DEUTERONOMIO 30 - Biblia Guarani Tumpa Iñee

Mbaembae reta oime vaerä ñeñono kavi jare mborerekua

¹ Ou güire peve opaete kuae mbaembae reta, mborerekua jare yepopeyu añono peiparavo vaerä vae, javoi peipoepɨ yave peyemongeta ikavimbae pepɨa pe penoi vae, opaete kerupi tëtaguasu reta yandeYa Tumpa pemomboa rupi,

² jare peyerova ye yandeYa Tumpa kotɨ opaete pepɨa ndive jare perekove ndive yave, jare peendu yave yandeYa iñee che añave poyókuai rami, pe jare peraɨ reta,

³ jayave yandeYa pereroyerova yeta peyererajaukaa kotɨ güi, jare güɨnoita mboroparareko pekotɨ; pereru yeta opaete ketɨ ketɨ tëta reta kotɨ güi, yandeYa Tumpa opa pemoai moaia kotɨ güi.

⁴ Yepe tëi peɨvɨ güi oyemombogüe reta, opa oñemoai ñogüɨnoi mombɨrɨ ïru ɨvɨ rupi, joko güi yandeYa Tumpa pereru yeta;

⁵ pereru yeta jókuae ɨvɨ peñemuñagüe reta imbaegüe pe, jare penoita pembaerä, oyapota peve ikavi vae jare pemoñemuñata jeta yae peñemuñagüe reta güi.

⁶ Jare yandeYa Tumpa ombocircuncidata pepɨa, jare peñemuña reta ipɨa, peaɨu vaerä yandeYa Tumpa opaete pepɨa ndive jare opaete perekove ndive, jekuaeño peikove vaerä.

⁷ YandeYa Tumpa oñonota opaete kuae yepopeyu reta perovaicho reta re, jare opaete jókuae pemotareɨ vae reta re jare oiporarauka peve vae reta re,

⁸ jare pe peyerova yeta, peenduta yandeYa iñee jare peyapota opaete iporookuai reta che poyókuai añave vae.

⁹ Jayave yandeYa Tumpa pemboyekouta opaete mbaembae peyapo vae rupi, pemichia reta rupi, perɨmba reta rupi, peremitɨ ia reta rupi, ikavi yae vaerä; echa yandeYa oyerovia yeta peré ikavi vae rupi, peñemuñagüe reta re oyeroviase rami,

¹⁰ peendu yandeYa Tumpa iñee yave, peyapo vaerä iporookuai reta opaete kuae tembikuatía pe oï vae; peyerova ye yandeYa Tumpa kotɨ, opaete pepɨa ndive jare opaete perekove ndive yave.

¹¹ Echa kuae mborookuai poyókuai añave aï vae, mbaetɨ ko yavai yae vaerä peve, mbaetɨ ko mombɨrɨ oï.

¹² Mbaetɨ oï ara pe, pere vaerä: ‘¿Kia ra oyeupita yandeve ara kotɨ, jare güeru oenduka yandeve, yayapo vaerä?’

¹³ Jare mbaetɨ oï ɨguasu jovaicho kotɨ, pere vaerä: ‘¿Kia ra oasata yandeve ɨguasu, jare güeru oenduka yandeve, yayapo vaerä?’

¹⁴ Echa köi yae ko oï pegüi mborookuai, oï ko peyuru pe, pepɨa pe, pepuere vaerä peyapo.

¹⁵ Mase, che añono añave peróvai peiparavo vaerä tekove ani ikavi vae, mano ani ikavimbae;

¹⁶ echa che poyókuai añave, peaɨu yandeYa Tumpa, peiko jemimbota rupi, jare peñovatu iporookuai reta, peikove vaerä jare peñemuña vaerä jeta, jare yandeYa Tumpa tiporerekua peré ɨvɨ peiketa peiko pɨpe vae pe.

¹⁷ Ërei pepɨa osɨrɨ jare mbaetɨ peendu yave, peyemombiauka yave, pemboete tumpa ambuae reta yave, peyetavatɨka jóvai yave,

¹⁸ tamombeu kavi voi peve añave: Opata ko pemano; mbaetɨta amaeño peré, peiko puku jókuae ɨvɨ peota peiko pɨpe vae pe, ɨ̈aka Jordán jovaicho kotɨ.

¹⁹ Ara jare ɨvɨ jovake añave aikuaauka peve, kërai añono peróvai tekove jare mano, mborerekua jare yepopeyu; peiparavo añave tekove, peikove vaerä pe jare peñemuña reta;

²⁰ peaɨu yandeYa Tumpa, peendu iñee, peguata avei jupíe; echa jae ko tekove iya peveguarä, peiko puku vaerä; peiko vaerä jókuae ɨvɨ yandeYa güɨrökuavee jee re peñemuñagüe Abraham, Isaac jare Jacob pe vae pe.”