DEUTERONOMIO 28 - Biblia Guarani Tumpa Iñee

Mbaeyekou iñeereendu katu vae reta peguarä

¹ Peendu ete kavi peyeupe yandeYa Tumpa iñee yave, peyapo yave mborookuai reta amombeu añave peve vae, yandeYa Tumpa pembotuichata opaete tëtaguasu reta ɨvɨ pegua güi.

² Penoita opaete kuae mborerekua reta, peyapo yave yandeYa Tumpa iñee.

³ Peyekouta perëta guasu pe, jare peko pe.

⁴ Peyekouta peraɨ reta rupi, peremitɨ reta ia re, perɨmba reta imembɨ re, peguaka reta imembɨ re, jare pevecha reta re.

⁵ Peyekouta pekanata ipo re jare mbɨyape oyemómbɨu pɨpe vae re.

⁶ Peyekouta opaete mbaembae peyapo vae rupi.

⁷ YandeYa omoamɨrita perovaicho reta yogüeru oporepeña peré vae reta; metei tape rupi yogüeru retata peve, ërei opata oñemoai moai otekuarai pegüi.

⁸ YandeYa ombouta peavatío re iporerekua jare opaete mbaembae peyapo vae re; iporerekuata peré kuae ɨvɨ omeeta peve vae pe.

⁹ Peendu jare peyapo yave yandeYa Tumpa iñee, jae pererekota metei tëta oñeñono tee vae imbaerä, oñererökuavee jee re peve rami.

¹⁰ Jare opaete tëta reta oikuaata pe reta ko yandeYa peño peyerure vae, jare okɨɨye retata pegüi.

¹¹ YandeYa pemboyekouta pembaembae rupi, peraɨ reta rupi, perɨmba imembɨ reta rupi, peremitɨ reta ia rupi, jókuae ɨvɨ güɨrökuavee jee re omee vaerä peñemuñagüe reta pe vae pe.

¹² YandeYa oipeata peve mbaeyekou ara pegua, omongɨ vaerä ɨvɨ re iara pe kavi, iporerekua vaerä opaete peparavɨkɨ re. Peiporukata jeta tëtaguasu reta pe, ërei pe mbaetɨta pembaeporu kia güi.

¹³ YandeYa peñonota tenonde, mbaetɨta peñono iyapɨ pe; pembaepuere aveita opaete vae güi, mbaetɨta peiko jae reta imbaepuere pe, peyapo yave yandeYa Tumpa iporookuai poyókuai añave vae,

¹⁴ mbaetɨ yave pepia kërai ave yepe opaete che jae peve vae güi pemboete vaerä tumpa ambuae jare peyeokuai chupe.

Ñeereendumbae jekovia

¹⁵ Ërei mbaetɨ peendu yandeYa Tumpa iñee omombeu añave peve vae yave, outa peré opaete kuae yepopeyu reta:

¹⁶ Yepopeyu toa peré tëta guasu pe jare peko pe.

¹⁷ Yepopeyu toa pekanata ipo re jare mbɨyape oyemómbɨu pɨpe vae re.

¹⁸ Yepopeyu toa nderaɨ reta re, neremitɨ ia reta re, ndeguaka imembɨ reta re, jare ndevecha reta imembɨ reta re.

¹⁹ Yepopeyu toa opaete mbaembae peyapogüe re.

²⁰ YandeYa oitɨta peré yepopeyu, mbɨatɨtɨ jare mɨakañɨ opaete mbaembae peyapogüe rupi, opa regua pekañɨtei ɨmambae pegua, perembiapo ikavimbae rupi peeya jeko pegua.

²¹ YandeYa güeruta peve mbaerasɨ pɨ̈chɨi yae vae, opa regua pemokañɨtei kuae ɨvɨ peike peiko vaerä pɨpe vae güi.

²² YandeYa ombouta peve kuperasɨ, taku, ruru, taku guasu, okɨmbae, mbaesusere jare temitɨ mbaerasɨ; kuaekuae mbaetɨta pereeya opa pemokañɨtei regua.

²³ Mbaetɨ eteita okɨ peve, ɨvɨ pe ave mbaetɨta mbaagüɨye.

²⁴ YandeYa ombouta peve ama jekovia pe ɨvɨtimbo, opa pekañɨtei regua.

²⁵ YandeYa pemoamɨriukata perovaicho reta pe; metei tape rupi peporepeñata nderovaicho reta re, ërei opata peñemoai moai petekuarai chugüi reta; peñemoaita jare peikoasɨ katuta opaete tëta ñavo rupi.

²⁶ Perëogüegüe oikota chucha reta jare mbaeporou reta jembiurä, jare mbaetɨta kia omondo chugüi vae.

²⁷ YandeYa oitɨta peré karacha pɨ̈chɨi vae Egipto pe rami, atii, kuru jare pire jemɨi ipoanoämbae vae.

²⁸ YandeYa oitɨta peré mbokere, tesambae, pɨa-kërai,

²⁹ peyeandu reve peguatata, jesambae oyeandu reve oguata rami. Ngaraai mbae peyapo vae oë kavi peve, pepɨatɨtɨ aveita, oñomi aveita mbae pegüi, jare mbaetɨta kia pereepɨ vaerä.

³⁰ Pemomiari tëita kuña pemenda ïrurä, ërei ambuae vae kuimbaei güɨrekota; peyapota o, ërei ngaraa peiko pɨpe; peñotɨta uva, ërei ngaraa peyekou iagüe re.

³¹ Pegüeye peróvai oyuka retata pegüi, ërei ngaraa peu isoogüe; pemburika peróvai güi oñomita pegüi, ërei ngaraa oyemboyevɨ ye peve; pevecha reta oñemeeta perovaicho reta pe, ërei mbaetɨta kia opɨ̈ro ye peve vaerä.

³² Peraɨ jare perayɨ reta oñemeeta perovakei ïru tëta pegua reta pe, peyemombaerasɨta jese reta, ërei ngaraa mbae pepuere peyapo.

³³ Peremitɨ iagüe, jare opaete peparavɨkɨ rupi oime vae, jouta peikuaambae vae reta, oiporarauka aveita peve vae.

³⁴ Pemombokereta opaete mbaembae peecha vae.

³⁵ YandeYa oitɨta peré karacha jasɨ yae vae petava re, peu re, jare opaete perete rupi, ngaraa pepuere pekuera.

³⁶ YandeYa opata pererajauka jare peruvicharä peiparavo vae ndive, tëtaguasu mbaetɨ peikuaa jare peñemuñagüe reta ave mbaetɨ oikuaa vae kotɨ. Joko pe peyeokuaita tumpa ambuae ɨvɨra pegua jare ita pegua pe.

³⁷ Mbaetɨta omae kavi peré vae, ñeeräño peikota, jare peyóyai yoyaita opaete vae tëta ñavo yandeYa pererajaa rupi.

³⁸ Peñotɨ tëita jeta temitɨ, ërei mbovɨ yae pearɨvota, echa tuku opata jou.

³⁹ Peñotɨ tëita uva, peyangarekota jese, ërei ngaraa peu tɨgüegüe ani iagüe yepe, echa taso opata jou.

⁴⁰ Penoita jeta ɨvɨra temitɨ olivo, ërei ngaraa peñemokäti iasaite pe, echa ia opata otini.

⁴¹ Oimeta peraɨ jare perayɨ, ërei ngaraa yogüɨreko pembaerä, echa opata oyereraja tembipɨɨrä.

⁴² Tuku opata jou opaete peremitɨ jare peremitɨ ia reta peɨvɨ pegua.

⁴³ Ketɨgua reta yogüɨreko perëta pe vae ara ñavo jeieteta oikokatu, ërei pe jeieteta peparavete.

⁴⁴ Jae reta oiporukata mbae peve, ërei pe mbaetɨta mbae penoi peiporuka vaerä; jae reta yogüɨrekota tenondeguarä, ërei pe peikota taɨkueguarä.

⁴⁵ Outa peré opaete kuae yepopeyu reta, peraɨkuemoñata jare perupitɨta opa pekañɨtei regua, mbaetɨ ramo peendu yandeYa Tumpa iñee, peyapo vaerä opaete jae peokuai tëi vae.

⁴⁶ Opaete kuae mbaembae reta outa peve jare neñemuña reta re jekuae avei rupi, jare oporombopɨakañɨta,

⁴⁷ mbaetɨ ramo peyeokuai yandeYa Tumpa pe yerovia ndive jare mbɨakatu ndive, jeta mbaembae omee peve vae re.

⁴⁸ Jáeramo peyeokuaita perovaicho reta yandeYa ombou peve vae pe, peyɨmbɨaɨ reve, peɨuve reve, penandi reve, peporiau reve opaño mbaembae re; jae reta oñonota peré mbaravɨkɨ yavaetegüe opa regua pemokañɨtei.

⁴⁹ YandeYa güeruta peve metei tëtaguasu matɨ güi, ɨvɨ iyapɨ kotɨ güi, güɨraké rami iñäkua vae; tëtaguasu mbaetɨ iñee peikuaa vae;

⁵⁰ ipïrimbae yae vae reta, mbaetɨta omboete ndechi yepe ani michia yepe.

⁵¹ Jou retata perɨmba imembɨ reta, peremitɨ ia, opa pekañɨtei regua; mbaetɨta oeya peve trigo yepe, ani uva tɨgüegüe, ani olivo iasaite, peguaka imembɨ yepe, ani vecha imembɨ yepe, opa regua pemokañɨtei.

⁵² Oñova retata opaete perëta guasu reta, oa regua tëta ikësea täta jare ɨvate vae reta, pe peyerovia jese vae, opaete kuae ɨvɨ pe; oñova retata opaete tëta reta yandeYa omee ɨvɨ pevea pe.

⁵³ Jare peuta peraɨ jare perayɨ yandeYa Tumpa omee peve vae isoo, perovaicho reta peöva yave, oasa ete ma oiporarauka perovaicho peve yave.

⁵⁴ Jare kuimbae iporoaɨu yae vae ave, ngaraa ma omae kavi jëtara re, jembireko re, ani michia reta jembɨre vɨteri chupe vae re,

⁵⁵ mbaetɨ ramo oipota omee chupe reta imichia isoo jae jouta vae, karuai jeko pegua, perovaicho reta peöva jare oiporarauka peve opaete perëta guasu ñavo rupi vae jeko pegua.

⁵⁶ Kuña maepöra yae vae, mbaetɨ oipota ɨvɨ re opɨ̈ro ipɨgüɨrai yave vae, ime oyoaɨu jae ndive vae re ave ngaraa omae kavi, imembɨraɨe jare imemɨkuña reta re

⁵⁷ michia raɨ oa ramo chugüi vae jare iyaupa jou vɨarita, karuai jeko pegua; perovaicho reta peöva jare oiporarauka peve opaete perëta ñavo vae jeko pegua.

⁵⁸ Mbaetɨ yave peyapo opaete mborookuai oyekuatía oï kuae tembikuatía pe vae, mbaetɨ yave peipoɨu kuae tee mbaemboetea jare kɨɨyea güi, jae ko: YandeYa Tumpa.

⁵⁹ Jayave jae omoïruta peve jeta ikavimbae yae ete vae, peñemuña reta pe, mbaerasɨ pɨ̈chɨi yae vae jare ipöambae vae.

⁶⁰ Jare güeruta peve opaete tembiporara reta Egipto pegua, jókuae pekɨɨye yae chugüi vae reta, jare peiporara aveita.

⁶¹ Jaeramiño vi opaete mbaerasɨ jare tembiporara reta mbaetɨ oyekuatía oï tembikuatía mborookuai pegua pe vae, yandeYa ombouta peve opa pekañɨtei regua.

⁶² Jare mbovɨ yae pepɨtata, peiko tëi ma reve jeta yeyé yasɨtata rami, mbaetɨ ramo peendu yandeYa Tumpa iñee.

⁶³ YandeYa oyerovia reve oyapose ikavi vae peve jeta pemoñemuña rami, jökorai vi oyeroviata pererokomegua jare pemboai; jare peyeekɨukata peyemombo jókuae ɨvɨ peike tëi peiko vaerä pɨpe vae güi.

⁶⁴ Jare yandeYa opata pemoai moai opaete tëtaguasu reta rupi, ɨvɨ iyɨpɨ kotɨ güive, ketɨ ɨvɨ iyapɨ kotɨ; joko pe peyeokuaita tumpa ambuae reta pe, pe mbaetɨ peikuaa vae reta, jare peñemuñagüe reta ave mbaetɨi oikuaa vae, ɨvɨra pegua jare ita pegua pe.

⁶⁵ Jare peiko ramboeve jókuae tëtaguasu reta pe, mbaetɨta peiko pɨagüive, mbaetɨta peputuu kavi; echa yandeYa omeeta peve pɨakɨɨye, mbɨatɨtɨ jare yemoambeko.

⁶⁶ Aivetei yaeta ko perekove, pekɨɨye reteiñota ara rupi jare pɨ̈tu rupi, jëgua reteiñota perekove.

⁶⁷ Pekɨɨye yae jeko pegua, jare mbaembae peechata vae peko pegua, ndeimbove yave pereta: ‘¡Mbae mona pɨ̈tu mo!’ Jare pɨ̈tu yave pereta: ‘¡Mbae mona köe mo!’

⁶⁸ Yepe tëi yandeYa jei peve mbaetɨta ma peo ye jókuae tape rupi, ërei pereraja yeta Egipto kotɨ barco pe; jare joko pe peñemeeta tembiokuairä, ërei mbaetɨta kia ave pegua vae.”