Apocalipsis 5 - Biblia Guarani Tumpa Iñee

Tupapire jare Vecha kuimbae taɨrusu vae

¹ Jare tenda mborookuaía pegua pe oguapɨ oï ipo iyakatu kotɨgua pe aecha metei tembikuatía oyekuatía japɨpe rupi jare ikupe rupi vae, oyeokenda oï chiu imboyaa pe vae.

² Jare aecha metei araɨgua ipɨ̈rata vae, iñeeäta reve omoërakua vae jei: “¿Kia pa jupi oyora vaerä chiu tembikuatía imboyaa jare oipea vaerä?”

³ Jare mbaetɨ etei kia ave ara pe, ani ɨvɨ pe, ani ɨvɨgüɨ pe ipuere oipea tembikuatía vae, ani omae yepe jese vae.

⁴ Jare che jeta ayaeo, echa mbaetɨ etei kia oñeväe jupi oipea vaerä tembikuatía, ani omongeta vaerä, ani omae yepe jese vaerä.

⁵ Jayave metei tenondegua okuakuaa vae reta güi jei cheve: “Agüɨye eyaeo. Mase, Judá iñemuña reta pegua yaguapope rami vae, David iyɨpɨ oporomoamɨri oyora vaerä chiu tembikuatía imboyaa jare oipea vaerä.”

⁶ Jare aecha metei Vecha kuimbae taɨrusu vae oyeyukagüe rami vae. Oyemboɨ oï jókuae tenda jare jókuae irundɨ oikove vae reta ipäu pe, tenondegua okuakuaa vae reta ipäu pe. Jae güɨnoi chiu jäti jare chiu jesa jae ko Espíritu Santo chiu jembiapo vae opaete ɨvɨ rupi oyemondo vae.

⁷ Jare jókuae Vecha kuimbae taɨrusu vae ou jare oipɨɨ tembikuatía tenda pe oguapɨ oï vae ipo iyakatu kotɨ güi.

⁸ Jare tembikuatía güɨnoi ma yave, jókuae irundɨ oikove vae reta jare jókuae veinticuatro tenondegua okuakuaa vae reta oyetavatɨka Vecha kuimbae taɨrusu vae jóvai. Metei ñavo güɨnoi arpa jare kopa oro pegua tɨnɨe ikäti kavi incienso, jae ko oporogüɨrovia vae reta iyerure;

⁹ jare jae reta otairari metei tairari ipɨau vae, jei reve: “Jupi ko nde reipɨɨ vaerä tembikuatía, jare reyora vaerä imboyaa, echa reyeyukauka, jare nderugüɨ pe oreyora Tumpa peguarä, opaete ñemuña, ñee, tëta jare tëtaguasu,

¹⁰ oreapo mburuvicha guasu retarä, sacerdote retarä ñaneTumpa pe. Jare roporookuaita ɨvɨ pe.”

¹¹ Amae jare aendu jeta araɨgua reta iñee jókuae tenda mborookuaía pegua, oikove vae reta jare jókuae tenondegua okuakuaa vae reta iyɨ́vɨri rupi. Jare jókuae araɨgua reta jeta yeyé,

¹² jare jei reta iñeeäta reve: “Vecha kuimbae taɨrusu vae oyeyukauka vae jupi ko güɨnoi vaerä mbaepuere, mbaeyekou, arakuaa, mɨ̈rata, yemboete, yemboetea jare mbaemboete.”

¹³ Jayave opaete ara pe, ɨvɨ pe, ɨvɨgüɨ pe jare ɨguasu pe ñogüɨnoi vae reta aendu jei: “Jókuae mburuvicha iguapɨa pe oguapɨ oï vae jare Vecha kuimbae taɨrusu vae, togüɨnoi mbaemboete, yemboete, yemboetea jare mbaepuere jekuaekuae avei rupi.”

¹⁴ Jayave jókuae irundɨ oikove vae reta jei: “Amén” Jare jókuae veinticuatro tenondegua okuakuaa vae reta oyetavatɨka itindɨasɨ reve omboete oiko jekuaekuae avei rupi vae.