GÉNESIS 17 - Biblia Guarani Tumpa Iñee

Circuncisión regua

¹ Abram noventa y nueve año güɨnoi yave yandeYa oyeechauka chupe, jare jei chupe: —Che ko jae Tumpa Imbaepuere yae ete vae; eiko cheróvai rupi jare eyapo jupi vaeño,

² añonota morogüɨrökuavee päve yandeyeupe, jare romoñemuñata jeta yae.

³ Jayave Abram oyetavatɨka jare itindɨasɨ ɨvɨ re; jare Tumpa imiari jae ndive, jei reve:

⁴ —Kuae ko jae morogüɨrökuavee päve oikota ndeve vae: Jeta vae turä ko nde,

⁵ ngaraa ye ma ndembojee Abram, jae ko añave güive nderee Abraham, echa roñono ma jeta vae reta turä.

⁶ Romoñemuñata jeta yae, joko güi ayapota jeta tëtaguasu reta, ndegüi oñemuñata jeta mburuvicha guasu reta.

⁷ Añonota kuae morogüɨrökuavee päve yandeyeupe, jare nderaɨ reta pe, jare opaete nderaɨ iñemuña reta peguarä vi jekuae avei pegua, aiko vaerä neTumparä.

⁸ Kuae ɨvɨ Canaán reiko pɨpe vae ameeta ndeve, jare nderaɨkue rupi neñemuña reta peguarä vi ameeta jekuae avei pegua; jare aikota jae reta iTumparä.

⁹ Tumpa jei pɨau ye Abraham pe: —Ndepo pe oï remboete vaerä kuae morogüɨrökuavee päve; jaeramiño vi opaete neñemuña reta ou yoapɨ apɨta kuri vae.

¹⁰ Kuae ko jae cheporogüɨrökuavee päve yamboeteta yandeyeupe vae: Toyembocircuncidauka opaete kuimbae reta pepɨte pegua.

¹¹ Pembocircuncida pesoo, kuae topɨta omokañɨmaa vaerä morogüɨrökuavee päve, yayapo oyoupe vae.

¹² Juri ara ma oa güire toyembocircuncida opaete kunumi raɨ pepɨte pe oa vae, jökorai avei toyapo peñemuña reta; pero pe oa vae reta jare opaete perembiokuai korepoti re peguagüe, perëtarambae vae reta.

¹³ Toyembocircuncida ndero pe oa vae reta, jare vi nderembiokuai korepoti re reguagüe; jare jökorai toï jekuae avei morogüɨrökuavee päve pesoo re.

¹⁴ Kuimbae oyembocircuncidambae, jókuae nunga toyemombo jëtara reta ipɨte güi, echa oyavɨ ko cheporogüɨrökuavee päve kotɨ.

¹⁵ Tumpa jei vi Abraham pe: —Nderembireko Sarai ngaraa ma reenɨi Sarai pe, rembojeeta Sara.

¹⁶ Cheporerekuata Sara re, jae rupi ameeta nderaɨrä; añetete ko cheporerekuata jese, jare jae ko tëta metei tugüɨ jare metei teko vae ichɨrä, jare tëtaguasu reta juvicha reta chugüi oëta.

¹⁷ Jayave Abraham oyetavatɨka jare itindɨasɨ ɨvɨ re, opuka jare jei ipɨa pe: “¿Kuimbae cien año ma güɨnoi vae ipuereta ra taɨ, jare Sara noventa año ma güɨnoi vae ipuereta ra ipurúa?”

¹⁸ Jayave Abraham jei Tumpa pe: —¡Mbae mona Ismael, jaeño voi remombɨta nderóvai!

¹⁹ Tumpa jei chupe: —Añetete ko nderembireko Sara imembɨta ndeve kuri, jare rembojeeta Isaac; jare amoañeteta cheporogüɨrökuavee päve jae ndive jekuae avei pegua, jare vi iñemuña reta peguarä.

²⁰ Ismael regua aendu vi ndeve; cheporerekuata vi jese, jare amoñemuñata jeta yae; doceta taɨ reta, mburuvicharä kuae reta. Iñemuña reta güi oëta tëtaguasu tuicha yae vae.

²¹ Ërei cheporogüɨrökuavee päve oïta Isaac ndiveño, Sara imembɨta ndeve körai yave etei, año outa vae re vae.

²² Tumpa opa imiari Abraham ndive yave. Ojo joko güi.

²³ Jayave Abraham oipɨɨ taɨ Ismael jare opaete jembiokuai jo pe oa vae, jare opaete ikorepoti pe oguagüe, jare opaete kuimbae Abraham jo pegua ombocircuncida reta isoo jókuae ara voi, Tumpa jei chupe rami.

^24-25 Abraham noventa y nueve año ma güɨnoi jare taɨ Ismael trece año. Jayave oyembocircuncida reta isoo pe.

²⁶ Abraham jare taɨ Ismael, jókuae ara voi oyembocircuncidauka reta.

²⁷ Jare opaete kuimbae reta jare tembiokuai reta jo pegua, jókuae jo pe oa vae jare ketɨgua ikorepoti re oguagüe oyembocircuncidauka.