DEUTERONOMIO 25 - Biblia Guarani Tumpa Iñee

¹ Oime kia nunga reta oñeapo oyoe yave, toyogüɨraja oporojäa vae reta jóvai, jae reta tombojupi jekombae jare tomboeko reta jeko vae.

² Jare jókuae jeko vae, jupi ko oñenupa vaerä yave, toñenupa; oporojäa vae tomboyapakuauka ɨvɨ pe, jare jae jóvai toinupa reta, jeko oime rupi toñenupa.

³ Agüɨye toasa toyeporu jese cuarenta chikote, agüɨye vaerä jeta ete peinupa yave imboeteambae opɨta peróvai.

⁴ Güeye ombopiriri trigo oï yave, agüɨye peiyuruokua.

⁵ Oyotɨvɨ vae reta yogüɨreko päve yave meteia peño, jare metei omano yave taɨmbae, jókuae omano vae jembirekogüe agüɨye tomenda ketɨgua kuimbae ndive; ipëu tomenda jae ndive, jökorai oñemuña vaerä jókuae jëtara amɨri.

⁶ Jókuae kuña imembɨrɨpɨ kuimbae ko chupe yave, togüɨraja tɨkeɨ amɨri ani tɨvɨ amɨri jee, agüɨye vaerä jókuae omano vae jee okañɨ Israel iñemuña reta ipɨte pe.

⁷ Ërei jókuae kuimbae mbaetɨ oipota omenda taɨtatɨgüe ndive yave, taɨtatɨ tojo tenondegua reta ñogüɨnoia pe, jare tei chupe reta: ‘Chepëu mbaetɨ oipota oiko avei tɨkeɨ ani tɨvɨ jee Israel iñemuña reta ipɨte pe, mbaetɨ oipota omenda che ndive.’

⁸ Jayave jókuae tëta guasu pegua tenondegua reta toenɨiuka, jare timiari reta jae ndive, jare jae mbaetɨi oipota omenda jae ndive yave,

⁹ toya taɨtatɨgüe jese, jare tenondegua reta jóvai toekɨ ipɨapaa chugüi, jare tondɨvɨ jova re, jare tei chupe: ‘¡Körai ko oyeapo mbaetɨ oipota oiko avei tɨkeɨ ani tɨvɨ jee vae!’

¹⁰ Jare iñemuña reta oyembojeeta Israel iñemuña reta ipɨte pe: ‘Ipɨgüɨrai vae iñemuña.’

Ïru mborookuai reta

¹¹ Mókoi kuimbae oñoraro yave, oñenupauka oï vae jembireko ou oepɨ vaerä ime yave, oapía pɨɨ ime jovaicho yave,

¹² peyasɨa jókuae kuña ipo chugüi; agüɨye peɨ̈ro chupe.

^13-14 Agüɨye peiporu pemaemee ani pembaegua yave mbaejäaka oyemboyoavɨgüe, tuicha vae ani michi vae yepe,

¹⁵ mbaejäaka ikavi vae peiporu; peiko puku vaerä yandeYa Tumpa omee ɨvɨ pevea pe.

¹⁶ Echa pɨ̈chɨi ko yandeYa Tumpa pe kia nunga kuae oyapo vae, jare kia nunga jupimbae oyapo vae.

Mborookuai opa vaerä oyemboai Amalec iñemuña reta

¹⁷ Pemaendúa Amalec iñemuña reta kërai peapo ñuu pe vae re, Egipto güi peë yave;

¹⁸ ñogüɨnoe oporepeña peré tape pe, ñogüɨnoe ipɨtugüe taɨkue opɨta vae reta pe; pekangɨ yae peï yave; mbaetɨ etei oipoɨu reta Tumpa güi.

¹⁹ Jáeramo, yandeYa Tumpa omee ma peputuu vaerä opaete perovaicho reta peɨ́vɨri ñogüɨnoi vae güi yave, jókuae ɨvɨ omee pembaerä vae pe peï ma yave, pemboai Amalec iñemuña reta jee ɨvɨ iárambo güi. ¡Agüɨye peakañɨ!