EZEQUIEL 48 - Biblia Guarani Tumpa Iñee

Ɨvɨ oyemboyao ñemuña ñavo pe vae regua

¹ Kuae ko jae ñemuña reta jee: Oyemboɨpɨ ɨvɨ jembeɨ ɨvɨtuguasu kotɨgua güive, oasa Hetlón rupi, ou Hamat rupi, Hazar-enán rupi, ɨvɨ Damasco jembeɨ rupi, ɨvɨtuguasu kotɨ, Hamat kotɨ, Dan güɨnoita ɨvɨ kuaraɨ oëa kotɨ güive kuaraɨ oikea kotɨ.

² Aser iɨvɨ oyemboɨpɨ Dan iɨvɨ jembeɨ güi, kuaraɨ oëa kotɨ güive Ɨguasu Mediterráneo jembeɨ pe oväe regua,

³ Neftalí güɨnoita iɨvɨ, Aser iɨvɨ iyɨpɨ pe, kuaraɨ oëa kotɨ güive ɨguasu kotɨ.

⁴ Manasés güɨnoita iɨvɨ, Neftalí iɨvɨ iyɨpɨ pe, kuaraɨ oëa kotɨ güive ɨguasu kotɨ.

⁵ Efraín güɨnoita iɨvɨ, Manasés iɨvɨ iyɨpɨ pe, kuaraɨ oëa kotɨ güive ɨguasu kotɨ.

⁶ Rubén güɨnoita iɨvɨ, Efraín iɨvɨ iyɨpɨ pe, kuaraɨ oëa kotɨ güive ɨguasu kotɨ.

⁷ Judá güɨnoita iɨvɨ, Rubén iɨvɨ iyɨpɨ pe, kuaraɨ oëa kotɨ güive ɨguasu jembeɨ pe oväe regua.

⁸ Judá iɨvɨ jembeɨ pe, kuaraɨ oëa kotɨ güive ɨguasu kotɨ, joko pe oïta ɨvɨ ñeñono tee vae; ipɨgüe jare ipukugüe güɨnoita veinticinco kilómetro, kuaraɨ oëa kotɨ güive ɨguasu kotɨ. Tupao oïta jókuae ɨvɨ mbɨte pe.

Ɨvɨ oñeñono tee yandeYa pe vae

⁹ Jókuae ɨvɨ oñeñono tee yandeYa pe vae pukugüe togüɨnoi veinticinco kilómetro jare payandepo kilómetro ipɨgüe.

¹⁰ Ɨvɨ oñeñono tee sacerdote reta peguarä vae, ɨvɨtuguasu kotɨ ipukugüe güɨnoita veinticinco kilómetro, jökoraiño vi arayevɨ kotɨ; payandepo kilómetro güɨnoita kuaraɨ oëa kotɨ jare kuaraɨ oikea kotɨ, jare yandeYa itupao oïta jókuae ɨvɨ mbɨte pe.

¹¹ Sacerdote oñeñono tee cheve vae reta, Sadoc iñemuña reta iporogüɨrovia avei chekotɨ vae reta, mbaetɨ oyavɨ reta Israel iñemuña reta oyavɨ yave, levita reta oyavɨ rami.

¹² Kuae reta güɨnoita ɨvɨ yandeYa pe ɨvɨ oñeñono tee kavi yae vae pe, levita reta iɨvɨ iyɨpɨ pe.

¹³ Sacerdote reta iɨvɨ iyɨpɨ pe, levita reta güɨnoita ɨvɨ; ipukugüe güɨnoita veinticinco kilómetro jare payandepo kilómetro ipɨgüe; opaete reve güɨnoita veinticinco kilómetro pukugüe jare payandepo kilómetro ipɨgüe.

¹⁴ Mbaetɨta mbae ave oñemee chugüi, ngaraa ave vi oyepoepɨ mbae ndive, mbaetɨta ïru vae ipo pe ave oyemboasa; echa yandeYa pe oñeñono tee vae ko.

¹⁵ Ɨvɨ jembɨregüe veinticinco kilómetro pukugüe jare pandepo kilómetro ipɨgüe vae, mbaetɨ ko oñeñono tee. Joko pe ipuere yogüɨreko vae, jókuae oïta mɨmba reta ikaruarä, mbɨte pe oïta tëta guasu,

¹⁶ jókuae tëta guasu güɨnoita irundɨ iyɨke oyovake päve vae, ɨvɨtuguasu kotɨ güɨnoita cuatro mil quiniento metro rupi, jökorai vi arayevɨ kotɨ; kuaraɨ oëa kotɨ jare kuaraɨ oikea kotɨ.

¹⁷ Tëta guasu re oyereta mɨmba reta ikaruarä, ɨvɨtuguasu kotɨ güɨnoita dosciento cincuenta metro ipɨgüe, jökorai vi arayevɨ kotɨ, kuaraɨ oëa kotɨ jare kuaraɨ oikea kotɨ.

¹⁸ Jare ɨvɨ oñeñono tee vae iyɨpɨ pe jembɨre vae, güɨnoi payandepo kilómetro pukugüe, kuaraɨ oëa kotɨ, jökorai vi güɨnoi kuaraɨ oikea kotɨ; kuae ɨvɨ pe ipuere oñemaetɨ, jókuae re ipuere vaerä yogüɨreko tëta guasu pe oparavɨkɨ vae reta,

¹⁹ opaete jókuae tëta guasu pe oparavɨkɨ vae, oipotagüe Israel iñemuña pegua ipuereta omaetɨ jókuae ɨvɨ pe.

²⁰ Opaete ɨvɨ oñeñono tee vae, güɨnoita irundɨ iyɨke oyovake päve, veinticinco kilómetro, tupao peguarä jare tëta guasu peguarä.

Ɨvɨ mburuvicha imbaerä vae

²¹ Mburuvicha imbaerä vae ɨvɨ, jae ko jókuae ɨvɨ oñeñono tee Tumpa pe vae iyapɨ yapɨ pe, jare tëta guasu jendarä vae güi, kuae ko jae veinticinco kilómetro vae kuaraɨ oëa kotɨgua jare kuaraɨ oikea kotɨgua, veinticinco kilómetro vae iyapɨ yapɨ pe; jókuae opɨtata mburuvicha peguarä; ɨvɨ oñeñono tee yandeYa pe vae jare tupao opɨtata jókuae mbɨte pe.

²² Körai mburuvicha pe ɨvɨ opɨtata vae jae ko levita reta iɨvɨ jembeɨ güive tëta guasu iɨvɨ pe, opɨtata Judá jare Benjamín iñemuña reta iɨvɨ ipäu pe.

Ïru ñemuña reta iɨvɨ

²³ Ïru ñemuña reta iɨvɨ oï arayevɨ kotɨ. Benjamín güɨnoita iɨvɨ, kuaraɨ oëa kotɨ güive ɨguasu kotɨ.

²⁴ Simeón güɨnoita iɨvɨ, Benjamín iɨvɨ iyɨpɨ pe, kuaraɨ oëa kotɨ güive ɨguasu kotɨ.

²⁵ Isacar güɨnoita iɨvɨ, Simeón iɨvɨ iyɨpɨ pe, kuaraɨ oëa kotɨ güive ɨguasu kotɨ.

²⁶ Zabulón güɨnoita iɨvɨ, Isacar iɨvɨ iyɨpɨ pe, kuaraɨ oëa kotɨ güive ɨguasu kotɨ.

²⁷ Gad güɨnoita iɨvɨ, Zabulón iɨvɨ iyɨpɨ pe, kuaraɨ oëa kotɨ güive ɨguasu kotɨ.

²⁸ Gad iɨvɨ güi arayevɨ kotɨ, ɨvɨ jembeɨ ojota Tamar güive ɨ yoaka pegua pe oväe regua jare Cades jare ɨ̈aka Egipto rupi Ɨguasu Mediterráneo pe oväe regua.

²⁹ Jae ko kuae ɨvɨ oyemboyaota Israel iñemuña reta pe ñemuña ñavo rupi vae, jökoraita opa pemboyao. Che peYa ko jökorai jae.

Jerusalén jöke reta

³⁰ Kuae ko jae tëta guasu jöke reta: Tëta guasu ikësea ɨvɨtuguasu kotɨgua güɨnoita cuatro mil quiniento metro.

³¹ Tëta guasu ikësea jöke reta ñavo güɨnoita Israel iñemuña reta jee; mboapɨ öke oïta ɨvɨtuguasu kotɨ: Rubén, Judá jare Leví jee vae.

³² Tëta guasu ikësea kuaraɨ oëa kotɨgua güɨnoita cuatro mil quiniento metro, jare mboapɨ öke vi: José, Benjamín jare Dan jee vae.

³³ Tëta guasu ikësea arayevɨ kotɨgua güɨnoita cuatro mil quiniento metro, jare mboapɨ öke vi: Simeón, Isacar jare Zabulón jee vae.

³⁴ Jare tëta guasu ikësea kuaraɨ oikea kotɨgua güɨnoita cuatro mil quiniento metro, jare mboapɨ öke vi: Gad, Aser jare Neftalí jee vae.

³⁵ Opaete reve jókuae tëta guasu ikësea güɨnoita dieciocho mil metro. Jare jókuae ara güive tëta guasu jeeta: ‘YandeYa oï kuae pe.’ ”