2 CRÓNICAS 7 - Biblia Guarani Tumpa Iñee

¹ Jare Salomón opa oyerure yave, ou tata ara güi, jare opa oapɨ mɨmba oyeyukagüe opaeteita oyeapɨ vae, jare mɨmba oyeyukagüe reta, jare yandeYa iyemboetea tɨnɨe tupao guasu.

² Jare sacerdote reta mbaetɨ ipuere oike yandeYa itupao guasu pe, echa yandeYa iyemboetea tɨnɨe tupao guasu.

³ Jare Israel iñemuña reta oecha yave ou tata jare yandeYa iyemboetea tupao guasu re, oyetavatɨka reta itindɨasɨ piso re omboete reta jare omee reta yasoropai yandeYa pe, jei reta reve: “Echa jae ipɨakavi jare iporoparareko jekuae avei.”

⁴ Jayave mburuvicha guasu opaete Israel iñemuña reta ndive omee mɨmba oyeyukagüe yandeYa pe.

⁵ Jare mburuvicha guasu Salomón omee mɨmba oyeyukagüe vae: Veintidó mil toro jare ciento veinte mil vecha. Jökorai mburuvicha guasu jare opaete vae oñono tee reta tupao guasu Tumpa pe.

⁶ Jare sacerdote reta oyapo iparavɨkɨ, jaeramiño vi levita reta, tembiporu tairari pegua ndive, kuae temimbɨ reta oyapouka mburuvicha guasu David omboete vaerä yandeYa, jei reve: “Echa iporoparareko jekuae avei”, David ombaemboete yepi jókuae temimbɨ reta pe. Jaeramiño vi sacerdote reta omoñee mimbɨguasu jae reta jóvai, jare opaete Israel iñemuña reta oyemboɨ ñogüɨnoi.

⁷ Jaeramiño vi Salomón oñono tee yandeYa itupao guasu joka, jöke jenonde oï vae, echa joko pe omee mɨmba oyeyukagüe opaetei oyeapɨ vae jare mɨmba oyeyukagüe yembopɨakatu pegua ikɨragüe, echa mɨmba oyeyuka oyeapɨ jese vae jiero iyu vae pegua Salomón oyapo vae, mbaetɨ iyave mɨmba oyeyukagüe opaetei oyeapɨ vae reta, mbota reta temitɨ jäɨ jare mɨmba ikɨragüe reta.

⁸ Jayave Salomón oyapo arete chiu ara, jeta yeyé yatɨ vae, yogüeru Hamat güive ɨ̈aka raɨ Egipto kotɨ güi.

⁹ Juría ara pe oyapo reta yemboatɨ guasu mbaemboete pegua, echa mɨmba oyeyuka oyeapɨ jese vae oñeñono tee vae omboarete reta chiu ara, jare chiu ara vi arete küaraɨa ñairaka pegua.

¹⁰ Chiúa yasɨ veintitré araa pe opa omondo jeta vae reta jëta kotɨ, yerovia jare mbɨakatu yandeYa omborɨ ramo David, Salomón jare opaete Israel pegua reta.

Tumpa oyapo morogüɨrökuavee päve Salomón ndive

¹¹ Salomón opa oyapo tupao guasu yandeYa peguarä jare o mburuvicha guasu iporookuaía peguarä; opaete Salomón oyemongeta ipɨa pe oyapo vaerä yandeYa jo pe jare jae jo iporookuaía peguarä vae, opa kavi oyapo.

¹² Jare yandeYa oyeechauka Salomón pe pɨ̈tu yave jare jei chupe: “Che aendu ndeyerure jare aiparavo cheyeupe kuae o mɨmba oyeyukagüe oñemee vae peguarä.

¹³ Ayopia ara agüɨye vaerä okɨ yave, ambou tuku opa vaerä ñana jou ɨvɨ re yave ani ambou mbaerasɨ ovakatu vae chembae vae reta re yave,

¹⁴ ërei chembae vae reta, jese reta cheree oyemboeteuka vae oñemomichi reve oyerure reta chereeka yave, jare oyepoepɨ reta jeko ikavimbae güi yave, che aenduta iyerure reta ara güi jare cheɨ̈rota chupe reta iyoa re, jare iɨvɨ pe oime yeta jeta mbaembae.

¹⁵ Añave amaeta jare aendu aveita yerure oyeapo kuae güi vae,

¹⁶ echa añave aiparavo jare añono tee kuae tupao guasu, pɨpe oiko vaerä cheree jekuae avei rupi. Amae aveita jare jeseita chepɨa.

¹⁷ Jare nde reguata yave nderu David oguata rami, reyapo opaete cheporookuai reta yave,

¹⁸ che amoañeteta ndeporookuaía nderu David pe arökuavee rami jae reve: ‘Ngaraa oata neñemuña güi metei kuimbae mburuvicha guasurä Israel pe.’

¹⁹ Ërei pe reta peyerova jare peeya cheporookuai reta amee peve vae, jare pemboete tumpa ambuae reta yave,

²⁰ pogüɨnoeta kuae ɨvɨ amee peve vae güi, jare kuae tupao guasu añono tee cheree re vae amombota cheróvai güi, oikota ïru tëta reta oyóyai yóyai vaeräño.

²¹ Jare kuae tupao guasu ipöra yae vae jendagüeño opɨtata, jare opaete oasa jokoropi vae omopɨakañɨta jare jei retata: ‘¿Maera ra körai Tumpa oyapo kuae ɨvɨ jare kuae tupao guasu?’

²² Jare jei retata iyeupe, oeya reta ramo iYa iñemuñagüe reta iTumpa ɨvɨ Egipto güi güɨnoe vae, jare tumpa ambuae pei oyeokuai jare omboete reta, jáeramo güeru opaete kuae mbae ikavimbae jese reta.”