DEUTERONOMIO 17 - Biblia Guarani Tumpa Iñee

¹ Agüɨye pemee yandeYa pe, toro ani vecha kuimbae taɨrusu vae mbae oata chupe vae ani oikomegua vae, echa pɨ̈chɨi yae ko yandeYa Tumpa pe jókuae nunga.

² Kia nunga tëta yandeYa Tumpa omee pevea pe oime yave kuimbae ani kuña oyapo ikavimbae yandeYa Tumpa jóvai, oyavɨ morogüɨrökuavee päve kotɨ yave

³ omboete yave oyetavatɨka reve tumpa-raanga, kuaraɨ, yasɨ ani opaete ara ipo reta yandeYa oyopia vae,

⁴ jókuae jërakua yave peve, peparandu kavi jese, jare añete ko jókuae pɨ̈chɨi yae vae oime peɨvɨ pe yave,

⁵ peraja tëta guasu jöke pe kuimbae ani kuña ikavimbae oyapo vae, jare peyapi ita pe, jökorai tomano.

⁶ Mókoi ani mboapɨ vae oecha kavi vae jeigüe reño ipuere omano jeko vae, ërei metei vae jeigüe reño agüɨye tomano.

⁷ Imiari vae reta räri toporoapi ita pe oporoyuka vaerä, jaɨkue rupi opaete vae. Jökorai peekɨ ikavimbae pepɨte güi.

⁸ Oime yavai yae teko pejäa vaerä yave, yoyuka regua, ñeapo regua, yombopere regua, ani ïru mbae perëta pe oasa vae. Jayave pepüa jare pekua yandeYa Tumpa oiparavo jee oïta pɨpea pe,

⁹ pekua sacerdote Leví iñemuña pɨri, jare oporojäa vae reta jókuae ara ñogüɨnoi joko pe vae pe peparandu, jare jae reta pemboeta kërai peyapo vaerä.

¹⁰ Javoi peyapo opaete jae reta jei peve rami.

¹¹ Mborookuai reta re pemboe rami, jare morojäa kërai peyapo vaerä pemboe rami peyapo, agüɨye peipoepɨ kërai ave yepe.

¹² Ërei kuimbae oyembotuicha reve mbaetɨ oyapo sacerdote oyeokuai yandeYa pe vae ani oporojäa vae jei chupe vae yave, tomano. Jökorai peekɨ ikavimbae pepɨte güi.

¹³ Opaete vae oendu kuae yave, oipoɨuta jare ngaraa ma oyapo oyembotuicha reve.

Mburuvicha guasu regua mborookuai

¹⁴ Peike ma yave yandeYa Tumpa omee ɨvɨ pevea pe, pepɨ̈ro jare peiko ma pɨpe yave, güɨramoi pere: ‘Ñañono vi metei mburuvicha guasu, yandeyeupe, opaete tëtaguasu yandeɨvɨrigua reta güɨnoi rami.’

¹⁵ Peñono yandeYa Tumpa oiparavogüe, perëtaɨgua peñono mburuvicha guasurä peyeupe, agüɨye peñono mburuvicha guasurä ketɨgua, perëtarambae vae.

¹⁶ Ërei jókuae mburuvicha guasu agüɨye tomoñemuña iyeupe jeta kavayu, agüɨye vi tomondo togüeruruka iyeupe Egipto kotɨ güi omoïru vaerä ikavayu, echa yandeYa jei peve: ‘Agüɨye ye peyu kuae tape rupi.’

¹⁷ Agüɨye vi jeta yae tijembireko, agüɨye vaerä ipɨa jopa, agüɨye vi tomboatɨ iyeupe jeta korepoti ani oro.

¹⁸ Mburuvicha guasu oyemboguapɨ ma yave, tomoapɨtauka iyeupe mborookuai reta oyeapo vae güi sacerdote Leví iñemuña reta oyangareko jese vae.

¹⁹ Togüɨnoi iyeupe omongeta avei vaerä ara ñavo, oikuaa vaerä oipoɨu yandeYa Tumpa güi, jare oñovatu vaerä opaete mborookuai reta oyeapogüe, jare oyapo vaerä jeigüe.

²⁰ Jökorai agüɨye vaerä ipɨa ombotuicha yae jëtaɨgua reta pe, jare agüɨye vaerä opia mborookuai jei vae güi, jökorai oiko puku vaerä jae jare taɨ reta iporookuaía pe, Israel iñemuña reta ipɨte pe.