2 REYES 23 - Biblia Guarani Tumpa Iñee

¹ Jayave mburuvicha guasu omboatɨuka opaete tenondegua reta Judá pegua jare Jerusalén pegua.

² Jare mburuvicha guasu ojo yandeYa jo kotɨ opaete kuimbae Judá pegua reta ndive, jare Jerusalén pegua reta ndive, sacerdote reta, ñeemombeúa reta, opaetei joko pegua reta ndive; michi vae reta güive jare opaete okuakuaa vae reta. Joko pe mburuvicha guasu omongeta opaete jókuae tembikuatía morogüɨrökuavee päve pegua pe oyekuatía oï vae, yandeYa jo pe oñeväe vae.

³ Javoi mburuvicha guasu oyemboɨ okɨta iyɨpɨ pe oyapo morogüɨrökuavee päve yandeYa jóvai, yogüɨreko vaerä jae jeia re, oyapo reta vaerä iporookuai reta jupi rupi kavi opaete ipɨa ndive, opaete jekove ndive, oyapo reta vaerä opaete ñee reta morogüɨrökuavee päve pegua oyekuatía oï jókuae tembikuatía pe vae. Opaete tëta pegua reta opɨta vi ipɨakatu reve kuae morogüɨrökuavee päve oyeapo vae re.

Josías omaeñono kavi ye

⁴ Jayave mburuvicha guasu oyókuai sacerdote tenondegua Hilcías, jare taɨkuegua sacerdote reta jare öke iyangarekoa reta, güɨnoe vaerä yandeYa jo güi opaete mbaembae oyeapo tumpa-raanga Baal jare Asera, jare opaete ara ipo reta peguarä vae; jare oapɨ reta Jerusalén güi ikatu pe, Cedrón jee vae pe, javoi itanimbugüe güɨrajauka reta Bet-el pe.

⁵ Javoi opa omoë omombo sacerdote reta mburuvicha guasu reta Judá pegua oñono sacerdoterä vae, oapɨ reta vaerä ikäti kavi vae incienso mbaemboete renda ɨvɨtɨ rupigua, tëta guasu reta Judá pegua rupi jare Jerusalén iyɨ́vɨri ñogüɨnoi vae reta rupi vae, jaeramiño vi ikäti kavi vae incienso oapɨ reta Baal pe vae, kuaraɨ pe jare yasɨ pe vae, yasɨtata reta pe vae, jare opaete ïru ara ipo reta pe vae.

⁶ Güɨnoeuka vi Asera iä yandeYa jo güi, Jerusalén güi ikatu pe, oapɨ ɨvɨtɨ päu ipe kavi vae Cedrón pe, opaetei itanimbu regua; jare itanimbugüe omoai reta jókuae tëta pegua reta jɨvɨa re.

⁷ Omboai vi o reta, kuimbae reta oyogüɨroke rupi ombaemboete pɨpe vae yandeYa jo iyɨ́vɨri ñogüɨnoi vae, joko pe vi kuña reta oyapo asoya Asera peguarä.

⁸ Javoi oenɨiuka yogüeru vaerä opaete sacerdote reta tëta guasu reta Judá pegua güi; güɨröɨro güi omboai opaete mbaemboete renda ɨvɨtɨ rupigua sacerdote reta mburuvicha guasu oñono vae reta, oapɨ pɨpe ikäti kavi vae incienso vae reta, Geba güive Beerseba kotɨ; omboai vi mɨmba oyeyuka oyeapɨ jese vae reta, Josué jëta guasu juvicha jöke pe ñogüɨnoi vae, tëta guasu jöke iyasu kotɨ ñogüɨnoi vae reta.

⁹ Jókuae sacerdote reta mbaemboete renda ɨvɨtɨ rupigua pegua reta mbaetɨ yogüɨraja mɨmba oyeyuka oyeapɨ jese vae yandeYa imbae oïa pe, Jerusalén pe; ërei jou reta mbɨyape oyembovumbae jëtara sacerdote reta ndive.

¹⁰ Josías güɨröɨro güi omboai vi mbaemboete renda reta Tofet pegua, ɨvɨtɨ päu Hinom pe oï vae pegua, agüɨye vaerä ma metei ave oapɨ taɨ ani tayɨ, Moloc pe.

¹¹ Güɨnoe vi kavayu reta Judá pegua mburuvicha guasu reta güɨrökuavee kuaraɨ pe vae, yandeYa jo jöke pe ñogüɨnoi vae, eunuco Natán-melec mɨmba ikarúa renda re oyangareko vae jo jóvai, jare oapɨ vi käretou reta, kuaraɨ pe oñererökuavee vae reta.

¹² Omboai vi mɨmba oyeyuka oyeapɨ jese vae reta, mburuvicha guasu reta Judá pegua oyapo Acaz jo iárambo vae, jare mɨmba oyeyuka oyeapɨ jese vae reta Manasés omopüa yandeYa jo joka pe vae; opa oyoka jare ikuigüe opa omoai ɨ̈aka raɨ Cedrón pe.

¹³ Jaeramiño vi mburuvicha guasu güɨröɨro güi omboai mbaemboete renda ɨvɨtɨ rupigua Jerusalén jóvai oï vae, ɨvɨtɨ Olivo güi arayevɨ kotɨ, kuae reta jae ko Salomón mburuvicha guasu Jerusalén pegua omopüa Astoret peguarä vae, Sidón-ɨgua reta itumpa kuña ikavimbae yae vae; Quemos peguarä, Moab pegua reta itumpa-raanga ikavimbae yae vae, jare Milcom, Amón iñemuña reta itumpa-raanga ikavimbae yae vae.

¹⁴ Oyoka vi tumpa-raanga reta iä ita pegua jare opa oyasɨa Asera iä reta ɨvɨra pegua, jókuae reta jendagüe opa omotɨnɨe kuimbae reta ikägüegüe pe.

¹⁵ Jaeramiño vi, mɨmba oyeyuka oyeapɨ jese vae Bet-el pe oï vae, mbaemboete renda ɨvɨtɨ rupigua Jeroboam, Nabat taɨ oyapo vae, kuae rupi Israel iñemuña reta pe oyapouka mbaeyoa; Josías opa oyoka, opaetei omongúi jare oapɨ Asera iä.

¹⁶ Josías oyerova ye yave, oecha tɨvɨa reta ɨvɨtɨ re, jare omondo güɨnoeuka maekägüe reta joko pe oï vae, jare oapɨ mɨmba oyeyuka oyeapɨ jese vae re omongɨa vaerä Tumpa jóvai. Jökorai oyembopo yandeYa jei iñeemombeúa rupi vae.

¹⁷ Javoi oparandu: —¿Mbae regua pa kuae oñemopüa oï vae? Jókuae tëta guasu pegua reta jei chupe: —Jae ko yandeYa iñeemombeúa Judá güi ou vae jɨvɨa, jae omombeu kuae mbaembae reta nde reyapo mɨmba oyeyuka oyeapɨ jese vae Bet-el pegua re vae.

¹⁸ Jayave Josías jei: —Peeya jökoraiño. Agüɨye kia ave topoko ikägüe reta re. Jökorai mbaetɨ mbae oyeapo ikägüegüe reta pe, jare ñeemombeúa Samaria güi ou vae ikägüegüe pe.

¹⁹ Jare opaete mbaemboete renda ɨvɨtɨ rupigua reta, tëta guasu reta ɨvɨ Samaria pe oï vae reta; kuaekuae oyapo Israel pegua mburuvicha guasu reta vae rupi omboarasɨuka yandeYa. Josías opa vi omboai, Bet-el pe oyapo rami etei.

²⁰ Oyuka vi mɨmba oyeyuka oyeapɨ jese vae re opaete sacerdoterä ñogüɨnoi mbaemboete renda ɨvɨtɨ rupigua rupi vae, oapɨ jese reta ïru sacerdote reta ikägüegüe. Javoi oyerova ye Jerusalén kotɨ.

Josías oyapo Pascua

²¹ Jayave mburuvicha guasu oyókuai opaete vae, jei körai: —Peyapo Pascua yandeYa Tumpa pe kuae tembikuatía morogüɨrökuavee päve pegua pe oyekuatía oï vae jei rami.

²² Mbaetɨ yepe oyeapo kavi oiko Pascua, mburuvicha oporojäa vae reta yogüɨrekose mburuvicharä Israel pe yave güive ani opaete mburuvicha guasu reta Israel pe jare Judá pe yogüɨreko yave ave.

²³ Josías dieciocho año ma oiko mburuvicha guasurä yave oyeapo Pascua yandeYa pe, Jerusalén pe.

Tumpa jekuaeñoi iyarasɨ tëta Judá pegua reta kotɨ

²⁴ Josías opa vi oyuka imbaekuaa vae reta, maratuta vae imombeúa reta, opa vi omboai tumpa-raanga o rupigua reta, ïru tumpa-raanga reta, opaete mbaembae pɨ̈chɨigüe oime Judá pe, jare Jerusalén pe vae. Oyapo ombopo vaerä Sacerdote Hilcías oväe yandeYa jo pe tembikuatía mborookuai oï pɨpe vae pe jei vae.

²⁵ Mbaetɨ yé chugüi, ïru mburuvicha guasu jae ndei oiko mbove ani taɨkue rupi, jae rami oyepoepɨ yandeYa pe opaete ipɨa ndive, opaete jekove ndive, jare opaete imbaepuere ndive vae, opaete Moisés iporookuai jei rami.

²⁶ Opaete kuae reve yandeYa jekuaeñoi iyarasɨ Judá kotɨ, opaete ikavimbae Manasés oyapo vae re.

²⁷ Jáeramo yandeYa jei omombo vaerä matɨ iyeugüi Judá, Israel omombo iyeugüi rami, güɨröɨro vaerä tëta Jerusalén, jae oiparavo iyeupe vae, o jae jee oñono tëi joko pe vae.

Josías imano

²⁸ Ïru mbaembae Josías regua, opaete oyapogüe oyekuatía oï tembikuatía pe, Judá pegua mburuvicha guasu reta regua oyekuatía oïa pe.

²⁹ Jókuae ara rupi Faraón Necao, mburuvicha guasu Egipto pegua ojo ɨ̈aka Éufrates kotɨ oporepeña vaerä mburuvicha guasu Asiria pegua re. Javoi mburuvicha guasu Josías oë japerä pe; ërei Necao oecha rupive oyuka Meguido pe.

³⁰ Jare iyɨvɨrigua reta oñono käretou pe, jökorai jëogüegüe güeru reta Meguido güi Jerusalén pe; oñotɨ reta jɨvɨa ae pe. Jayave jókuae tëta pegua reta oiparavo Joacaz, Josías taɨ omboguapɨ jekovia pe mburuvicha guasurä.

Joacaz oguapɨ tëi mburuvicha guasurä

³¹ Joacaz güɨnoi veintitré año omboɨpɨ oï mburuvicha guasurä yave; oiko mburuvicha guasurä Jerusalén pe mboapɨ yasɨ. Ichɨ jee Hamutal, Jeremías tayɨ, jae ko tëta Libna pegua.

³² Oyapo ikavimbae yandeYa jesa róvai, opaete mbaembae iñemuñagüe reta oyapo rami.

³³ Faraón Necao güɨreko tembipɨɨrä Joacaz tëta Ribla pe, ɨvɨ Hamat pe, agüɨye vaerä oiko mburuvicha guasurä Jerusalén pe; jare oñono tëtaguasu ombaemboepɨ vaerä tres mil tresciento kilo korepoti jare treinta y tres kilo oro.

³⁴ Jayave Faraón Necao oñono mburuvicha guasurä Eliaquim, tu Josías jekovia pe, jare oipoepɨ chugüi jee Joacim pe; oipɨɨ Joacaz güɨraja Egipto kotɨ, joko pe omano.

³⁵ Joacim omee korepoti jare oro Faraón pe, jae oiporu chupe vae; kuaerä oeka kërai okovara vaerä opaete jókuae tëtaguasu pegua reta pe. Metei ñavo ombaemboepɨ korepoti pe jare oro pe imbaembae oime rupi, Faraón Necao peguarä.

Joacim oiko mburuvicha guasurä Judá pe

³⁶ Joacim güɨnoi veinticinco año omboɨpɨ oï mburuvicha guasurä yave; once año oiko mburuvicha guasurä Jerusalén pe. Ichɨ jee Zebuda, Pedaías tayɨ, jae ko tëta Ruma pegua.

³⁷ Ërei oyapo ikavimbae yandeYa jesa róvai, opaete mbaembae iñemuñagüe reta oyapo rami.