ISAÍAS 42 - Biblia Guarani Tumpa Iñee

YandeYa jembiokuai

¹ “Mase, ko oï cherembiokuai, che ayangarekota jese vae; cherembiparavo, chepɨa oyerovia jese vae; jese añono cheEspíritu; jae güeruta jupi vae opaete tëtaguasu reta peguarä.

² Ngaraa osapúkai, jare ngaraa iñeeäta, ngaraa ave iñee oenduka kaye rupi,

³ ngaraa omopë täkuarasɨ oyekagüe, jare ngaraa ombogüe mechero ogüeta ma oï vae; añete vae rupi güeruta jupi vae.

⁴ Ngaraa ikangɨ jare ipɨtu, oñono regua jupi vae opaete kuae ɨvɨ pe; jare tëtaguasu reta ɨguasu jembeɨ rupigua reta oärota mborookuai jae omeeta vae.”

⁵ Körai jei yandeYa Tumpa, ara Iyapoa, jae oyapo ara; jae oyapo ɨvɨ jare mbaembae oñemuña pɨpe vae; jae omee ɨvɨ ipo reta pe ipɨ̈túe vaerä, jare tekove, ɨvɨ iárambo yogüɨreko vae reta pe vae:

⁶ “Che ndeYa ko roenɨi jupi vae peguarä, jare ropokota rogüɨroata; roñovatuta jare ayapota nderupi morogüɨrökuavee päve opaete vae reta peguarä, jare tembipe rami tëtaguasu reta pe.

⁷ Reipea vaerä jesambae reta jesa, renoe vaerä tembipɨɨ reta tembipɨɨrɨru güi, jare tembipɨɨrɨru pɨtumimbi vae pe yogüɨreko vae reta.

⁸ Che ko ndeYa, kuae ko jae cheree; ïru vae pe ngaraa amee cheyemboetea, jare tumpa-raanga reta pe ave ngaraa amee cheyemboetea.

⁹ Mase, kërai oyembopo opaete mbaembae amoërakua iyɨpɨ güive voi vae, jare añave amoërakua ye mbae ipɨau vae, amombeu peve ndei oyekuaa mbove.”

Tairari mbaemboete pegua Tumpa iporoepɨ re

¹⁰ Petairari yandeYa pe tairari ipɨau vae, pemboete, opaete ɨvɨ pegua reta; ɨguasu rupi peguata vae reta, jare ɨguasu ipo reta, ɨguasu jembeɨ reta jare opaete pɨpegua reta.

¹¹ Toyerovia ñuu reta jare pɨpegua tëta guasu reta, Cedar iñemuña reta jëta raɨ raɨ rupi. Totairari Sela pegua reta oyerovia güi, tosapúkai reta ɨvɨtɨ reta iyapɨte güi.

¹² Tomee reta mbaemboete yandeYa pe, tomoërakua reta mbaemboete chupe oñemee vae, tëtaguasu reta ɨguasu jembeɨ rupigua rupi.

¹³ YandeYa oëta, metei jëia yae ñeraro regua vae rami, jare oñerarota, ñeraro regua yavaetegüe rami; osapúkai pukaita jare omoamɨrita jovaicho reta.

¹⁴ YandeYa jei: “Arakae, iyɨpɨ güive chekïrii mbaetɨ mbae jae jare ayembopɨaguasu; ërei añave cheräseta, metei kuña imembɨrasɨ oï vae rami, chepüae jare chepɨ̈tupa potaecha.

¹⁵ Opata amboai ɨvɨtɨ jare ɨvɨtɨ guasu, opata amombiru ñana reta jokoropigua; opata ɨ̈aka reta jare ɨupa reta amondɨpa.

¹⁶ Jesambae reta arajata tape, jae reta oikuaambaea rupi, jae reta japerä rupi pɨtumimbi amoembipeta, tape pɨ̈chɨi vae ambokavita. Kuaekuae, ayapota chupe reta, mbaetɨta aeya reta jae aeño.

¹⁷ Tumpa-raanga reta re güɨrovia vae reta, mbae iä reta re güɨrovia vae reta, mbae iä reta re oñemotumpa vae reta, imara yaeta opa oyerova reta.”

Israel iñemuña reta iñeereenduä

¹⁸ “Iyapɨsambae reta, peendu, jesambae reta, pemae peecha vaerä.

¹⁹ Mbaetɨi kia jesaä jare iyapɨsaä mbatee cherembiokuai cheremimondo rami vae, mbaetɨi kia jesaä jare iyapɨsaä mbatee cherembiparavo cherembiokuai rami vae.

²⁰ Echa oecha tëi jeta mbaembae, ërei mbaetɨ mbae jei; oendu tëi, ërei mbaetɨ oendu vae ramiño.

²¹ YandeYa oyerovia jupi vae oaɨu yae jeko pegua, jáeramo ombotuicha yae iporookuai reta, imboetea yae vaerä;

²² ërei kuae tëta güi jeta mbae oñemaepɨ̈ro, opaetei oyepɨɨ reta oñeñono tembipɨɨrä ɨvɨkua pe, opa oyokenda oñono tembipɨɨrɨru rupi; oyemombae jese reta, mbaetɨ kia oyora vaerä; opa oipɨɨ güɨraja reta, mbaetɨ kia oñemoë jese reta vaerä.”

²³ ¿Ërei, kia pa pegüi reta oenduta kuae? ¿Kia pa oenduta oï kuae mbaembae oasata vae regua?

²⁴ ¿Kia pa omee Israel, Jacob iñemuña reta, oñepɨ̈rouka jare oyepɨɨuka vaerä? YandeYa ko oyapo jókuae, yandeYa yandeyoa ikotɨ vae; mbaetɨ peipota peguata jae jeia rupi, mbaetɨ peipota peyapo iporookuai reta.

²⁵ Jáeramo ko oitɨ iyarasɨ jese reta ñeraro yavaetegüe rupi, opa oapɨ rami opɨta reta, ërei jeseve mbaetɨ oipota reta oendu.