EZEQUIEL 28 - Biblia Guarani Tumpa Iñee

Mburuvicha guasu Tiro pegua maratuta vae regua

¹ YandeYa jei cheve:

² “Nde kuimbae, ere mburuvicha guasu Tiro pegua pe: CheYa Tumpa jei körai: Nde ndepɨayemboete yae, rere ndeyeupe: ‘Che ko jae metei tumpa aguapɨ aï Tumpa iguapɨa pe ɨguasu mbɨte pe vae.’ Ërei nde jaeä ko Tumpa, nde ko metei kuimbaeño. Ndepɨa pe reyemongeta ndearakuaa katu metei tumpa rami.

³ ¿Ndearakuaa katu yae pa Daniel güi? ¿Mbaetɨ etei pa mbae yavai vae oñemi ndegüi?

⁴ Ndearakuaa rupi jare ndepoki rupi remboatɨ jeta mbaeyekou, jare renoi jeta oro jare korepoti ndembaembae reñovatúa pe.

⁵ Ndepoki yae remaemee vae rupi jeta remoïru ndembaeyekou; jare ndembaeyekou reta jeko pegua ndepɨayemboete.

⁶ Jáeramo, cheYa Tumpa jei körai: Reyemongeta ramo ndearakuaa katu metei tumpa rami,

⁷ aruta ndekotɨ ketɨgua reta, tëtaguasu ipɨarai yae vae reta, güɨnoe retata ikɨsepuku ndeve, nde nepöra jare ndearakuaa katu vae pe, jare omboai retata ndeyemboetea.

⁸ Ndemondo retata omano vae reta ñogüɨnoia pe, jarembae pegua remanota, ɨguasu pe omano vae reta rami.

⁹ ¿Jekuaeñota ra rere ndeyeupe: ‘Che ko jae Tumpa’, ndeyuka vae reta jóvai? ¡Ndeyuka vae reta ipo pe, nde kuimbaeño ko, mbaetɨ ko metei tumpa!

¹⁰ Ketɨgua reta ipo pe remanota, Tumpa re güɨroviambae vae reta omano rami. Che ndeYa jae kuae.”

Tairari mbɨatɨtɨ pegua mburuvicha guasu Tiro pegua re

¹¹ YandeYa jei cheve:

¹² “Nde kuimbae, etairari tairari mbɨatɨtɨ pegua mburuvicha guasu Tiro pegua re, ere chupe: ‘CheYa Tumpa jei körai: Nde opaete pe ikavi yae yepi vae, ndearakuaa katu jare nepöra yae yepi.

¹³ Edén pe reikose Tumpa iko raɨ pe, reñemopöra reyemonde oipotagüe ita reta ipöra vae pe, jae ko: Cornerina, topacio, jaspe, crisólito, berilo, ónice, zafiro, carbunclo, esmeralda jee vae jare oro; opaete angúa jare mimbɨ reta ipöragüe oyeapo ndeve, jókuae ara roapo yave.

¹⁴ Nde querubín tuichagüe, oporoangareko vae, che roñono cheɨvɨtɨ oñeñono teea re, joko pe reikose; reguatase yasɨtata reta ipɨte rupi.

¹⁵ Ikavi yae ndereko yepi, jókuae ara roapoɨpɨ güive, oñeväe regua nderé ikavimbae vae.

¹⁶ Jeta yae remaemee vae jeko pegua reyembopɨapochɨ jare ndeyoa. Jáeramo rogüɨnoe romombo cheɨvɨtɨ güi, romombo yasɨtata reta ipɨte güi, nde querubín reporoangarekose vae.

¹⁷ Nepöra yae jeko pegua ndepɨayemboete, ndeyemboetea yae jeko pegua ndearakuaa rerokomegua. Che roitɨ ɨvɨ re, romomaraiukata mburuvicha guasu reta jóvai.

¹⁸ Jeta yae ikavimbae reyapo, jupimbae reyapo remaemee vae rupi, remboeteä ndetupao reta. Jayave ndeɨvɨte pe añono tata nemokañɨtei vaerä. Opaete vae ndereecha vaerä ɨvɨ re reï tanimburä.

¹⁹ Opaete tëta ïru ɨvɨ pegua reta ndekuaa vae ipɨakañɨta omae nderé; repɨtata kɨɨyearä, jare ngaraa ye ma reiko jekuae avei pegua.’ ”

Sidón maratuta vae regua

²⁰ YandeYa jei cheve:

²¹ “Nde kuimbae, emae Sidón pegua reta kotɨ, jare emoërakua ikotɨ reta maratuta oasa vae.

²² Ere chupe reta: ‘CheYa Tumpa jei körai: Sidón, che ayovaicho nde kotɨ, nderé ayemboeteukata. Aiporarauka ndeve jupi rupi, jare aechauka ndeve aiko tee vae yave, opaete vae oikuaata che ko jae Tumpa vae.

²³ Ambouta ndeve mbaerasɨ ikavimbae yae ovakatu vae reta, jare tugüɨ oguatata ndekaye rupi; jeta omanota vae, kɨsepuku pe oyeyukaukata oipota rupi güi. Jayave opaete vae oikuaata che ko jae Tumpa vae.

²⁴ Jare ngaraa ye ma peiporarauka Israel iñemuña reta pe, yuu jäti pinda vae rami; jare Israel iyɨvɨrigua tëta reta ngaraa ma omotareɨ. Jayave opaete vae oikuaata che ko jae Tumpa vae.’ ”

²⁵ YandeYa Tumpa jei körai: “Amboatɨ ma Israel iñemuña reta tëtaguasu reta oñemoai ñogüɨnoia güi yave, opaete tëtaguasu reta oikuaata che ko iyoambae vae. Yogüɨreko yeta iɨvɨ ae pe, ɨvɨ che amee cherembiokuai Jacob pe vae pe.

²⁶ Joko pe yogüɨreko pɨagüiveta, oyapo retata jorä, güɨnoi retata uvarupa, yogüɨreko kavita. Che ajäa yave iyɨvɨrigua tëta reta omotareɨ Israel iñemuña reta vae. Jayave opaete vae oikuaata che ko jae peYa Israel iTumpa vae.”