EZEQUIEL 44 - Biblia Guarani Tumpa Iñee

Öke kuaraɨ oëa kotɨgua oyeporu vae

¹ Jókuae kuimbae chereraja ye tupao jöke ikatu kotɨgua kotɨ, kuaraɨ oëa kotɨ omae vae pe; jare jókuae öke oyeokenda oï.

² Joko pe yandeYa jei cheve: “Kuae öke oyeokendata oï; agüɨyeta oyepea. Agüɨyeta metei ave kuimbae oike jokoropi, echa che, Israel iTumpa aike jokoropi. Jáeramo oyeokendata oï.

³ Ërei mburuvicha, oiko mburuvicharä jeko pegua ipuere oguapɨ joko pe jou vaerä cheróvai mbɨyape oñeñono tee cheveguarä vae. Oiketa korero kotɨgua öke rupi, jare jokoropi yeño oëta.”

Tupao pe oiketa vae reta

⁴ Javoi jókuae kuimbae chereraja öke ɨvɨtuguasu kotɨgua kotɨ tupao jóvai rupi. Amae jare aecha yandeYa iyemboetea omotɨnɨe tupao; jare ayetavatɨka chetindɨasɨ reve ɨvɨ re.

⁵ Jayave yandeYa jei cheve: “Nde kuimbae, emae kavi jare eyeapɨsaka kavi opaete tupao pegua mborookuai reta jaeta ndeve vae re. Emae kavi opaete kia ra ipuereta oike jare ñogüɨnoe ye tupao güi vae re.

⁶ Ërei ere jókuae ipɨapochɨ vae Israel iñemuña reta pe: ‘Körai jei yandeYa: ¡Joko peño mo! Pe ikavimbae yae vae iyapoa reta, Israel iñemuña reta.

⁷ Pe reta pemongɨa chetupao, ketɨgua reta peru ipɨa oyembocircuncidambae jare isoo oyembocircuncidambae oike vaerä pɨpe vae rupi. Mbɨyape, mbaekɨra jare tugüɨ pemee vae rupi pemongɨa, pemboeteä cheporogüɨrökuavee, opaete ikavimbae yae peyapo vae rupi.

⁸ Mbaetɨ peyapo che jae peve peyapo vaerä vae, mbaembae oñeñono tee chero pe vae reta regua, echa pemee ketɨgua reta ipo pe oyangareko vaerä jese.’

⁹ Körai jei yandeYa Tumpa: Metei ave ketɨgua ipɨa oyembocircuncidambae jare isoo oyembocircuncidambae, mbaetɨta oike chetupao pe, opaete ketɨgua reta yogüɨreko Israel iñemuña reta ipɨte pe vae.

¹⁰ Leví iñemuña reta oyembosɨrɨ chegüi vae, Israel iñemuña reta oyembosɨrɨ chegüi yave yogüɨraja omboete tumpa-raanga vae reta, oiporara retata jeko ae re.

¹¹ Toyeokuai reta chetupao pe, öke iyangarekoa reta jare ïru mbaembae iyangarekoa reta ramiño; jae reta oyukata mɨmba opaetei oyeapɨ vaerä vae jare opaete vae omee mɨmba oyeyuka vaerä vae yave; jare toñogüɨnoïndaivi oyeokuai vaerä.

¹² Oyeokuai reta tumpa-raanga reta jare oyavɨuka reta Israel iñemuña reta pe jeko pegua. Jáeramo jae cheree re ae ikotɨ reta, toiporara reta iyoa re ae.

¹³ Ngaraa ma oyeokuai reta cheve sacerdoterä, ngaraa vi oya reta chembaembae oñeñono tee vae re ave, mbaembae oñeñono tee kavi yae vae re. Yogüɨrekota ñemomarai rupi, ikavimbae yae oyapo reta jeko pegua.

¹⁴ Añono retata tupao re oyangareko reta vaeräño, oyapo reta vaerä opaete joko pe oyeapo vaerä vae.

Sacerdote reta regua

¹⁵ Sacerdote reta Leví iñemuña pegua, Sadoc iñemuña reta, tupao re jekuaeño oyangareko reta cheve, Israel iñemuña reta oyembosɨrɨ chegüi yave vae reta, jókuae reta yogüeruta chekotɨ oyeokuai reta vaerä cheve, ñogüɨnoi retata cheróvai omee reta vaerä mɨmba ikɨragüe jare jugüɨgüe, jökorai che peYa Tumpa jae kuae.

¹⁶ Jae reta oiketa chetupao pe jare oya retata mɨmba oyeyuka oyeapɨ jese vae re oyeokuai reta vaerä cheve, jae reta oyapota cheporookuai.

¹⁷ Oike reta yave öke rupi oka michi vae pe, toyemonde reta temimonde lino pegua pe. Oyeokuai reta yave cheve tupao joka michi vae pe ani tupao japɨpe pe, agüɨye toyemonde reta temimonde vecharaa pegua pe.

¹⁸ Äka-regua lino pegua togüɨnoi reta iñäka re jare jemimonde igüɨ pegua lino pegua vi, agüɨye vi toñono ikúa re mbae oporombojɨai vae ave.

¹⁹ Oë reta yave tupao joka tuicha vae kotɨ, ikatu pe, jeta vae ñogüɨnoia pe; tomboi iyeugüi jókuae temimonde reta lino pegua tupao pe oyeokuai yave omonde vae, jare toeya reta japɨpe peño, javoi tomonde reta ïru temimonde, agüɨye vaerä jeta vae reta re ova ñeñono tee.

²⁰ Agüɨye toñeapiasɨ reta, ërei agüɨye vi tombopuku reta ia; jaeño toñeapi kavi reta.

²¹ Agüɨye metei ave sacerdote reta tou vino oike yave tupao joka michi vae pe.

²² Agüɨye tomenda imemano vae ani ramo ime omombo vae ndive, jaeño tomenda Israel iñemuña pegua kuñatai ndei etei oasa kuimbae ndive vae ani ramo sacerdote amɨri jembirekogüe ndive.

²³ Sacerdote reta tomboe chembae vae reta oikuaa vaerä mbae oñeñono tee vae jare mbae oñeñono teembae güi; oikuaa reta vaerä ikɨambae jare ikɨa Tumpa jóvai vae.

²⁴ Oime ñeapo yave jae reta oporojäata; che aporojäa rami toporojäa reta. Toyapo reta opaete cheporookuai reta jare cheporomboe reta opaete chearete regua, jare toñono tee reta cheara mbutuu pegua.

²⁵ Agüɨye topoko reta tëogüe re, agüɨye vaerä oyemongɨa reta Tumpa jóvai. Ërei ipuere opoko omano yave tu, ichɨ, taɨ ani tayɨ, tɨkeɨ, tɨvɨ ani ramo jeindɨ omendambae vae omano yave jëogüegüe re.

²⁶ Oyemongɨa Tumpa jóvai vae güi oyetɨo reta yave, chiu ara ye toäro.

²⁷ Javoi oike ye tupao joka michi vae pe oyapo vaerä joko pegua mbaravɨkɨ yave, tomee iyé mɨmba oyeyukagüe Tumpa iñɨ̈ro vaerä mbaeyoa re vae. Che ndeYa Tumpa jae kuae.

²⁸ Oimeta jae reta imbaeyekou: Che ko aikota chupe reta imbaeyekourä, ërei agüɨyeta oñemee imbaerä ɨvɨ chupe reta Israel pe. Echa che etei ko jae reta imbae.

²⁹ Mbota temitɨ jäɨgüe, mɨmba oyeyuka Tumpa iñɨ̈ro vaerä mbaeyoa re vae jare mɨmba oyeyuka mbaeyoa re vae güi tou reta, jare opaete mbaembae oñeñono tee Israel pe vae, jae reta imbaerä toiko.

³⁰ Opaete mbaagüɨyerɨpɨ jare opaete mbota reta oñemee vae güi, sacerdote reta peguarä toiko. Jaeramiño vi pemeeta sacerdote reta pe opaete trigokúi oyemómbɨu ramo mbɨyaperä vae güi; jökorai oime vaerä cheporerekua pero pe.

³¹ Sacerdote reta agüɨye etei tou güɨra ani ramo mɨmba omanoiñogüe ani ramo mɨmba pochɨ vae jembiagüe.