EZEQUIEL 18 - Biblia Guarani Tumpa Iñee

Iyoa vae omanota

¹ YandeYa jei cheve:

² “¿Maera pa Israel pe mbaetɨ pekuérai pere kuae ñee arakuaa pegua: ‘Kuimbae reta jou uva jayasɨ vae, jare taɨ reta jäi-yeɨ’?

³ Che peYa Tumpa jae cheyé aeño, ngaraa ye ma pere kuae ñee arakuaa pegua Israel pe.

⁴ Chembae ko opaete vae; michia reta jare tu reta. Kia iyoa vae, omanota ko.

⁵ Kuimbae jupi vae, jae ko oyapo jupi vae jare isɨmbi vae:

⁶ Mbaetɨ ojo oyea aretea pe oñemee yave mbaemboete ɨvɨtɨ re, mbaetɨ vi omboete tumpa-raanga reta Israel pegua; mbaetɨ oasa japicha jembireko ndive, mbaetɨ vi oya jembireko re jugüɨ oï yave;

⁷ mbaetɨ vi oyuvanga kia re, mbia re oeya mbae vae pe, omee ye chupe; mbaetɨ oñomi mbae kia güi; yɨmbɨaɨ vae omongaru jare nandi vae omboemimonde;

⁸ oiporuka korepoti yave mbaetɨ oasa ete okovara jese; mbaetɨ ikavimbae oyapo ïru vae pe; oime yave ñeapo, jupi rupi ojäa mókoi reve;

⁹ cheporookuai jei rami oiko; oyapo opaete cheporookuai reta. Jae kuae kuimbae añetete jupi vae. Jáeramo oikoveta, che peYa jae.

¹⁰ Ërei oime yave kuae kuimbae taɨ imonda jare oporoyuka, ani opaño mbae ikavimbae oyapo,

¹¹ tu mbaetɨ oyapo vae oyapo, ojo aretea pe oñemee yave mbaemboete ɨvɨtɨ re tumpa-raanga reta pe, oasa japicha jembireko ndive,

¹² oyuvanga paravete vae re jare mbae oata chupe vae re, imonda, mbia re mbae oeya vae pe mbaetɨ omee ye, omboete tumpa-raanga reta jare oyapo mbae pɨ̈chɨi yae cheve vae,

¹³ oiporuka ikorepoti yave oasa ete okovara jese. ¡Jókuae kuimbae ngaraa oikove! Oyapo yave opaete jókuae che aröɨro vae reta, omanota ko, jaeiño ko jeko iyeupe imano re.

¹⁴ Ani ipuere vi kuae kuimbae taɨ oecha opaete tu oyapogüe mbaeyoa, ërei kuae taɨ mbaetɨ omomoe tu jeko;

¹⁵ mbaetɨ ojo oyea aretea pe oñemee yave mbaemboete ɨvɨtɨ re, mbaetɨ vi omboete tumpa-raanga reta Israel pegua; mbaetɨ oasa japicha jembireko ndive,

¹⁶ mbaetɨ oyuvanga kia re, mbia re oeya mbae pe omee ye; mbaetɨ oñomi mbae kia güi; yɨmbɨaɨ vae omongaru jare nandi vae omboemimonde;

¹⁷ oiporuka ikorepoti yave mbaetɨ oasa ete okovara jese; mbaetɨ ikavimbae oyapo ïru vae pe; cheporookuai jei rami oiko; oyapo opaete cheporookuai reta. ¡Jókuae kuimbae ngaraa omano tu iyoa jeko pegua! ¡Oikoveta ko!

¹⁸ Ërei tu imbaeyuvanga katu, imonda, oyapo ikavimbae ïru reta ipɨte pe; jáeramo omanota ko iyoa jeko pegua.

¹⁹ Pe reta peparandu yave: ‘¿Maera ra taɨ oiporaraä vi tu iyoa re?’ Echa taɨ oyapo isɨmbi vae jare jupi vae, jare oyapo opaete cheporookuai reta; jáeramo oikoveta ko.

²⁰ Jaeño iyoa vae omanota, kuimbae taɨ ngaraa omboepɨ tu iyoa, ani kunumi tu, ngaraa omboepɨ taɨ iyoa. Jupi vae jepɨta chupe imbaejupi, jare iyoa vae oiporarata ikavimbae oyapo vae.

YandeYa jupi ko

²¹ Ërei iyoa vae opia yave opaete mbaeyoa oyapo oiko vae güi, jare oyapo yave cheporookuai jupi rupi, oikoveta ko, ngaraa omano.

²² Che ngaraa ma chemaendúa opaete ikavimbae oyapo vae re; oikoveta jupigüe oyapo vae rupi.

²³ Che mbaetɨ aipota omano iyoa vae, ërei mbaetɨ oyepoepɨ jeko ikavimbae güi yave omanota. Che peYa Tumpa jae kuae.

²⁴ Ërei jupi vae opia yave jupi oyapo oiko vae güi, jare jae oyapo ikavimbae yae vae iyoa vae reta oyapo vae güi yave, ¿perovia pa oikoveñota? Che ngaraa ma chemaendúa opaete ikavi vae oyapogüe re. Oyapo jupimbae jare iyoa jeko pegua omanota.

²⁵ Jare pere yave: ‘Mbaetɨ jupi Tumpa oyapogüe.’ Peyeapɨsaka añave Israel pegua reta, ¿peyemongeta pa mbaetɨ jupi ayapo? ¿Pe retaä ra jupimbae peyapo?

²⁶ Jupi vae opia yave jupi oiko vae güi, jare oyapo yave ikavimbae, omanota ko, ikavimbae oyapo jeko pegua.

²⁷ Ërei iyoa vae opia yave ikavimbae güi, jare oyapo yave jupi vae, güɨroasayepeta jekove.

²⁸ Echa omae jare opia opaete ikavimbae oyapo vae güi. Oikoveta ko, ngaraa omano.

²⁹ Ërei Israel pegua reta jei yave cheve, mbaetɨ jupi ayapo. ¿Che ra mbaetɨ jupi ayapo? ¿Israel pegua retaä ra jupimbae oyapo?

³⁰ Che ajäata opaete Israel iñemuña reta jeko oï rupi. Che peYa jae. Peyepoepɨ jare peyembosɨrɨ pereko ikavimbae güi, agüɨye vaerä pekañɨtei.

³¹ Pembosɨrɨ peyeugüi opaete jókuae ikavimbae peyapo chekotɨ vae, pembopɨau pepɨa jare peyemongeta. Echa, ¿maera pa omanota Israel iñemuña reta?

³² Che mbaetɨ etei aipota kia omano. Peyepoepɨ ikavimbae güi jare peikoveta. Che peYa Tumpa jae.