Daniel (Deuterocanónico) 13 - Biblia Guarani Tumpa Iñee

SUSANA Susana oñono oyeyuka vaerä

¹ Oiko Babilonia pe metei kuimbae Joaquín jee vae.

² Jae güɨreko oiko metei kuña Susana jee vae, Hilcías tayɨ, jae kuñatai ikavigüe vae jare Tumpa omboete vae.

³ Tu reta ko jae jupi rupi yogüɨreko vae jaema ombokuakuaa reta ko Moisés mborookuai omee vae rupi.

⁴ Joaquín ko oikokatugüe vae, jaema jëta-ɨpɨ pe güɨnoi metei mbaepotɨ rupi ɨvɨra tuichagüe reta ndive vae. Jaema jae ko metei kuimbae má tuicha opaete güi vae, jaema judío reta güɨnoi jeko oyemboatɨ vaerä jae jëta pe.

⁵ Jókuae año oyembojee mókoi ndechi reta jókuae tëta pegua yogüɨreko vaerä teko iyavɨkɨa reta. Ërei jae ko jókuae Tumpa jei vae: “Mbae ikavimbae oyekuaa Babilonia pe vae ndechi reta jare teko iyavɨkɨa reta oiko vae jeko pegua ko echa jaangaño ko jae reta tëta iyangarekoa.”

⁶ Jókuae kuimbae reta ojoñoi Joaquín jëta pe, jare opaete vae oime mbae nunga teko güɨnoi yave ojo ikotɨ reta.

⁷ Ara mbɨte ma yave, opa ma kia reta ojo yave, Susana jaeñoi oë ojo oguata guata ime imbaepotɨrupa rupi.

⁸ Jaema jókuae mókoi ndechi reta, ara ñavo oecha yave oë ojo oguata guata, täta oipota reta omae jese.

⁹ Jare ou chupe oyemongeta pɨ̈chɨi reta vaerä; mbaetɨ imaendúa reta Tumpa re jare mbaetɨ etei imaendúa reta mbae jupigüe vae re.

¹⁰ Opareve täta oipota reta omae jese, ërei mbaetɨ omboyekuaa reta oyoupe mbae oyemongeta vae,

¹¹ echa imara reta omboyekuaa täta oipota mbae oyapo reta jae kuña ndive vae.

¹² Jaema ara ñavo ko oeka ipɨa kaviä reve kërai oecha vaerä.

¹³ Jare metei ara jei reta oyoupe: “Yaja mo ñanerëta pe, yakaru iara ma ko.” Jaema jape jape rupi ae opa ojo.

¹⁴ Ërei opa reve yepe yogüɨraja jare oñoväe reta ye jókuae aramoa pe. Jare oparandu reta yave oyoupe maera ko ou ye vae, jare opareve omombeu reta oyoupe mbae ikavimbae ko oipota oyapo vae. Jaema jayave opa oï kavi reta oyoupi oeka vaerä kërai jëgua vae ipuere vaerä oväe reta Susana jaeiño pe.

¹⁵ Güɨramoiño, oime ye ara jëgua chupe yave, Susana jeko rami aeño ojo ye mbaepotɨrupa kotɨ, jare güɨraja iguataïrurä mókoi kuñatai reta. Jare ikɨ̈reɨ oyau vaerä jókuae mbaepotɨrupa pe, echa araku yae jeko pegua.

¹⁶ Jókuae mókoi ndechi reta güi, mbaetɨ ye kia joko pe oñemi omae vɨari oï jese vae.

¹⁷ Jaema Susana jei ma jókuae kuñatai reta pe: “Peru michi cheve asaite jare yembopichea, echa aipota ayau kuae pe.”

¹⁸ Jaemai jae reta oyapo jei chupe vae; oyokenda reta mbaepotɨrupa jöke jare opa reta oë ojo ïru öke iyɨke kotɨgua rupi güeru vaerä chupe oyokuaigüe vae. Ndechi reta ko joko oñemi ñogüɨnoi joko pe, jae reta mbaetɨ oecha.

¹⁹ Jókuae kuñatai reta opa ojo rupive, jókuae ndechi reta opa oë osɨi kuñatai kotɨ.

²⁰ Jare jei reta chupe: —Emae, mbaepotɨrupa jöke oyeokenda ko oï, jare mbaetɨ kia yandereecha. Täta roipota romae nderé; jare eñemee oreve.

²¹ Mbaetɨ yave, roeta ndeve kuae pe reï metei kunumi ndive vae, jare jókuae ramo opa remoe remondo kuñatai reta vae.

²² Jaemai Susana opoko oyaeo jare jei: —¡Mbaetɨ ye mbae ayapo vaerä! Ayapo yave pe pere vae, ayeyukaukata ko, jare añemoäteɨ yave, pegüi reta aasayepe potaä.

²³ Ërei má ikavi añemoäteɨ agüɨye vaerä aa pepo pe, ndei Tumpa kotɨ cheyoa mbove.

²⁴ Jaema Susana täta jäse opaete ipɨ̈rata reve, jare jókuae mókoi ndechi reta osapúkai vi.

²⁵ Jaema metei jókuae mókoi vae reta güi osɨi ma ojo oipea mbaepotɨrupa jöke.

²⁶ Oyeendu ma jökorai mbaepotɨrupa kotɨ jäse vae yave, tëta pe ñogüɨnoi vae reta osɨi ma yogüeru oike öke iyɨke kotɨgua rupi oecha vaerä mbaerä ko oasa oï joko pe vae.

²⁷ Jare ndechi reta opoko yave jei apu oyapo ñogüɨnoi vae, tembiokuai reta opa imara opɨta, echa mbaetɨ ete oendu reta jókuae nunga ñee Susana regua.

²⁸ Jókuae pɨareve pe, tëta reta oyemboatɨ yave Joaquín jëta pe, jae ko Susana ime, yogüeru vi jókuae mókoi ndechi reta iyemongeta pɨ̈chɨigüe ndive oporoyukauka vaerä.

²⁹ Jare jei reta tëta reta jóvai: “Pemondo kia togüeru Susana, Hilcías tayɨ jare jae ko Joaquín jembireko.” Jare ojo reta ombou.

³⁰ Jaema jae ou tu reta ndive, imembɨ reta ndive jare opaete jëtara reta ndive.

³¹ Susana ko jae metei kuña ikavigüe vae.

³² Jae oñäka-soi ou metei äka-soya pe, jaema jókuae jeko kavimbae reta jei oekɨ vaerä iyeugüi iñäka-soya, ipuere vaerä oyemoangapɨɨ omae reta jova kavi re.

³³ Jare opaete jëtara reta, ivɨaka reta, jare opaete omae ñogüɨnoi jese vae reta oäpiro.

³⁴ Jaema jayave jókuae mókoi ndechi reta, oyemboɨ ñogüɨnoi ïru vae reta ipɨte pe vae, oñono reta ipo Susana iñäka re.

³⁵ Jaema jae, oyaeo reve, jovaɨva omae ara kotɨ, echa ipɨa pe güɨrovia oï Tumpa re.

³⁶ Jare ndechi reta jei ma: “Ore aeño roï ramboeve, rojo roguata guata pea mbaepotɨrenda kotɨ, jare roecha kuae kuña ojo oväe joko pe mókoi kuñatai reta ndive, oyokendauka mbaepotɨrenda jöke jare opa ye ombou jókuae kuñatai reta.

³⁷ Jarembae pegua ou ma oväe chupe metei kunumi jokotɨ yepe oñemi oï vae, jare jaemai jae oñemee chupe.

³⁸ Ore joko roï, jókuae mbaepotɨrenda jugua pe, jare roecha ma oyapo reta oï jókuae pɨ̈chɨi vae yave rosɨi rojo ikotɨ reta.

³⁹ Roecha ko oñoküava ñogüɨnoi, ërei mbaetɨ orepuere roipɨɨ jókuae kunumi, echa jae täta ipɨ̈rata oregüi, oipea öke jare osɨi oregüi.

⁴⁰ Jaema jaeño ma roipɨɨ jare roparandu chupe kia ko jókuae kunumi vae,

⁴¹ ërei mbaetɨ etei jae oipota omombeu oreve. Jókuae jae roe roechagüe vae.” Tëta reta yatɨ ñogüɨnoi vae opaete güɨrovia jese, echa amo jae reta jae ndechi reta jókuae tëta pegua jare ko jae reta yoapɨ jae teko iyavɨkɨa reta. Jökorai jaema yepe jei reta oyeyuka vaerä ma.

Daniel oñemopüa

⁴² Jaema Susana ɨvate jäse reve jei: “¡Tumpa oiko aeño vae, mbae oñeomi oï vae oikuaa vae, opaete mbae ndei oiko mbove oikuaa vae,

⁴³ nde reikuaa reï kuae kuimbae reta añetembae vae jei chekotɨ vae! ¡Mase amanota aï mbaetɨ reve ayapo metei äve kuae ipɨapochɨ vae jei chekotɨ vae!”

⁴⁴ Jare Tumpa oendu Susana jäse vae.

⁴⁵ Jare jaema güɨroasa reta güɨraja oyuka vaerä yave, Tumpa etei oñátai metei kunumi Daniel jee vae iespíritu Santo,

⁴⁶ jare jae osapúkai täta rupi: —¡Che mbaetɨ ma aikuaa kuae kuña omano yave!

⁴⁷ Opaete oyerova reta omae jese, jare oparandu reta chupe: —¿Mbae pa ko oipota jei jókuae rere vae?

⁴⁸ Jae ojo oike opaete vae ipɨte pe jare jei: —¿Täta yera pearakuaa, Israel-ɨgua reta, peyukata pei metei kuña ñanerëtaɨgua vae peparandu kavi mbae reve jare peikuaa kavimbae reve jókuae teko re?

⁴⁹ Peraja ye teko oyeecha renda pe, echa kuae kuimbae reta jei ikotɨ vae apu ko.

⁵⁰ Jaema etei jarembae pegua tëta reta opa ye oyerova. Jare ïru vae ndechi reta jei ma Daniel pe: —Eyu, eguapɨ ore ndive jare nemiari oreve, echa Tumpa ko omee vi ndeve jupigüe vae kuae ndechi reta pe oñemee rami vae.

⁵¹ Jare Daniel jei chupe reta: —Pembosɨrɨ katumí toï kuae mókoi ndechi reta, jaema che aparanduta chupe reta.

⁵² Jaema ombosɨrɨ katu reta. Jare omondo oenɨi metei jare jei chupe: —Nde ndechi ma año pe jare teko pɨ̈chɨi pe, añave oata ndeárambo opaete mbaeyoa reta ara oasagüe vae rupi reyapo güe vae,

⁵³ peñono kavi jaanga teko jupimbae reve yave remboeko kia jekombae vae reve jare remondo jeko vae, reikuaa reve Tumpa jeigüe vae: “Agüɨye eyukauka kuimbae jekombae reve.”

⁵⁴ Ërei, añetete reecha mbaeyoa oyapo yave, ere oreve mbae nunga ɨvɨra igüɨ pe pa ko ñogüɨnoi. Jare jae jei: —Castaño igüɨ pe ko ñogüɨnoi.

⁵⁵ Jare Daniel jei chupe: —¡Ikavi yae! Jare kuae ndeapu reï vae ko nemokañɨteita ¿Jayave metei ɨvɨra castaño jee vae igüɨ pe? ¡Echa Tumpa omee ma iaraɨgua pe ñee ndeyuka vaerä jare ndeapota mókoi yemboyao!

⁵⁶ Jaema jei güɨraja vaerä jókuae jare güeru vaerä ïru ndechi. Jare jei chupe: —¡Kuimbae Canaan-ɨgua, jare Judáɨgua mbae vae; mbae ikavigüe nemoamɨri jare mbae ipota ndepɨa omongɨa!

⁵⁷ Jökorai etei ko pe reta peyapo peï kuña Israel-ɨgua reta ndive, jaema jae, kɨɨye jeko pegua, oñemeeta viña peve. Ërei kuae kuña Judáɨgua mbaetɨ oipota oyapo pe ndive ikavimbae vae.

⁵⁸ Añave ere cheve, ¿Mbae nunga ɨvɨra igüɨ pe pa ko peipokou ñogüɨnoi vae? —Metei encina igüɨ pe ko ñogüɨnoi —jei.

⁵⁹ Jaema Daniel jei: —¡Ikavi yae! Nde vi ndeapu reï rekañɨtei vaerä. ¿Jayave encina igüɨ pe ñogüɨnoi? ¡Ërei Tumpa iaraɨgua joko jaemai vi neraro oï ikɨsepuku pe mókoi yemboyao vi ndeapo vaerä! ¡Jare jökoraita peyuka mókoi reve!

⁶⁰ Jökorai rupive opaete tëta reta yatɨ ñogüɨnoi vae osapúkai jare omee mbaemboete Tumpa pe, echa jae omboasa güɨnoi güɨrovia jese vae.

⁶¹ Jare Daniel oechauka ma yave jókuae mókoi ndechi reta iyapu ko ñogüɨnoi vae, jaema opaete vae iyarasɨ chupe retai ma, jaema jese retai ma oiporu reta tembiporara Susana re oiporuta tëi ñogüɨnoi vae:

⁶² Moisés mborookuai oeyagüe rami, oyuka reta. Jare jökorai jókuae ara oasayepe ye metei kuña jekombae vae jekove.

⁶³ Jaema jayave Hilcías jembireko ndive omee reta yasoropai Tumpa pe tayɨ Susana jeko pegua, jaeramiño vi Joaquin jare ïru vae jëtara reta, echa mbaetɨ teko oñeväe kuña re.

⁶⁴ Jare jókuae e ara güive, tëta reta täta oaɨu Daniel.