DEUTERONOMIO 33 - Biblia Guarani Tumpa Iñee

Moisés jei ñee kavi doce Israel iñemuña reta kotɨ

¹ Moisés, kuimbae Tumpa jembiokuai ndei omano mbove, jei kuae ñee kavi Israel iñemuña reta kotɨ

² körai: “YandeYa ou Sinaí güi; Seir güi yandemboesape. Jembipe ɨvɨtɨ Parán güive jare ou jeta vae reta pe Cades pe; iyakatu kotɨ güeru yandeve mborookuai tata katuai vae.

³ Tumpa oaɨu imbae vae reta, oñeñono tee chupeguarä vae re oyangareko; jáeramo jae reta oguata nderaɨkue oyapo reta nde reyókuai vae.

⁴ Moisés omee yave oreve mborookuai Jacob iñemuña reta imbaerä omee,

⁵ oiko mburuvicha guasurä Jesurún pe tëta itenondegua reta oyomboatɨ yave, Israel iñemuña reta oyomboatɨ yave.”

⁶ Rubén iñemuña reta pe jei: “¡Peikove avei Rubén iñemuña reta! ¡Agüɨye pemano, yepe tëi mbovɨ yae peñemuña reta!”

⁷ Judá iñemuña reta peguarä jei: “CheYa, eendu Judá iñemuña reta iñee; eraja ye iɨvɨ kotɨ. Toyeepɨ ipo pe, nde emborɨ jovaicho reta re.”

⁸ Leví iñemuña reta pe jei: “CheYa ndeTumim jare ndeUrim emee nderembiokuai jupi vae pe, Masah pe rejäa vae, reyomboarasɨ jae ndive ɨ Meriba pegua pe vae,

⁹ tu jare ichɨ kotɨ jei vae: ‘Mbaetɨi ko aecha reta’, jare mbaetɨ oipota oikuaa jëtara reta, jare taɨ reta ave mbaetɨ oipota oikuaa. Jae reta oyapo neñee jei vae, ombopo reta neporogüɨrökuavee päve.

¹⁰ Ndeporookuai reta re omboeta Jacob, jae ko Israel iñemuña reta; oñono retata ikäti kavi vae incienso nderóvai, jare mɨmba oyeyuka oyeapɨ jese vae ndembae re mɨmba oyeyuka opaetei oyeapɨ vae.

¹¹ Ndeporerekua cheYa Tumpa oyapo retata vae re, jare eipɨɨ ndepɨakatu reve chugüi jembiapo reta; eikupe rakɨo chupe jovaicho reta, jare vi imotareɨa reta, agüɨye vaerä opüa reta.”

¹² Benjamín iñemuña reta pe jei: “YandeYa oaɨu vae oiko pɨagüiveta iyɨpɨ pe; Tuicha yae ete vae oyangareko aveita jese. ¡Iporoangareko rupi oikota!”

¹³ José iñemuña reta pe jei: “YandeYa tiporerekua peɨvɨ re, ara güi ɨsápɨi ikavigüe rupi, jare ɨvɨgüɨ pe ɨ oï vae rupi,

¹⁴ año pe mbaagüɨye kavi vae rupi, jare yasɨ ñavo yagüɨye vae rupi,

¹⁵ ɨvɨtɨ ñɨma vae rupi yagüɨye kavi vae,

¹⁶ yagüɨye kavi yae ɨvɨ rupi vae ñurati pɨte pe oyekuaa vae, ipɨakatu vae tou José iárambo, jókuae jëtara reta itenondeguarä oï vae re.

¹⁷ Toro taɨrɨpɨ rami ko iyemboetea, toro jäti rami ko, pɨpe oikututa opaete tëta reta ɨvɨ pegua; jökorai ko jeta Efraín iñemuña reta, jare Manasés iñemuña reta.”

¹⁸ Zabulón iñemuña reta jare Isacar iñemuña reta pe jei: “Peyerovia, Zabulón iñemuña reta peë ketɨ yave, jare pe Isacar iñemuña reta, pero guakapi pegua re.

¹⁹ Ɨvɨtɨ guasu re omboatɨ retata tëta guasu reta, jare joko pe omee retata mɨmba oyeyukagüe jupi vae; oyekou retata mbaeyekou ɨguasu pegua re, jare mbaeyekou ɨvɨkuitï pe oñeotɨ oï vae re.”

²⁰ Gad iñemuña reta pe jei: “¡Toyekou ɨvɨ ombotuicha chupe vae! Yaguapope oyapakua oporopïaro rami, omondoro yɨva jare äka.

²¹ Gad iñemuña reta opɨta ɨvɨ kavi ndive, mburuvicha iɨvɨ oñemee chupe. Yogüɨraja tëta reta jenonde, oyapo reta Tumpa jemimbota, oyapo reta jupi vae Israel iñemuña reta pe.”

²² Dan iñemuña reta pe jei: “Dan iñemuña reta ko jae yaguapope imembɨ Basán kotɨ güi opo vae.”

²³ Neftalí iñemuña reta pe jei: “Neftalí iñemuña reta re omae kavi jare iporerekua yandeYa. ¡Jae reta imbae ko kuaraɨ oikea güive arayevɨ kotɨ!”

²⁴ Aser iñemuña reta pe jei: “Toyekou Aser iñemuña reta, tu Jacob taɨ reta ipɨte pe, jare tɨkeɨ reta toaɨu. Tiñäkɨ olivo iasaite pe ipɨ;

²⁵ jöke imotätaa togüɨnoi jiero jare jiero iyu vae, tipɨ̈rata oikove oiko ramboeve.

²⁶ Mbaetɨ kia omboyovake Jesurún iTumpa, jae oguata ɨvate rupi pemborɨ vaerä jare amapɨtu reta re imbaepuere reve.

²⁷ Tumpa oikove avei vae ko jae peñepɨ̈roka, imbaepuere opambae ko peñepɨ̈roa; jae ko ombotekuarai perenonde güi tovaicho reta, jare peokuai pemboai vaerä.

²⁸ Israel iñemuña reta yogüɨreko pɨagüiveta, yogüɨrekota mbɨakatu rupi, ɨvɨ omoñemuña trigo jare uva pɨpea pe, ngaraa oata ɨsápɨi ara güi chupe reta.

²⁹ Peyerovia pe Israel iñemuña reta, ¿kia pa ipuereta oyemboyovake pe ndive? YandeYa etei ko pereroasayepe; jae ko peangareko jare pemborɨ. ¡Jae ko pekɨsepuku peporomoamɨri vaerä! Perovaicho reta oñemomichita peve, jare pe pemboaita jae reta iyemboetea.”