3 Juan 1 - Biblia Guarani Tumpa Iñee

Tamaraeme

¹ Che oporogüɨrovia vae reta itenondegua, aikuatía ndeve cherɨvɨ aaɨu vae Gayo, añete vae re.

² Cherɨvɨ aaɨu vae, aipota nde reiko kavi opaete mbaembae pe jare renoi vaerä tekove katu, reiko kavi ndeporogüɨrovia pe rami.

³ Chemboyerovia yae amogüe yanderɨvɨ reta yogüeru kuae pe omombeu cheve kërai añete vae oiko ndepɨa pe jare reiko añete vae rupi.

⁴ Añete ko, ayerovia yae aendu yave kërai cheraɨ reta jekuaeño yogüɨreko añete vae rupi.

Gayo omborɨ ïru oporogüɨrovia vae reta

⁵ Cherɨvɨ aaɨu vae, ikavigüe yae ko reyapo remborɨ yave oporogüɨrovia vae reta, ërei ikavi yae ete ko ketɨgua yave.

⁶ Jae reta etei imiari ndeporoaɨu re oporogüɨrovia vae reta jóvai. Ikavi yae ko remborɨ reta vaerä Tumpa pe reyeokuai rami, ojo vaerä ojoa kotɨ.

⁷ Echa jae reta oguata yogüɨreko oaɨu ramo Jesucristo, omboresivembae reve mbae oporogüɨroviambae vae reta güi.

⁸ Jáeramo ikavi ko yande yamboresive jókuae nunga reta, echa jökorai yandepuere yamborɨ omoërakua vaerä añete vae.

Ikavimbae Diótrefes oyapo vae

⁹ Che aikuatía oporogüɨrovia vae reta pe. Ërei Diótrefes oipotaä oyapo roe chupe oyapo vaerä vae, echa omomora oiko tenondeguarä.

¹⁰ Jáeramo che aja yave pépɨri amboetata Diótrefes pe oyapo vae re. Echa jae imiari ikavimbae vae orekotɨ. Jare jokuaeñoä, mbaetɨ vi omboresive oporogüɨrovia vae ketɨgua, jare oyopia oipota tëi omboresive vae reta güi, jare omombo oporogüɨrovia vae reta ipɨte güi.

Opaete vae imiari kavi Demetrio re

¹¹ Cherɨvɨ aaɨu vae, agüɨye emomoe ikavimbae vae, emomoe ikavi vaeño. Ikavi vae oyapo vae Tumpa taɨ ko. Ërei ikavimbae vae oyapo vae mbaetɨ ko oikuaa Tumpa.

¹² Opaete vae imiari kavi Demetrio re. Echa jae oiko añete vae rupi. Ore vi romombeu peve jae jekuaeño oyapo ikavi vae. Jare peikuaa ore romombeu peve vae añete ko.

Tamaraeme reta

¹³ Aipota tëi jeta aikuatía ndeve, ërei mbaetɨ aipota aikuatía ndeve tupapire rupi,

¹⁴ echa aipota roecha jarembaeño, ñanemiari vaerä oyoova pe etei.

¹⁵ Tumpa ipɨakatu toï nde ndive. Yandevɨa-ïru reta omondo tamaraeme ndeve. Jökoraiño vi nde emombeu tamaraeme metei ñavo yandevɨa-ïru reta pe.