusalén pe yogüɨreko vae oyembopɨa pochɨ reta chekotɨ.

¹⁰ Iyoa reta iñemuñagüe reta iyoa rami, echa jae reta mbaetɨ oipota oyeapɨsaka cheñee reta re, omboete reta tumpa-raanga reta. Judá jare Israel mbaetɨ omboete morogüɨrökuavee päve ayapo iñemuñagüe reta ndive vae.

¹¹ Jáeramo aruta chupe reta susere mbaetɨta ipuere otekuarai chugüi vae. Yepe tëi täta jäse reve oeka cheve yemborɨ, ngaraa aendu chupe reta. Che ndeYa jae kuae.

¹² Jayave Judá pegua jare Jerusalén pe yogüɨreko vae yogüɨrajata oiporu yemborɨ tumpa-raanga reta pe, jókuae oapɨ ikäti kavi vae incienso chupe reta vae pe. Ërei jae reta ngaraa ipuere oepɨ reta susere iara pe.

¹³ Echa nde Judá, jeta yae tumpa-raanga renoi, tëta guasu reta jeta yae renoi rami; jare Jerusalén ikaye jeta yae rami, pemopüa jeta mbota renda Baal peguarä, peapɨ vaerä chupe ikäti kavi vae incienso.

¹⁴ Nde, Jeremías, agüɨye eyerure kuae tëta re, agüɨye eyerure chemoñera reve ikotɨ reta; echa ngaraa aendu chupe reta jäse reve oeka cheve yemborɨ isusere iara pe yave.

¹⁵ Nde Israel che roaɨu vae, ¿mbae pa reeka chero pe, ikavimbae yae vae jeta ma reyapo güire? ¿Reyemongeta pa, remee cheve mbaekɨra jare soo oyeapɨ vaerä vae rupi reasayepeta susere güi? ¿Jókuae re pa reyemboete?

¹⁶ Ïrugüe ara rupi che peYa, poenɨise olivo jokɨ katu, jare ipöra ia pe oyekuaa vae; ërei añave jɨapu yae reve opata aapɨ nderoo reta jare neräka reta aakɨota.

¹⁷ Echa che, peYa Imbaepuere yae ete vae, poñotɨ temitɨ rami vae ko amombeu kuae susere Judá jare Jerusalén kotɨ, ikavimbae yae vae peyapo jeko pegua chemboarasɨuka, echa peapɨ ikäti kavi vae incienso Baal pe.”

Oipota oyuka reta Jeremías vae regua

¹⁸ YandeYa oikuaauka cheve tovaicho reta oyemongeta chekotɨ vae. Jae chemomae aikuaa vaerä.

¹⁹ Che aiko, metei vecha kuimbae taɨrusu vae oyereraja mbaeyukaa pe rami, aikuaambae reve oime ko oyemongeta pɨ̈chɨi reta chekotɨ vae. Jei reta chekotɨ: “Yayasɨa ɨvɨra ia kavi oï añave vae, yayasɨa kuae ɨvɨ güi, oikove vae reta ipɨte güi, agüɨye vaerä mo kia imaendúa jese.”

²⁰ Ërei nde, cheYa Imbaepuere yae ete vae, jupi rupi oporojäa vae; nde reikuaa opaete kuimbae reta iyemongeta vae. Emaeño taecha, kërai reiporarauka chupe reta vae, echa ndepo pe che añeñono.

²¹ Jare Anatot pegua kuimbae reta oeka kërai cheyuka vaerä, cheokuai reta agüɨye mo vaerä chemiari Tumpa jee re, echa mbaetɨ yave cheyuka retata,

²² yandeYa Imbaepuere yae ete vae jei ikotɨ reta: “Aiporaraukata chupe reta: Taɨrusu vae reta omanota ñeraroa pe, imichia reta opata jovaruru.

²³ Mbaetɨ eteita opɨta chugüi reta metei ave, echa oväe ara aru vaerä Anatot pegua reta re mbaesusere, oiporara yae reta vaerä.”