GÉNESIS 32 - Biblia Guarani Tumpa Iñee

Jacob oñoväe Esaú ndive

¹ Jacob jekuae oguata jare oë chupe Tumpa iaraɨgua reta.

² Jare Jacob oecha yave jei: “Tumpa jeyupa ko kuae” jare ombojee jókuae ɨvɨ Mahanaim.

³ Jare Jacob oïa güi omondo ñee jerajaa reta tɨkeɨ Esaú pe, ɨvɨ Seir pe Edom pegua pe,

⁴ jei chupe reta reve: “Körai pere cheya Esaú pe: ‘Labán jëta pe aiko, ípɨri ko apɨta;

⁵ anoi jeta guaka, mburika, vecha, tembiokuai kuimbae jare tembiokuai kuña. Kuae amondo jae ndeve cheya remae kavi vaerä cheré.’ ”

⁶ Jare ñee jerajaa reta oyerova ye Jacob pe, jei reve: —Rojo roväe nderɨkeɨ Esaú pɨri, jare jae etei oime ou nerövaiti vaerä, jare cuatrociento kuimbae reta yogüeru jupíe.

⁷ Jacob oendu kuae yave okɨɨye, jare ipɨatɨtɨ. Jayave omboyao jae ndive yogüɨreko vae reta jare vecha reta guaka reta, jare camello reta, mókoi teyupa pe,

⁸ echa oyemongeta: “Esaú oporepeña metei teyupa re yave, ïru teyupa ipuere oasayepe.”

⁹ Jare Jacob oyerure jei: “CheYa, cheramɨi Abraham iTumpa, cheru Isaac iTumpa, nde rere cheve: ‘Ekua ye ndeɨvɨ pe jare nerëtara reta pɨri, che ayapota ndeve ikavi vae.’

¹⁰ Che mbaetɨ ko jupi aiko vaerä ndeporoparareko rupi ani ndeporoangareko rupi; tenonde yave kuae ɨ̈aka Jordán aasa ko chepopoka ndiveño etei, ërei añave aï mókoi teyupa ndive.

¹¹ ¡Añave, chereepɨ cherɨkeɨ Esaú güi!, echa akɨɨye chugüi ou vaerä cheve jare oyuka kuña reta imembɨ reta ndive.

¹² Nde rere cheve: ‘Che ayapota ndeve ikavi vae jare neñemuña reta ɨguasu jembeɨ rupi ɨvɨkuitï ramita, yaipapa rapembae.’ ”

¹³ Jókuae pɨ̈tu oke joko pe, jare jɨmba reta güi oiparavo ombopota vaerä tɨkeɨ Esaú:

¹⁴ Dosciento kavara, jare veinte kavara kuimbae, dosciento vecha, jare veinte vecha kuimbae,

¹⁵ treinta camello imembɨ reve reve, cuarenta guaka jare payandepo ndoviyo, veinte mburika kuña jare payandepo mburika kuimbae.

¹⁶ Jare omee jembiokuai reta ipo pe, omboyao yao reve kavi, jare jei: —Peguata tenonde, jare yemboyao ñavo toï oyougüi mombɨrɨ katu.

¹⁷ Tenonde omondo vae oyókuai, jei reve chupe: —Cherɨkeɨ Esaú nerövaiti yave, jare oparandu yave ndeve, kia ra jae ndeya vae, jare ketɨ ra reo, jare kia imbae ra reraja vae,

¹⁸ nde rereta chupe: “Jae ko nderembiokuai Jacob ombou mbota ndeveguarä vae, cheya Esaú, jare jae oime ou oreraɨkue.”

¹⁹ Jökoraiño vi oyókuai taɨkuegua, jare mboapɨa, jare opaete oyemboyao yao vae jaɨkue yogüɨraja vae reta pe jei: —Köraita pemiari perövaiti yave Esaú,

²⁰ jare pere vi chupe: “Mase, ko nderembiokuai Jacob ou oreraɨkue.” Echa jei: “Tamoɨ̈ro iyarasɨ güi mbota amondo cherenonde chupe vae rupi, jare jaɨkue rupi oyoova pe royoechata, güɨramoi jökorai cherövaiti kavita.”

²¹ Jökorai omondo jenonde opaete mbota reta; jare jae opɨta oke jókuae pɨ̈tu teyupa pe.

Jacob oñoïraro araɨgua ndive

²² Jókuae pɨ̈tu Jacob opüa omboyupavo mókoi reve jembireko reta, mókoi jembiokuai kuña reta jare once reve taɨ reta, jare güɨroasa ɨ̈aka Jaboc jee vae.

²³ Oipɨɨ jare opa güɨroasauka ɨ̈aka opaete imbaembae ndive.

²⁴ Jökorai Jacob opɨta jaeño; jare metei kuimbae iköembipe oñoïraro jae ndive.

²⁵ Ërei kuae kuimbae oikuaa mbaetɨta ma ipuere jese yave, okua iuɨpɨ re, jare Jacob iuɨpɨ opuru oñoïraro ramboeve jae ndive.

²⁶ Jare jei: —Emaeño mo cheré, köeta ma. Ërei Jacob jei chupe: —Ngaraa amaeño nderé, mbaetɨ ndeporerekua cheré yave.

²⁷ Jare jókuae kuimbae jei chupe: —¿Mbae pa nderee? Jae jei: —Jacob.

²⁸ Jare jókuae kuimbae jei chupe: —Ngaraa ye ma nderee Jacob. Ndembojee retata Israel; echa reñoïraro ko Tumpa ndive jare kuimbae reta ndive, jare reporomoamɨri.

²⁹ Jayave Jacob oparandu chupe, jei: —Añave nde emombeu cheve nderee. Jare jókuae kuimbae jei: —¿Maera pa reparandu cheve cheree re? Jare iporerekua jese joko pe.

³⁰ Jare Jacob ombojee jókuae oñoïraroa, Peniel; echa jei: “Tumpa jova etei aecha, ërei aikoveño, oasayepe cherekove.”

³¹ Jare Peniel güi oasa ma yave oë chupe kuaraɨ; jare jumbɨrasɨ güi iköcho ojo oiko.

³² Jáeramo Israel iñemuña reta añave rupi mbaetɨ jou mbae iuɨpɨgüe, echa Jacob iuɨpɨ re araɨgua okua.