Daniel (Deuterocanónico) 3 - Biblia Guarani Tumpa Iñee

Azarías iyerure

²⁴ Sadrac, Mesac jare Abed-negó oguata reta tataendɨ rupi oyemongoi reve jare omee reta mbaemboete Tumpa pe, jae ko yandeYa vae.

²⁵ Jayave ma Azarías, tata pɨte pe, omboɨpɨ oyerure jare jei:

²⁶ “Ndetuicha vae ko nde, cheYa, ore ñemuñagüe reta iTumpa. Ndeve toiko mbaemboete, nderee yerovia tuicha vae opambae vae.

²⁷ Nde ko jae jupi vae opaete mbae reyapo oreve vae rupi. Opaete reyapogüe rupi añetegüe ko nde; reregüe vae isɨmbi vae ko; nde jaeñoi ko reporojäa jupigüe rupi.

²⁸ Nde reporojäa ko jupigüe rupi, rembou ramboeve oreve opaete kuae tembiporara reta jare Jerusalén iárambo, oreñemuñagüe reta jëta ikɨambae vae. Tembiporara añetete jupi rupi vae orembaeyoa jeko pegua rembou oreve opaete kuae.

²⁹ Royapo mbaeyoa jare royapoä mborookuai reta oreyeugüi ae oë vae jaema jökorai ropia nde güi. Opaete mbae rupi orembaeyoa. Royapoä ndeporookuai;

³⁰ mbaetɨ royapo jare roiporúä etei, nde rere oreve royapo vaerä rami jare jayave roiko kavi vaerä.

³¹ Jökorai, opaete pɨ̈chɨi vae reta rembou oreve vae, opaete mbae reyapo oreve vae, metei tembiporara añetete jupimbae vae ko.

³² Opa oremee tovaicho ikavimbae vae pe, kuimbae reta iTumpa mbae pe jare juvicha mbae pe, metei mburuvicha guasu jeko kavimbae pe, oasa ete opaete ɨvɨ pe vae.

³³ Añave orepuereä oreyuru roipea vaerä ave. Oyeokuaise ndeve vae jare ndemboetese vae reta joko oyeasoi ñogüɨnoi yemongɨa pe jare ñemomarai pe.

³⁴ Ndepɨakavi jeko pegua, agüɨye opaete orereeya, agüɨye neñemoïru ore ndive vae opa emboai.

³⁵ Agüɨye ndeporoparareko eekɨ oregüi. Eyapo nechëi Abraham jee re, nderembiokuai Isaac jee re jare Israel oñeñono tee ndeve vae jee re.

³⁶ Nde ko rerökuavee chupe reta iñemuña reta yogüɨrekota jeta rupi yasɨtata reta ara re oï vae rami jare ɨvɨkuitï jäɨ ɨguasu embeɨ rupi oï vae rami.

³⁷ Ërei, cheYa, royu má oremichi roiko vaerä oipotagüe ïru vae tëtaguasu reta güi; ore mbaeyoa jeko pegua roñemomarai roiko opaete ɨvɨ rupi.

³⁸ Añave rupi mbaetɨ ma rogüɨreko mburuvicha guasu ave jare ñeemombeúa ave tuvicha ave, mɨmba oyeyukagüe opaetei oyeapɨ vae ave mɨmba oyeyukagüe ave mbota romeeta ndeve vae ave, incienso ave ani kia pe romee vaerä ndeve mbae iägüe tenondegua vae ave jare jökorai ndeporoparareko roväe ye vaerä.

^39-40 Ërei kuae mɨmba oyeyukagüe añave romee roï ndeve vae, orepɨatɨtɨ reve jare espíritu imara reve, eipɨɨ nde vecha jare guaka oyeyuka oyeapɨ vae rami jare jeta yeyé vecha reta ikɨra vae rami. Orepuere ye vaerä roiko opaete reve rerea re, echa güɨrovia nderé vae reta ngaraa ma jaangaiño yogüɨreko.

⁴¹ Añave roipota roiko ye rerea re orepɨa reve, romboete ko, roipota romboyerovia; agüɨye emaeño toroiko jaangaiño.

⁴² Emae kavi oreré ndepɨakavi rupi jare tuicha ndeporoparareko reve.

⁴³ ¡Oremboasayepe, cheYa, nde mbaepuere mɨakañɨ vae pe; eechauka nderee yerovia tuicha vae ko!

⁴⁴ Eyapo timara topɨta jare timichi toiko reta nderembiokuai reta re oyuvanga vae reta. ¡Eekɨ chugüi reta mbaepuere, jare emboai ipɨ̈rata!

⁴⁵ Jare tandekuaa reta nde jae ko Tumpa vae, jaeño ko Tumpa vae, yerovia tuicha vae opaete ɨvɨ rupi vae.”

⁴⁶ Kuimbae reta mburuvicha guasu pe oyeokuai vae reta jae ko opa kunumi reta omoinge horno pe vae, mbaetɨ etei oeya oapɨñambae tata kërosee pe, iraitɨ pe, temimonde indechigüe pe jare ñairaka pe.

⁴⁷ Jare tataendɨ reta, opüa veintidó metro oasa yé horno iárambo rupi,

⁴⁸ oë jare opa oapɨ Caldeaɨgua reta horno iyɨpɨ rupi ñogüɨnoi vae reta.

⁴⁹ Ërei Tumpa iaraɨgua ogüeyɨ horno pe oï vaerä Azarías jare iñeïru reta ndive, jare opa omoe horno güi ikatu kotɨ tataendɨ,

⁵⁰ jare oyapo horno japɨpe ɨvɨtu iröɨsa vae oipeyu vae rami. Jare tata oyaä etei jese reta mbaetɨ etei maratu oyapo reta kërai äve.

Mboapɨ kunumi vae reta iyemongoi

⁵¹ Jayave mboapɨ vae reta, horno japɨpe pe, omboɨpɨ oyemongoi reta metei rami metei yemongoi Tumpa omboete pegua. Körai jei reta:

⁵² “Ndepɨakavi vae ko nde, cheYa, ore ñemuñagüe reta iTumpa, jupi rupi oyemboete vaerä jare opaete yemboete oiko avei chupe vae. Nderé ikɨambae vae ko jare yerovia pegua vae, jupi rupi oyemboete vaerä vae jare opaete yemboete oiko avei chupe vae.

⁵³ Ndepɨakavi vae ko nde nde tupao ikɨambae pe jare yerovia renda pe, jupi oyemboete vaerä vae jare opaete yerovia opambae vae pegua.

⁵⁴ Ndepɨakavi vae ko nde, mburuvicha guasu iporookuaía pe oguapɨ vae, jupi oyemboete vaerä vae jare opaete yerovia opambae vae pegua.

⁵⁵ Ndepɨakavi vae ko nde, querubín reta iárambo reguapɨ reï vae ko nde jare nemae pe opa reecha oasavigüe vae, jupi oyemboete vaerä vae jare opaete yerovia opambae vae.

⁵⁶ Ndepɨakavi vae ko nde ara oasavi vae pe, jupi oyemboete vaerä vae jare yerovia opambae pegua.

⁵⁷ Pemboete Tumpa, opaete jembiapo reta vi, peyemongoi chupe opambae reve.

⁵⁸ Pemboeteño, Tumpa iaraɨgua reta, peyemongoi chupe opambae reve.

⁵⁹ Ara, pemboete, Tumpa, peyemongoi chupe opambae reve.

⁶⁰ Pemboete Tumpa, ɨ ara iárambo oï vae reta, peyemongoi chupe opambae reve.

⁶¹ Pemboete Tumpa, opaete iyasɨtata reta, peyemongoi chupe opambae reve.

⁶² Pemboete Tumpa, kuaraɨ jare yasɨ, peyemongoi chupe opambae reve.

⁶³ Pemboete Tumpa, ara regua yasɨtata reta, peyemongoi chupe opambae reve.

⁶⁴ Pemboete Tumpa, opaete ama jare ɨsápɨi reta, peyemongoi chupe jekuaekuae avei rupi.

⁶⁵ Pemboete Tumpa, opaete ɨvɨtu reta, peyemongoi chupe opambae reve.

⁶⁶ Pemboete Tumpa, tata jare araku, peyemongoi chupe opambae reve.

⁶⁷ Pemboete Tumpa, iroɨ jare araku, peyemongoi chupe opambae reve.

⁶⁸ Pemboete Tumpa, ɨsápɨi jare iroɨ michi raɨ raɨ opɨta güe, peyemongoi chupe opambae reve.

⁶⁹ Pemboete Tumpa, iroɨ jare ɨvɨtu iröɨsa vae, peyemongoi chupe opambae reve.

⁷⁰ Pemboete Tumpa, iroɨ oagüe reta jare iroɨ morotï vae, peyemongoi chupe opambae reve.

⁷¹ Pemboete Tumpa, ara reta jare pɨ̈tu reta, peyemongoi chupe opambae reve.

⁷² Pemboete Tumpa, tembipe jare pɨtumimbi, peyemongoi chupe opambae reve.

⁷³ Pemboete Tumpa, aravera reta jare amapɨtu reta, peyemongoi chupe opambae reve.

⁷⁴ Ɨvɨ, pemboete, Tumpa, peyemongoi chupe opambae reve.

⁷⁵ Pemboete Tumpa, ɨvɨtɨ reta jare ɨ̈vɨa reta, peyemongoi chupe opambae reve.

⁷⁶ Pemboete Tumpa, opaete mbae ɨvɨ re oñemuña vae reta, peyemongoi chupe opambae reve.

⁷⁷ Ɨesaɨ reta, pemboete, Tumpa, peyemongoi chupe opambae reve.

⁷⁸ Pemboete Tumpa, ɨguasu reta jare ɨ̈aka reta, peyemongoi chupe opambae reve.

⁷⁹ Pemboete Tumpa, pira tuicha yae vae reta jare ïru mbae ɨ rupigua reta, peyemongoi chupe opambae reve.

⁸⁰ Pemboete Tumpa, opaete güɨra ara rupigua reta, peyemongoi chupe opambae reve.

⁸¹ Pemboete Tumpa, opaete mɨmba tëta rupigua reta jare ñana rupigua reta, peyemongoi chupe opambae reve.

⁸² Pemboete Tumpa, opaete oikove vae reta, peyemongoi chupe opambae reve.

⁸³ Israel, pemboete, Tumpa, peyemongoi chupe opambae reve.

⁸⁴ Tumpa isacerdote reta, pemee mbaemboete chupe, peyemongoi chupe opambae reve.

⁸⁵ Tumpa jembiokuai reta, pemee mbaemboete chupe, peyemongoi chupe opambae reve.

⁸⁶ Pemboete, Tumpa, kuimbae reta iespíritu isɨmbi vae, peyemongoi chupe opambae reve.

⁸⁷ Pemboete Tumpa, ipɨa ikɨambae vae reta jare ipɨa oyembotuicha mbae reta, peyemongoi chupe opambae reve.

⁸⁸ Yamboete Tumpa, Ananías, Azarías jare Misael, yayemongoi chupe opambae reve, echa jae yandemboasayepe tɨvɨa güi, yandemboasayepe mano güi, yandemboasayepe tata horno pe jendɨ vae güi, yandemboasayepe tataendɨ reta güi.

⁸⁹ Pemee yasoropai Tumpa pe, echa jae ipɨakavi yae ko jare iporoaɨu opambae ko.

⁹⁰ Pemee mbaemboete opaete Tumpa omboete vae reta, oñemotüpa vae reta iTumpa ko jae, peyemongoi chupe, jare pemee yasoropai chupe, echa iporoaɨu opambae vae ko.”