ISAÍAS 9 - Biblia Guarani Tumpa Iñee

Mesías oa jare mburuvicha guasurä oï vae regua

¹ Ërei ngatu ngaraa pɨtumimbi avei oiko, mbɨatɨtɨ pe añave ñogüɨnoi vae reta pe, jókuae mbɨatɨtɨ ou tenonde ete yave Zabulón jare Neftalí iɨvɨ pe rami vae; ërei metei ara outa tembipe, opaeteita tɨnɨe tape ɨguasu kotɨ ojo vae, Jordán jovaicho kotɨ Galilea pe, Judaɨguambae vae reta jëta pe.

² Tëta pɨtumimbi pe oguatase vae oecha tembipe tuicha yae vae; mano ipo pe yogüɨrekose vae reta re, tembipe oesape.

³ Rembojeta kuimbae reta jare remoïru yerovia. Oyerovia retata nderóvai, mbaarɨvo iara pe oyerovia reta rami, ani ñeraroa pe opɨ̈rogüe omboyao yave oyerovia reta rami.

⁴ Echa nde reyora tembipɨɨ oiporara ñogüɨnoi vae güi, mburuvicha iporonupa güi, mburuvicha imbaepuere güi, Reiporarauka chupe, tëtaguasu Madián pe reiporarauka rami.

⁵ Echa opaete pɨapaa sundaro güɨraja ñeraroa pe vae, jare opaete temimonde tugüɨ oya jese vae, opata oyeapɨ, kapii oyeapɨ tata pe rami.

⁶ Echa metei michia oa yandeve, taɨ omee yandeve, jae mburuvicha ko; jare jeeta Oporombopɨakañɨ vae, Oporomboarakuaa vae, Tumpa Imbaepuere yae vae, cheRu oiko avei vae, mburuvicha mbɨakatu pegua.

⁷ Iporookuaía tuicha yaeta, jare mbɨakatu mbaetɨta opa David iguapɨa re jare iporookuaía re, oñono kavita ñejäa jupi rupi, jare isɨmbi rupi añave güive oiko avei vaerä. YandeYa imbaepuere yae vae jägüɨro rupi oyapota kuae.

YandeYa iyarasɨ tëta Israel kotɨ

⁸ YandeYa ombou ñee tëtaguasu Israel pe, Jacob iñemuña reta pe;

⁹ jare oikuaata ɨvɨ Efraín pegua reta, Samaria pe yogüɨreko vae reta. Jare jei retata ipɨayemboete reve:

¹⁰ “Ladrillo pe oñemopüa vae opa osururu, ërei añave ñamopüa yeta ita oñeopagüe pegua pe, ɨvɨra ɨvaviyu pegua opa oyasɨa reta, ërei añave ñamopüa yeta ɨ̈vɨrare pegua.”

¹¹ Ërei yandeYa ombouta chupe Rezín jovaicho reta; jae etei oyókuai oporepeña reta vaerä jese.

¹² Kuaraɨ oëa kotɨ güi Siriaɨgua reta, kuaraɨ oikea kotɨ güi filisteo reta. Metei jeia pe opa voi omokañɨtei reta Israel. Ërei yandeYa mbaetɨ iyarasɨ poi; jekuaeñoi iyarasɨ oï.

¹³ Ërei kuae tëta mbaetɨ oyerova inupaa kotɨ; mbaetɨ oeka reta yandeYa Imbaepuere yae ete vae.

¹⁴ Jáeramo, yandeYa oyasɨata tëtaguasu Israel iñäka jare juguai, kia nunga vae oyasɨa mɨmba iñäka jare juguai rami, ani kia nunga vae oyasɨa karandaɨ ani käipepe metei ara peño rami.

¹⁵ (Iñäka ombojaanga ko tenondegua reta jare mburuvicha reta re, juguai ombojaanga ko ñeemombeúa reta oporomboe apu re vae reta re.)

¹⁶ Echa mburuvicha kuae tëta pegua reta oporombotavɨ vae reta ko, jare opaete vae reta opa ombojopa.

¹⁷ Jáeramo, yandeYa mbaetɨ ipɨakatu taɨrusu vae reta re, mbaetɨ oiparareko omae tɨ̈reɨ reta re jare imemano vae reta re. Echa opaete vae jupiä jare ikaviä jeko reta, opaete vae jei oipotagüeño. Ërei yandeYa mbaetɨ iyarasɨ poi; jekuaeñoi iyarasɨ oï.

¹⁸ Echa ikavimbae omboɨpɨ jendɨ tata rami, tata yavaete jendɨ vae oapɨ opaete yuu reta jare ñana reta, javoi oasa ɨvɨra ɨvate tëɨ vae reta re, jare ɨvate oñemokusumirou jätati.

¹⁹ YandeYa Imbaepuere yae ete vae iyarasɨ rupi ko opa ókai kuae tëta, opata oyeapɨ, kapii opa oyeapɨ rami; kuimbae ngaraa oiparareko jëtara.

²⁰ Metei ñavo opɨ̈rota iyakatu kotɨ güi, ërei yɨmbɨaɨta opɨta; metei ñavo mbaetɨta oiparareko jëtara, mbaetɨta yangapɨɨ. Metei ñavo opɨ̈rota taɨ ae güi.

²¹ Manasés opüata Efraín re, Efraín opüata Manasés re; kuae reta mókoi reve oñemopüata ɨvɨ Judá re. Ërei yandeYa mbaetɨ iyarasɨ poi; jekuaeñoi iyarasɨ oï.