2 REYES 25 - Biblia Guarani Tumpa Iñee

¹ Sedequías chau año ma oiko mburuvicha guasurä yave, payandepoa yasɨ, payandepo araa pe, Nabucodonosor mburuvicha guasu Babilonia pegua ou opaete isundaro reta ndive oporepeña Jerusalén re jare opa oñova. Oyembojeyupa reta jare omopüa reta yeupika jókuae tëta guasu iyɨ́vɨri rupi.

² Jare tëta guasu oñeova oiko Sedequías once año ma oiko mburuvicha guasurä yave regua.

³ Irundɨa yasɨ chau araa pe, jókuae año re karuai jeiete yae ma jókuae tëta pe, mbaetɨ ma oime tembiurä jókuae tëta pegua reta pe.

⁴ Jayave oipea reta japerä tëta guasu ikësea rupi, yepe tëi Caldeaɨgua reta oñova güɨnoi, mburuvicha guasu jare opaete sundaro reta otekuarai tëta guasu güi pɨ̈tu yave. Ñogüɨnoe reta öke tëta guasu ikësea mókoi oyóvai ñogüɨnoi vae ipäu pe oï vae rupi mburuvicha guasu iko raɨ rupi; ojo mburuvicha guasu tape Arabá kotɨ ojo vae rupi.

⁵ Ërei sundaro Caldeaɨgua reta oaɨkuemoña mburuvicha guasu Sedequías, jare oupitɨ reta ɨvɨpe kavi Jericó pegua pe. Isundaro reta opa oñemoai moai chugüi.

⁶ Sundaro Caldeaɨgua reta oipɨɨ mburuvicha guasu Sedequías jare güɨraja reta mburuvicha guasu Babilonia pegua pe, tëta Ribla pe, joko pe jei reta chupe kërai oiporara vaerä.

⁷ Opa oñaseokɨ̈ti Sedequías taɨ reta jae jovake etei; jare Sedequías güi güɨnoe reta jesäɨ, jare oipokua reta karena pe güɨraja Babilonia kotɨ.

Tupao guasu opa oyemboai

⁸ Pandepoa yasɨ chiu araa pe, diecinueve año ma Nabucodonosor oiko mburuvicha guasurä Babilonia pe yave, ou Jerusalén pe Nabuzaradán, sundaro oporoäro vae reta juvicha, jae ko mburuvicha guasu Babilonia pegua iyɨvɨrigua,

⁹ jare oapɨ yandeYa jo, mburuvicha guasu jo, jare opaete o reta Jerusalén pegua; oapɨ opaete mburuvicha reta jo.

¹⁰ Jare opaete sundaro Caldeaɨgua reta ñogüɨnoi jókuae sundaro ruvicha ndive vae, güɨroyere ombosururu reta Jerusalén ikësea.

¹¹ Jare opɨtaño tëta pe vae reta, mburuvicha guasu Babilonia pegua pe jaeiño opa oñemee vae reta jare opaete paravete vae opɨtaño vae reta, oipɨɨ güɨraja Nabuzaradán, sundaro oporoäro vae reta juvicha.

¹² Ërei ngatu jókuae ɨvɨ pegua paravete yae ete vae reta, opaño oeya Nabuzaradán, sundaro oporoäro vae reta juvicha, oparavɨkɨ reta vaerä uvarupa rupi jare ko rupi.

¹³ Sundaro Caldeaɨgua reta oyasɨa yandeYa jo pe okɨta jiero iyu vae pegua, jare ɨrɨru iguapɨka reta, jare ɨrɨru jiero iyu vae pegua yandeYa jo pe oï vae, jare opa güɨraja reta Babilonia kotɨ.

¹⁴ Güɨraja reta vi yapepo reta, sɨpe reta, mechero imecha oyeasɨa pɨpe vae tenasa reta, kuchara guasu reta, jare opaete jiero iyu vae pegua tembiporu reta mbaemboete oyeapo pɨpe vae.

¹⁵ Jaeramiño vi sundaro oporoäro vae reta juvicha güɨraja opaete tembiporu reta oro pegua jare korepoti pegua: Tätapɨi-rɨru jare tasa guasu.

¹⁶ Jókuae mókoi okɨta guasu reta, jare ɨrɨru tuicha vae jare iguapɨka reta mburuvicha guasu Salomón oyapouka yandeYa jo peguarä vae, jókuae reta ipoɨgüe mbaetɨ ipuere oñejäa.

¹⁷ Metei okɨta guasu ñavo güɨnoi juri metro ɨvategüe, jare iyapɨte re güɨnoi okɨta iyapɨte regua omopöra vae jiero iyu vae pegua, mókoi metro oasa yé ɨvategüe, jókuae okɨta iyapɨte regua omopöra vae oñeova oñeope jiero iyu vae pegua pe, jare oñemopöra granada iä pe; jökorai mókoi reve jókuae okɨta guasu reta.

Tëtaguasu Judá oyereraja tembipɨɨrä

¹⁸ Sundaro oporoäro vae reta juvicha oipɨɨ vi sacerdote tenondegua Seraías, jare taɨkuegua sacerdote Sofonías, jare tupao jöke järoa mboapɨ reve.

¹⁹ Tëta guasu pegua reta güi oipɨɨ ñeraro regua reta juvicha, pandepo kuimbae mburuvicha guasu iyɨvɨrigua reta tëta guasu pe ñogüɨnoi vae, sundarorä oporoenɨi vae jare sesenta kuimbae reta jërakuagüe yae vae, tëta guasu pe ñogüɨnoi vae.

²⁰ Nabuzaradán güɨraja opaete kuae reta tëta Ribla pe, mburuvicha guasu Babilonia pegua pe.

²¹ Joko pe mburuvicha guasu Babilonia pegua oyukauka reta, ɨvɨ Hamat pe. Jökorai tëta Judá oyererajauka tembipɨɨrä iɨvɨ güi.

Jembɨregüe reta otekuarai Egipto kotɨ

²² Nabucodonosor mburuvicha guasu Babilonia pegua oiparavo mburuvicharä Gedalías, Ahicam taɨ, Safán jɨmɨmino, oyangareko vaerä Judá pe jae oeyagüe reta re.

²³ Judá pegua sundaro ruvicha reta, jare opaete isundaro reta oikuaa yave kuae regua, yogüeru Mizpa pe imiari vaerä Gedalías ndive. Jae ko Ismael, Netanías taɨ; Johanán, Carea taɨ; Seraías, Netofaɨgua Tanhumet taɨ; jare Jaazanías, metei kuimbae Maaca pegua taɨ. Yogüeru jupiegua ndive ndive.

²⁴ Jayave Gedalías jei Tumpa jee re chupe reta jare jupiegua reta pe: “Agüɨye pekɨɨye Caldeaɨgua sundaro juvicha reta güi, peiko kuae ɨvɨ pe, peyeokuai mburuvicha guasu Babilonia pegua pe, jare peiko kavita.”

²⁵ Ërei chiúa yasɨ pe ou Ismael, Netanías taɨ, Elisama jɨmɨmino, jae ko Judá pegua mburuvicha iñemuña, güeru jupíe payandepo kuimbae, jare oyuka reta Gedalías; oyuka reta vi Judá pegua reta jare Caldeaɨgua reta jae ndive ñogüɨnoi Mizpa pe vae.

²⁶ Jayave opaete vae opa opüa yogüɨraja, michia güive jare okuakuaa vae reta sundaro reta juvicha ndive Egipto kotɨ, Caldeaɨgua reta güi okɨɨye jeko pegua.

Joaquín iyeyora jare omboresive mboromboete Babilonia pe

²⁷ Oasa treinta y siete año ma Joaquín mburuvicha guasu Judá pegua oiko tembipɨɨrä yave, docea yasɨ veintisiete araa pe, Evil-merodac metei año ma oï mburuvicha guasurä Babilonia pe yave oyora Joaquín, mburuvicha guasu Judá pegua, güɨnoe tembipɨɨrɨru güi,

²⁸ omomiari ñee kavi rupi, jare oñono kavi ïru mburuvicha guasu reta jae ndive yogüɨreko Babilonia pe vae reta güi.

²⁹ Jökorai Joaquín oipoepɨ jemimonde reta tembipɨɨrä oiko pegua, jare okaru avei mburuvicha guasu ndive opaete ara oikove oiko ramboeve.

³⁰ Jökorai ara ñavo oñemee Joaquín pe tembíu, mburuvicha guasu Babilonia pegua jee re, opaete ara oikove oiko ramboeve.