DEUTERONOMIO 22 - Biblia Guarani Tumpa Iñee

¹ Peväe yave perapicha igüeye ani ivecha okañɨgüe, agüɨye peikuaku chugüi, peraja ye perapicha pe.

² Ërei mɨmba peväegüe iya perëta-ɨpɨ peguaä ko yave ani peikuaambae ko yave, peraja perëta pe jare penoi joko pe iya oeka regua, javoi pemee ye chupe.

³ Jökoraiño vi peyapo mburika ndive jare temimonde ndive, opaete perapicha omokañɨgüe peväe yave agüɨye peikuaku.

⁴ Perapicha imburika ani igüeye peecha ogüɨapi tape rupi chugüi yave, agüɨye peasa chugüi, pemborɨ pemopüa.

⁵ Agüɨye kuña tomonde kuimbae jemimonde, ani kuimbae ave agüɨye tomonde kuña jemimonde, echa pɨ̈chɨi yae ko yandeYa Tumpa pe jókuae nunga oyapo vae.

⁶ Kia nunga vae oväe yave tape rupi güɨra jaitɨ ɨvɨra re ani ɨvɨ pe, ichɨ güɨroa güɨnoi güɨra raɨ ani jupía vae, agüɨye togüeru ichɨ ndive;

⁷ tomaeño tojo ichɨ, jaeño togüeru güɨra raɨ. Jökorai peiko kavi vaerä jare peiko puku vaerä.

⁸ Pemopüa yave o ipɨau vae, iyapɨte ipe vae jembeɨ rupi peyapo vi ikësea reve; jökorai agüɨye vaerä penoi teko kia oa yave o iárambo güi.

⁹ Agüɨye peñotɨ peuvarupa pe oipotagüe temitɨ, agüɨye vaerä oikomegua jare opa okañɨtei pegüi temitɨ peñotɨgüe jare uva iagüe peipoota tëi vae.

¹⁰ Agüɨye güeye pemboyoayu mburika ndive peara vaerä.

¹¹ Agüɨye peyemonde temimonde ipɨa vecharaagüe oyea lino ndive vae pe.

¹² Peñono ñeapevaka iekina ñavo re jopea, peñeapeva pɨpe vae.

Kuña jaekavi oñeväe vae regua

¹³ Metei kuimbae omenda yave kuña ndive, jare oasa ma jae ndive güire güɨröɨro omae jese yave,

¹⁴ jare omboeko ikavimbae pe, jei reve: ‘Che amenda kuae kuña ndive, jare aroke yave aväe chupe kuimbae ndive oasagüe yepe’,

¹⁵ jayave kuñatai tu jare ichɨ togüɨnoe toechauka kuñatai jemimondegüe, tëta pegua tenondegua reta pe,

¹⁶ jare kuñatai tu tei tenondegua reta pe: ‘Che amee cherayɨ kuae kuimbae jembirekorä, jare jae añave güɨröɨro

¹⁷ jare omboeko cherayɨ ikavimbae pe jei reve: Nderayɨ aväe oasa kuimbae ndivegüe ma. Ërei añeteä ko, ko oï kuñatai jemimondegüe.’ Javoi jókuae kuñatai tu toipɨso temimonde, tenondegua reta jóvai.

¹⁸ Jayave tëta pegua tenondegua reta toipɨɨ jókuae kuimbae jare toinupa.

¹⁹ Jare tokovara chupe cien reare korepoti pegua, jare kuae tomee kuñatai tu pe, echa omoërakua pɨ̈chɨi kuñatai omendambae Israel iñemuña pegua, togüɨreko jare agüɨye tomombo opaete ara oikove oiko ramboeve.

²⁰ Ërei añetete ko kuñatai oasa ma kuimbae ndive yave,

²¹ penoe tu jöke pe, jare kuimbae tëta pegua reta toyapi ita pe toyuka, teko ikavimbae oyapo Israel iñemuña reta pe ipɨte pe jeko pegua, jare tu jo mbaetɨ omboete jeko pegua. Jökorai peekɨ ikavimbae pepɨte güi.

²² Kia nunga vae oyepokou oyapakua oï metei kuña omenda vae ndive yave, tomano mókoi reve, kuimbae jare kuña. Jökorai peekɨ ikavimbae Israel iñemuña reta ipɨte güi.

²³ Metei kuñatai ndeiño oasa kuimbae ndive vae, ërei oime imenda ïrurä vae; jare kia nunga vae oväe tëta guasu pe chupe jare opoko jese yave,

²⁴ mókoi reve penoe tëta guasu jöke pe, jare peyapi ita pe peyuka; jókuae kuñatai tomano mbaetɨ ramo jäse tëta guasu pe, jare jókuae kuimbae tomano oyuvanga ramo japicha jembirekorä vae re; jökorai peekɨ ikavimbae pepɨte güi.

²⁵ Ërei metei kuimbae oväe yave kuñatai oime ma imenda ïrurä vae tëta güi ikatu pe, jare opoko jese oipotambae reve yave, jókuae kuimbaeño tomano.

²⁶ Jare kuñatai pe agüɨye mbae toyeapo, echa mbaetɨ teko güɨnoi omano vaerä; kuae ko metei kuimbae opüa japicha re jare oyuka vae rami;

²⁷ echa oväe tëta güi ikatu pe jaeiño, jäse tëi, ërei mbaetɨ kia oepɨ vaerä.

²⁸ Metei kuimbae oväe yave kuñatai ndeiño oasa kuimbae ndive vae, jare ndeiño oime imenda ïrurä vae, oipɨɨ opoko jese jare kia oipokou yave,

²⁹ jókuae kuimbae tomee kuñatai tu pe cincuenta reare korepoti pegua; echa oasa jae ndive, togüɨreko ete jembirekorä jare agüɨye tomombo opaete ara oikove oiko ramboeve.

³⁰ Agüɨye metei ave topoko tu jembireko re, echa jókuae oyapo vae omboeteä ko tu.