Gálatas 1 - Biblia Guarani Tumpa Iñee

Tamaraeme

¹ Che Pablo, temimondo (mbaetɨ kuimbae reta cheparavo ani chemondo, jaeño Jesucristo, jare yandeRu Tumpa omoingove ye Jesucristo omanogüe reta ipɨte güi vae),

² jare opaete yanderɨvɨ che ndive ñogüɨnoi vae reta roikuatía kuae tupapire opaete peporogüɨrovia vae reta Galacia pe peï vae pe.

³ YandeRu Tumpa jare yandeYa Jesucristo ipɨakavi jare ipɨakatu toï pe ndive.

⁴ YandeYa Jesucristo oñemee omano vaerä yandeyoa reta re, yandeyora vaerä teko ikavimbae vae ɨvɨ pegua güi. Echa kuae ko jae yandeRu Tumpa jemimbota.

⁵ YandeRu Tumpa toyemboeteuka jekuaekuae avei rupi. ¡Amén!

Mbaetɨ yé ïru ñee ikavi vae

⁶ Chepɨakañɨ yae kërai ɨmambae yae peyembosɨrɨ Tumpa peparavo Cristo ipɨakavi rupi vae güi, perovia vaerä mboromboe ambuaeyee vae re.

⁷ Ërei mbaetɨ ko ïru ñee ikavi vae. Jaeño oime amogüe pembojopa vae. Echa jae reta güɨrova ñee ikavi vae Cristo regua.

⁸ Ërei oime yave kia oregüi ani metei araɨgua omombeu peve mboromboe ambuaeyee vae, romombeu ma peve vae güi, Tumpa toiporarauka chupe.

⁹ Kuae roe ma tenonde peve, ërei añave tae ye peve: Oime yave kia oporomboe ambuaeyee, pemboresive ma vae güi, Tumpa toiporarauka chupe.

¹⁰ Mbaetɨ etei aipota ɨvɨ pegua reta chembotuicha. Aipota Tumpaño chembotuicha vaerä. Mbaetɨ vi aipota ɨvɨ pegua reta ambopɨakatu vaerä, echa jökorai yave Cristo jembiokuaiä ma ko che.

Pablo iparavɨkɨ

¹¹ Peikuaa kuae re cherɨvɨ reta: Kuae ñee ikavi vae che amoërakua vae mbaetɨ ko kuimbae iyemongeta.

¹² Echa mbaetɨ amboresive ani aikuaa kia nunga kuimbae güi, jaeño Jesucristo oechauka cheve.

¹³ Pe reta peikuaa ko aikose judío reta iporomboe pe vae. Echa ayapo yepi jeta yae ikavimbae vae oporogüɨrovia vae reta pe, jare aipota tëi opa amboi.

¹⁴ Jare judío reta iporomboe re oasa ete ye cherëtaɨgua cheaveigua reta jeta vae güi. Echa cherägüɨro yae cheñemuñagüe reta jeko re.

¹⁵ Ërei Tumpa cheñono tee iyeupeguarä chesɨ jɨe peve, jare cheparavo ipɨakavi jeko pegua. Jare jae oipota ma yave,

¹⁶ oikuaauka cheve Taɨ, che amoërakua vaerä judiombae vae reta pe. Kuae oyeapo yave, mbaetɨ aparandu jese kia pe;

¹⁷ mbaetɨ vi aja Jerusalén pe tenonde ma temimondo yogüɨreko chegüi vae reta pɨri. Ërei aja Arabia pe, jare joko güi ayu ye Damasco pe.

¹⁸ Kuae jaɨkue rupi, mboapɨ año oasa ma yave, aja Jerusalén pe aikuaa vaerä Pedro, jare apɨta jae ndive quince ara.

¹⁹ Ërei mbaetɨ aecha metei ave ïru temimondo reta, jaeño aecha Jacobo yandeYa tɨvɨ.

²⁰ Mase, kuae aikuatía peve vae añete ko. Tumpa rovake añete ko.

²¹ Kuae jaɨkue rupi aja ɨvɨ Siria jare Cilicia pe;

²² ërei Cristo re oporogüɨrovia vae reta Judea pegua mbaetɨ chekuaa reta.

²³ Jaeño oendu jei reta vae: “Jókuae kuimbae ikavimbae vae oyapo yepi yandeve vae, añave omoërakua mborogüɨrovia tenonde yave oipota tëi opa omboai vae.”

²⁴ Jáeramo omboete reta Tumpa cheré.