AMÓS 9 - Biblia Guarani Tumpa Iñee

YandeYa iporojäa güi mbaetɨta ojoyepe vae

¹ Aecha yandeYa oï mɨmba oyeyuka oyeapɨ jese vae iárambo, jare jei: “Eitɨ okɨta reta jare tokana öke iguapɨka ave; jare o tosururu opaete vae iárambo; chugüi reta jembɨregüe ayukata kɨsepuku pe; mbaetɨta kia otekuarai jare ojoyepe vae.

² Yepe mona oike reta tëi matɨ ɨvɨgüɨ kotɨ, joko güi ko anoeta; yepe mona oyeupi tëi ara kotɨ, joko güi ambogüeyɨta.

³ Ɨvɨtɨ guasu Carmelo iyapɨte re oñemi yave, joko pe aekata aipɨɨ; yepe mona oñemi tëi chegüi ɨguasu jugua pe, joko pe amondota mboi oichuu vaerä.

⁴ Ani jovaicho reta pe opa oyererajauka tembipɨɨrä yave, joko pe oyeyukauka retata kɨsepuku pe; ¡amae aveita jese reta ainupa vaerä, mbaetɨta amborɨ vaerä!”

⁵ Tumpa, yandeYa Imbaepuere yae ete vae opoko ɨvɨ re yave, ɨvɨ tɨkui, jare oyaeo opaete pɨpegua reta; ¡tuichata ɨ ɨ̈aka pe rami, jare jagüeta ɨ̈aka Egipto pegua rami!

⁶ YandeYa oñono jo ara pe jare ara oasavi vae ɨvɨ iárambo; jae ko omboatɨ ɨ reta ɨguasu pegua, jare opɨyere ɨvɨ iárambo. Jae ko jee yandeYa.

⁷ YandeYa jei: “Israel iñemuña reta, pe reta peyovakeño ko Etiopíaɨgua iñemuña reta ndive. Che ko anoe Israel iñemuña reta ɨvɨ Egipto güi, jare aru filisteo reta Caftor güi, jare arameo reta Kir güi.”

⁸ YandeYa omae oï kuae tëta pegua iyoa vae reta re, jare jei: “Amboaita ɨvɨ iárambo güi, ërei mbaetɨta opaetei amboai Jacob iñemuña reta.

⁹ Echa che opata amoai moai Israel iñemuña reta, opaete vae tëtaguasu ipɨte rupi, trigo jäɨ oyembogua ürupe pe yave mbaetɨ oa jäɨ ɨvɨ pe rami.

¹⁰ Ërei omanota opaete iyoa vae reta, tëta chembae vae pegua reta; ‘Ngaraa yanderupitɨ ikavimbae’, jei vae reta.”

Israel oñemopüa pɨau yeta vae regua

¹¹ “Jókuae ara rupi che amopüata David jo oagüe, jare oyeka yekagüe ayapeteta; amopüa yeta osururugüe, ayapo yeta arakae rami,

¹² Edom güi jembɨregüe jare ïru tëtaguasu reta ou ye vaerä opɨta tëta Israel, cheree omboete vae imbaerä.” YandeYa, opaete mbaembae oyapo vae, jei körai.

¹³ YandeYa jei: “¡Mase! Outa oväe metei ara, oimeño vɨteri mbaarɨvo ramboeve, oväe yeta ma ɨvɨ oyeara vaerä, jare uva ndeiño opa oñetɨami ramboeve oväe yeta ma maetɨ iara; jare ɨvɨtɨ rupi jeta yaeta oñemuña uva.

¹⁴ Jayave Israel tëta chembae vae aru yeta tembipɨɨ güi, jare omopüa pɨau reta yeta tëta oyemboai oï vae, jare yogüɨrekota pɨpe; oñotɨ retata uva, jare jou retata tɨgüegüe, ko oyapo retata jare jou retata jemitɨ iagüe.

¹⁵ Echa añonota iɨvɨ ae pe jare ngaraa ye ma oyeekɨuka iɨvɨ che amee chupe reta vae güi.”