ECLESIASTÉS 5 - Biblia Guarani Tumpa Iñee

Ñererökuavee oyeapo rai voi vae regua

¹ Reo Tumpa jo pe yave, eyeandu reve eiko: Eya katu reyeapɨsaka vaerä, agüɨye eya mɨmba oyeyukagüe remee vaeräño, jókuae kuimbae reta yarakuaambae omee rami, echa mbaetɨ oikuaa reta ikavimbae ko oyapo ñogüɨnoi vae.

² Agüɨye eyeapo rai voi mbae rere vaerä, ndepɨa rupi ave agüɨye eñererökuavee voi Tumpa pe, echa Tumpa ko oï ɨvate jare nde ko reï ɨvɨ pe. Jáeramo mbovɨño nemiari,

³ echa jeta ete yayemoambeko jese vae, yandembopaɨu pochɨ ko; jare jeta ñaneñee ñamoë yave, yae ñee ikavimbae.

⁴ Tumpa pe mbae rerökuavee yave, agüɨye eäro rembopo vaerä, echa jae mbaetɨ ipɨakatu yarakuaambae reta re. Embopo jókuae rerökuavee vae,

⁵ echa ikavi yae ko reñererökuavee yave rembopo vae, mbaetɨ rembopo vae güi.

⁶ Agüɨye tandeyoa neñee rupi, agüɨye vaerä rere Tumpa jembiokuai jóvai: “Mbaetɨ aikuaa ramo ko ayavɨ.” ¿Maera pa Tumpa remboarasɨukata neñee jeko pegua jare omboai jókuae reyapogüe?

⁷ Echa jeta yemongeta reyapo vae rupi jeta ñee reta mbaeä etei vae rere. Ërei jeseve nde, eipoɨu Tumpa güiño.

Ikaviä etei yandeve vae

⁸ Metei tëtaguasu pe reecha yave paravete vae oyererekoasɨ katu jare jupigüe mbaetɨ oyeapo chupe yave, agüɨye nepɨakañɨ jese; echa metei mburuvicha re omae, ïru mburuvicha ma tuicha vae, jare ïru mburuvicha tuicha yae ete vae güɨnoi mbaepuere kuae mókoi reta re.

⁹ ¡Echa mbaravɨkɨ ko pegua ikavi ko opaete vae pegua, jare mburuvicha guasu ave vi ko oporomborɨta!

¹⁰ Korepoti oaɨu yae vae, yangapɨɨä etei jese; oipota yae oikokatu vaerä, ngaraa mai ipɨakatu jókuae güɨnoigüe re. Kuaekuae mbaeä etei vi,

¹¹ echa jeta mbaembae ñanoi yave, jeta vi iua reta. ¿Mbae yé pa ñanoeta jókuae jeta mbaembae ñanoi vae güi, ñamae güire jese?

¹² Mbaravɨkɨ regua paravete vae, yepe michi okaru ani jeta okaru, ërei oke pɨagüive; ërei ngatu oikokatu vae, jeta mbaembae güɨnoi jeko pegua mbaetɨ oke pɨagüive.

¹³ Oime mbae jasɨ katu yae ete kuae ɨvɨ pe aecha vae, jae ko: Oyemboikokatu vae jeta mbae omboatɨ, ërei oñererokomegua pɨpe vaerä ko,

¹⁴ echa mbaetɨ yave oyeporu kavi, ipuere opaetei okañɨ, jare imichia reta peguarä mbaetɨ eteita mbae opɨta.

¹⁵ Ichɨ jɨe güi inandi oa rami, jökorai ko ojo yeta, güɨrajambae reve oparavɨkɨ mbatee jese vae.

¹⁶ Jókuae ikaviä yae ko, ou rami jökorai ojo yeta vae. ¿Mbae pa güɨnoe oparavɨkɨ mbateeiño vae?

¹⁷ Jare opaete ara rupi mbaetɨ yeti okaru pɨagüive, oiko pɨtumimbi rupi rami, mbɨatɨtɨ rupi jare jasɨ katu rupi.

¹⁸ Jayave, aecha ikavi yae vae jae ko: Yakaru kavi vae, yayerovia vaerä opaete yandeparavɨkɨagüe güi, kuae ɨvɨ pe yayemoambeko jese vae re, opaete ara Tumpa omee tekove yandeve ramboeve, echa jókuae ko jae yandeparavɨkɨ jekovia.

¹⁹ Jökorai vi Tumpa omee opaete oikokatu vaerä vae reta pe, omee vi okaru kavi vaerä chugüi, oyekou vaerä iparavɨkɨ rupi güɨnoigüe re, echa Tumpa ko omee jókuae yekou.

²⁰ Echa Tumpa omboyekou ramboeve opaete mbaembae rupi jeko pegua, jókuae kuimbae mbaetɨ oyemoambeko jekove re.