EZEQUIEL 37 - Biblia Guarani Tumpa Iñee

Ɨvɨtɨ päu ipe kavi vae pegua maekägüe reta otinigüe

¹ YandeYa ombou imbaepuere cheré, jare chereraja cheñono metei ɨvɨtɨ päu ipe kavi vae pe, tɨnɨe maekägüe otinigüe oïa pe.

² Jare chemondo aguata ipɨte reta rupi; aecha jeta yae, tɨnɨe ɨvɨtɨ päu ipe kavi vae rupi, jare otiniasɨ yae.

³ Jayave jei cheve: “Nde kuimbae, ¿rerovia pa kuae maekägüe reta ipuere oikove ye?” Che jae chupe: “CheYa Tumpa, ndeño ko reikuaa.”

⁴ Jayave yandeYa jei cheve: “Emoërakua kuae maekägüe reta pe maratuta oasata vae, ere chupe reta: ‘Maekägüe otini vae reta, peyeapɨsaka yandeYa iñee re.

⁵ YandeYa Tumpa jei körai peve: Amee yeta pepɨ̈tuerä, peikove ye vaerä.

⁶ Pekägüe reta ambojayɨ yeta, añono yeta pesoorä jare pepirerä; amee yeta pepɨ̈tuerä, peikove ye vaerä. Jare peikuaata che ko jae peYa vae.’ ”

⁷ Jökorai amoërakua chupe reta maratuta oasa vae re, Tumpa cheokuai rami. Amoërakua mbae maratuta vae aï ramboeve aendu jɨapu: Oyeapo ɨvɨkana, jare maekägüe reta omboɨpɨ oya oyoe jenda jenda pe ae.

⁸ Amae jare aecha omboɨpɨ oyekuaa jayɨ reta, isoo jare ipire reta. Ërei mbaetɨ jekove reta.

⁹ Jayave yandeYa jei cheve: “Nde kuimbae, nemiari cheree re tekove pe, jare ere chupe: YandeYa Tumpa jei körai: ‘Tekove, eyu oipota rupi güi, eyu eike kuae omano vae reta re, oikove reta vaerä.’ ”

¹⁰ Jare amoërakua mbae oasata vae jae cheokuai rami, jare tekove oike jese reta iyɨvɨte pe, jare oikove reta, jare opüa oyemboɨ reta. Jeta yeyé, sundaro reta jeta yae rami.

¹¹ Javoi jei cheve: “Nde kuimbae, opaete kuae maekägüe reta rami ko Israel iñemuña reta. Echa jei reta: ‘Ñanekägüe reta opa otini; mbaetɨ ma ñanoi mbae re yayerovia vaerä, opa ma ñakañɨtei.’

¹² Jáeramo, emoërakua chupe reta maratuta vae: ‘YandeYa Tumpa jei körai: Mase, tëta chembae vae reta, aipeata petɨvɨa reta, pogüɨnoeta joko güi jare pogüɨrajata ɨvɨ Israel pe.

¹³ Jare chekuaata che ko jae peYa vae, aipea ma yave petɨvɨa reta jare pogüɨnoe ma yave joko güi.

¹⁴ Jare chepɨ̈túe ameeta peve, peikove ye vaerä; jare poñono yeta peɨvɨ ae pe. Jayave peikuaata che peYa ko jae kuae jare ayapo. Che peYa jae kuae.’ ”

Judá jare Israel oñemometei vae regua

¹⁵ YandeYa Tumpa jei cheve:

¹⁶ “Nde kuimbae, eipɨɨ metei ɨvɨra jare eikuatía jese: ‘Judá pegua reta peguarä.’ Jaɨkue rupi eipɨɨ ïru ɨvɨra jare eikuatía jese: ‘Israel pegua reta peguarä.’

¹⁷ Javoi kuae ɨvɨra reta eñono päve metei rami ñogüɨnoi vaerä, jare metei rami toñogüɨnoi ndepo pe.

¹⁸ Nerëtaɨgua reta oparandu ndeve yave körai: ‘Emombeu oreve, ¿mbae pa oipota jei kuae?’

¹⁹ Ere chupe reta: YandeYa Tumpa jei körai: ‘Mase, ko aipɨɨ ɨvɨra Israel pegua reta peguarä vae, jare añonota ɨvɨra Judá pegua reta peguarä vae ndive, ayapota metei ɨvɨra ramiño jare metei rami anoi retata chepo pe.’

²⁰ Jare jókuae ɨvɨra reta reikuatía vae, renoita ndepo pe jae reta jovake.

²¹ Jare ere chupe reta: ‘YandeYa Tumpa jei körai: Mase, anoeta Israel iñemuña reta ïru tëtaguasu reta ipɨte güi jae reta ñogüɨnoia güi, amboatɨ retata oipota rupi güi, aru reta yeta iɨvɨ ae pe.

²² Kuae reta ayapota meteiño tëtaguasu Israel iɨvɨtɨ reta re, jare meteiño güɨnoita juvicha guasurä. Ngaraa ye ma oyemboyao mókoi tëtaguasu pe ani mókoi mborookuaía pe.

²³ Ngaraa ye ma oyemongɨa reta tumpa-raanga reta omboete vae rupi, pɨ̈chɨi Tumpa pe vae rupi jare oyembopɨapochɨ reta Tumpa kotɨ vae rupi. Aepɨta opaete oyembopɨapochɨ reve oyapo vae rupi iyoa vae güi, jare aitɨota; yogüɨrekota chembaerä jare che aikota jae reta iTumparä.

²⁴ Cherembiokuai David rami vae oikota jae reta juvicha guasurä, güɨnoi retata meteiño oyangareko jese reta vaerä; yogüɨreko retata cheporookuai reta rupi, oñovatuta jare oyapo retata.

²⁵ Yogüɨreko retata jókuae ɨvɨ amee cherembiokuai Jacob pe vae pe, joko pe yogüɨrekose peñemuñagüe reta. Joko pe yogüɨrekota jae reta, taɨ reta jare iñemuña reta jekuae avei pegua; jare cherembiokuai David rami vae oikota juvicharä jekuae avei pegua.

²⁶ Jare morogüɨrökuavee päve yembopɨakatu pegua ayapota jae reta ndive, morogüɨrökuavee päve jekuae avei pegua. Añono kavita, ambojeta retata jare añonota chero mbaemboetea pegua ipɨte reta pe jekuae avei pegua.

²⁷ Chero mbaemboetea pegua añonota jae reta ipɨte pe, che aikota iTumparä jare jae reta yogüɨrekota chembaerä.

²⁸ Jare ïru tëtaguasu reta oikuaata che peYa Tumpa ko añono tee Israel iñemuña reta vae, anoi ma yave chero mbaemboetea pegua jae reta ipɨte pe jekuae avei pegua.’ ”