EZEQUIEL 35 - Biblia Guarani Tumpa Iñee

Ɨvɨtɨ Seir maratuta vae regua

¹ YandeYa Tumpa jei cheve:

² “Nde kuimbae, emae ɨvɨtɨ Seir kotɨ, jare emoërakua ikotɨ maratuta oasa vae.

³ Ere chupe: ‘YandeYa Tumpa jei körai: Ɨvɨtɨ Seir, che ayovaicho ndekotɨ. Aiporaraukata ndeve, opata romboai, roeyata ipombae,

⁴ Opata amboai nerëta guasu reta. Repɨtata ipombae. Jayave reikuaata che ko jae Tumpa vae.

⁵ Nde reyovaicho avei Israel iñemuña reta kotɨ, jae reta oiporara yae ñogüɨnoi iyoa re yave, nde reporepeña jese reta.

⁶ Jáeramo che Tumpa jae cheyé aeño: Romeeta mano ipo pe, jare mano neraɨkuemoñata; echa mbaetɨ reipoɨu reporoyuka, jáeramo jae tandemboai.

⁷ Ɨvɨtɨ Seir opata amboai, aeyata ipombae, jare mbaetɨ yeta ma kia oasa jokoropi.

⁸ Jókuae ɨvɨtɨ reta, ɨvɨtɨ päu ipe kavi vae reta jare ɨ̈aka reta tɨnɨeta ñeraro pe omano vae reta jëogüegüe pe.

⁹ Romboaita jekuae avei pegua, nerëta guasu reta ngaraa ye ma oñemopüa pɨau ye. Jayave chekuaata che ko jae Tumpa vae.

¹⁰ Echa rere: Israel iñemuña reta iɨvɨ mókoi reve chembaerä ko, yepe tëi Tumpa oï joko pe.

¹¹ Jáeramo, che Tumpa jae cheyé aeño: Aiporaraukata ndeve, ndearasɨ yae rami, Israel pegua reta remotareɨ yae ramo kërai reyapo rami. Aiporarauka ma ndeve yave, jae reta chekuaata.

¹² Jayave reikuaata che Tumpa aendu ko opaete mbae jasɨ katu vae rere Israel pegua ɨvɨtɨ reta kotɨ vae. Echa pere: ¡Opa oyemboai reta, jare añave jëgua ma yandepo pe oï vaerä!

¹³ Pe reta peyembotuicha chekotɨ peñee rupi, jeta ñee ikavimbae pere chekotɨ. Che aendu ko.

¹⁴ Che Tumpa jae körai: Opaete vae ɨvɨ pegua reta oyerovia vaerä, che opata romboai.

¹⁵ Nde reyerovia yae Israel iñemuña reta iɨvɨ opa oyemboai yave, jökorai eteita reasa; repɨtata ipombae ɨvɨtɨ Seir, opaete ɨvɨ Edom. Jayave reikuaata che ko jae Tumpa vae.’ ”