ISAÍAS 38 - Biblia Guarani Tumpa Iñee

Ezequías imbaerasɨ jare iñepoano

¹ Jókuae ara rupi mburuvicha guasu Ezequías imbaerasɨ pɨ̈chɨi yae, oyuka vaerä güɨnoi. Jare ñeemombeúa Isaías, Amoz taɨ ou ípɨri, jare jei chupe: —YandeYa jei körai: “Emboarakuaa kavi neñemuña reta, echa remanota, mbaetɨta ma rekuera.”

² Jayave Ezequías oyerova ovapetea kotɨ jare oyerure Tumpa pe, körai:

³ “Romoñera cheYa, nemaendúa vaerä jupi rupi jare añetete rupi ayeokuai ndeve vae re, jare ayapo ndepɨa jemimbotaño.” Jare oyaeo ipɨatɨtɨ yae reve.

⁴ Jayave yandeYa jei Isaías pe

⁵ ojo vaerä jei Ezequías pe: “Neñemuñagüe David iTumpa jei körai: ‘Aendu ndeyerure, aecha nderesaɨ. Ameeta ndeve quince año reiko ye vaerä.

⁶ Roepɨta jare aroasayepeta Jerusalén mburuvicha guasu Asiria pegua ipo güi. Aepɨta kuae tëta guasu.’ ”

⁷ Jayave Isaías jei chupe: —Kuae rupi reikuaata añetete ko yandeYa ombopota jeigüe vae:

⁸ Acaz iora pe, payandepo ma osɨrɨ tëi küaraɨa kuae ara vae omboɨpɨ pɨau yeta. Jare jökorai jókuae payandepo ma osɨrɨ tëi küaraɨa jókuae ara vae, omboɨpɨ pɨau ye.

⁹ Jare mburuvicha guasu Ezequías okuera ma imbaerasɨ yave, oikuatía kuae tairari:

¹⁰ Che ayemongeta tëi körai: Ndei chendechi mbove ou mano cheve, aja vaerä omanogüe ñogüɨnoia pe, jekuae avei pegua.

¹¹ Che jae: Mbaetɨ yeta ma aecha cheYa, mbaetɨ yeta ma aecha cheYa kuae ɨvɨ pe, mbaetɨ yeta ma aecha kuae ɨvɨ pegua reta.

¹² Cherete opa oyemboai, o oyemboai rami, metei vecha iyangarekoa jo oyemboai rami. Ombaapo vae jembiapo opa ma yave oyasɨa rami, mbaerasɨ oyasɨa cherekove metei ara pe.

¹³ Chereroköe chemoäse mbaerasɨ, yaguapope oakɨo chekägüe oï rami. Ara pe jare pɨ̈tu yave oiporarauka cheve.

¹⁴ Cheräse ärakua jare tapérai rami, ani pɨkasu rami. Cheköe amae ara kotɨ. ¡CheYa, aiporara aï, chemborɨ!

¹⁵ ¿Mbae pa jaeta oyapogüe re? Omombeu cheve vae etei ko, oyapo cheve kuae. Aiporara reve, tañemomichi taiko, aikove aiko ramboeve.

¹⁶ Oikoveta opaete jókuae yandeYa oyangareko jese vae reta, jae reta ndive aikoveta che. Nde ko chembogüera ye, remee aiko ye vaerä.

¹⁷ Chepɨagüive kavi aiko pe ou cheve mbɨatɨtɨ tuichagüe vae, ërei nde reyemoambeko cherenoe vaerä mano güi, echa neɨ̈ro cheve opaete cheyoa reta re.

¹⁸ Tɨvɨa pe ñogüɨnoi vae reta mbaetɨ ko ipuere ndemboete, omanogüe reta ndemboete rapeä ko, tɨvɨa pe oñeñonogüe reta mbaetɨ ko ipuere oyeko nderé.

¹⁹ Oikove vae retaño ko ipuere ndemboete, che añave ayapo aï rami. Kuimbae reta imiarita taɨ reta pe, nde jupi ko vae re.

²⁰ YandeYa ko cheangareko. Yaikove yaiko ramboeve yambopu arpa jare yatairari ara ñavo yandeYa jo pe.

²¹ Echa Isaías oporookuai yepe oyeapaso vaerä ɨva jare oñeñono vaerä mburuvicha guasu ipere re, jare okuera vaerä.

²² Jare Ezequías jei yepe Isaías pe: —¿Mbae rupi pa aikuaata, akuerata ko vae aja vaerä tupao pe?