HAGEO 2 - Biblia Guarani Tumpa Iñee

Tupao pɨau iyemboetea

¹ Chiúa yasɨ veintiuno ara pe, yandeYa iñee ou ye ñeemombeúa Hageo pe, jei körai:

² “Ere körai Zorobabel mburuvicha Judá pegua, Salatiel taɨ pe jare Josué sacerdote tenondegua, Josadac taɨ pe jare opaete ïru reta pe:

³ ‘Pegüi opɨta vae reta oecha kuae tupao kërai ko iyemboetea tenonde rupi vae, jare añave ¿kërai pa pemae jese? Mbaetɨ etei ko mbae, oyemboyovake yave jókuae tenondeguagüe tupao ndive.

⁴ Ërei yandeYa jei: ¡Añave eñemomɨ̈rata Zorobabel! ¡Eñemomɨ̈rata Josué sacerdote tenondegua, ete Josadac taɨ! Peñemoäta ngatu opaete vae kuae ɨvɨ pe peiko vae jare peparavɨkɨ; echa che aï pe ndive, jei yandeYa Imbaepuere yae ete vae.

⁵ Añererökuavee peve rami, Egipto güi peë yave, jökorai cheEspíritu oïta pe ndive, agüɨye pekɨɨye.

⁶ YandeYa Imbaepuere yae ete vae jei körai: Kuae güire mbovɨ ara rupi, che amokanata ara jare ɨvɨ ɨguasu jare ɨvɨ otini vae.

⁷ Jare amborɨrɨita opaete tëtaguasu reta, jare yogüeruta opaete tëtaguasu reta kuae kotɨ imbaeyekou reta ndive; amotɨnɨeta mbae ikavigüe pe kuae o, jei yandeYa Imbaepuere yae ete vae.

⁸ Chembae ko korepoti, chembae ko oro, jei yandeYa Imbaepuere yae ete vae.

⁹ Kuae tupao ikavi yaeta oiko kuri, tenonde yave oikose vae güi; jare ameeta mbɨakatu kuae tëta pe, jei yandeYa Imbaepuere yae ete vae.’ ”

Ñeengata jupimbae reta pe

¹⁰ Mokoía año ma Darío oiko mburuvicha guasurä yave, chaúa yasɨ veinticuatro ara pe, yandeYa iñee ou ñeemombeúa Hageo rupi, jei körai:

¹¹ “YandeYa Imbaepuere yae ete vae jei körai: Eparandu añave sacerdote reta pe mborookuai regua, körai:

¹² ‘Kia nunga vae oñoma yave güɨraja jemimonde pe soo oñeñono tee vae, jare kuae oñoma güɨraja pɨpe vae jembeɨ oya yave mbɨyape re, tembíu re, vino re, olivo iasaite re ani oipotagüe tembíu re ¿oñeñono tee pa?’ ” Jare sacerdote reta omboyevɨ ñee: “Ngaraa oñeñono tee.”

¹³ Javoi Hageo jei ye: “Tëogüe oyavɨkɨ vae, oyavɨkɨ yave oipotagüe kuae oñeñono tee ñogüɨnoi vae, ¿ikɨata pa opɨta?” Jare sacerdote reta jei: “Ikɨata ko opɨta Tumpa jóvai.”

¹⁴ Jayave Hageo jei: “YandeYa jei: ‘Jökorai ko kuae tëta jare kuae kuimbae reta cheróvai; körai etei vi jembiapo reta jare opaete kuae pe güɨrökuavee reta vae ikɨa ko.

¹⁵ Añave, peyemongeta kavi pepɨa pe kuae ara güive tenonde kotɨ. Ndei pemboɨpɨ pemopüa pɨau tupao mbove,

¹⁶ ¿mbae pa peasa? Pekɨ̈reɨ tëi pemboɨru veinte jɨru temitɨ, ërei payandepoño pemboɨru; pekɨ̈reɨ tëi peyapo cincuenta jɨru vino, ërei veinteño peyapo.

¹⁷ Che ko opa amboai ɨvɨtuakuvo pe, taso oya ramogüe pe, amandau pe opaete peparavɨkɨ reta; ërei jeseve mbaetɨ peyerova chekotɨ, jei yandeYa.

¹⁸ Añave, peyemongeta kavi pepɨa pe kuae ara güive tenonde kotɨ, chaúa yasɨ veinticuatro ara güive, yandeYa jo iguapɨka peñono güive.

¹⁹ Mase, kuae ara güive ngaraa ma oata peve temitɨ jäɨgüe pe avatío pe. Yepe tëi ndeiño ipotɨ uva, ɨva, temitɨ granada, ɨvɨra olivo ave; ërei kuae ara güive cheporerekuata peré.’ ”

YandeYa güɨrökuavee Zorobabel pe vae

²⁰ YandeYa iñee ou ye mokoía ma Hageo pe, jókuae ara veinticuatro pe yeño, jei körai:

²¹ “Ere Zorobabel mburuvicha Judá pegua pe körai: ‘Che amokana ara jare ɨvɨ;

²² opata arokomegua mburuvicha guasu reta iguapɨa mborookuaía pegua jare amboaita tëtaguasu rupi mburuvicha guasu reta imbaepuere; amboyaparata käretou reta pɨpe oguata vae reta ndive jare opata kavayu reta oyepɨaka opo jese vae reta ndive, metei vae ñavo omanota jëtara ikɨsepuku pe.

²³ Jókuae ara roepɨta Zorobabel, Salatiel taɨ chemborɨa, ayangarekota nderé chepoäka-vera re rami; echa che roparavo, jei yandeYa Imbaepuere yae ete vae.’ ”