2 CRÓNICAS 6 - Biblia Guarani Tumpa Iñee

Tupao guasu oñeñono tee

¹ Jayave Salomón jei: “CheYa, nde rere, reyekuaambae ko reikota vae.

² Ërei che amopüa o ndeveguarä, pɨpe eiko jekuae avei pegua.”

³ Javoi mburuvicha guasu oyerova omae Israel iñemuña reta yatɨ ñogüɨnoi vae kotɨ, jare jei ñee kavi ikotɨ reta; jare opaete Israel iñemuña reta oyemboatɨ vae oyemboɨ ñogüɨnoi.

⁴ Jei reve: “Toyemboete yandeYa, Israel iTumpa, jae ombopo iñee güɨrökuavee cheru David pe vae, jei reve:

⁵ ‘Jókuae ara anoe güive chembae vae reta ɨvɨ Egipto güi, mbaetɨ aiparavo metei ave tëta guasu ñemuña reta güi Israel pe, pɨpe oñemopüa vaerä tupao guasu joko pe oiko vaerä cheree, ani mbaetɨ vi aiparavo metei kuimbae oiko vaerä mburuvicharä chembae reta Israel re.

⁶ Ërei aiparavo Jerusalén, joko pe oï vaerä cheree, jare aiparavo David oï vaerä tëta chembae vae Israel juvicharä.’

⁷ Jare cheru David oyemongeta omopüa vaerä tupao guasu yandeYa Israel iTumpa pe jee re.

⁸ Ërei yandeYa jei cheru David pe: ‘Ndepɨa pe reyemongeta remopüa vaerä tupao guasu cheree re vae ikavi ko;

⁹ ërei nde mbaetɨta remopüa, nderaɨ renoita vae, jae omopüata tupao guasu cheree re.’

¹⁰ Jare yandeYa ombopo iñee jeigüe vae. Echa che apüa cheru David jekovia pe, jare aguapɨ Israel pe mburuvicha guasu iguapɨa pe yandeYa jei rami, jare amopüa tupao guasu yandeYa pe, Israel iTumpa jee re.

¹¹ Jare kuae tupao guasu pe añono Tumpa ikäjou, pɨpe oï yandeYa iporogüɨrökuavee päve oyapo Israel iñemuña reta ndive vae.”

¹² Javoi Salomón oñeñono mɨmba oyeyuka oyeapɨ jese vae yandeYa imbae jóvai, opaete Israel iñemuña reta jóvai, jare omopüa ipo.

¹³ Echa Salomón oyapo metei oñemoñee jese vaerä jiero iyu vae pegua, mókoi metro y medio pukugüe jare ipɨgüe, jare metei metro treinta y cinco centímetro ɨvategüe, kuae oñono tupao guasu joka mbɨte pe, jare jókuae re oyetavatɨka Israel iñemuña reta jóvai jare omopüa ipo ara kotɨ jare jei:

¹⁴ “CheYa, Israel iTumpa, mbaetɨ Tumpa nde rami vae ara pe ani ɨvɨ pe, rembopo morogüɨrökuavee päve reyapo vae jare reiparareko nderembiokuai ipɨa reve kavi oyeokuai ndeve vae reta;

¹⁵ nderembiokuai cheru David pe rembopo rerökuavee vae; neñee pe rerökuavee vae ndembaepuere rupi rembopo añave oyekuaa oï vae.

¹⁶ Jáeramo cheYa, Israel iTumpa embopo neñee cheru David pe rerökuavee vae, echa rere: ‘Ngaraa oata kuimbae neñemuña reta güi oguapɨ vaerä mburuvicha guasurä Israel re, nderaɨ reta yogüɨreko kavi yave jare oyapo reta cheporookuai nde reiko rami cheróvai yave.’

¹⁷ Jáeramo cheYa, Israel iTumpa, toyembopo neñee rerökuavee nderembiokuai David pe vae.

¹⁸ Ërei, ¿añetete ra ko Tumpa oikota kuimbae reta ipɨte pe ɨvɨ pe? Mase, ara reta viña pa ipɨguasuä ndeve, ¡vɨtei pa kuae tupao che amopüagüe!

¹⁹ Ërei nde cheYa Tumpa, eendu che nderembiokuai iyerure jare iporomoñera añave ayapo aï nderóvai vae.

²⁰ Emae avei ara pe jare pɨ̈tu yave kuae tupao guasu re, nde rere reï aveita pɨpe vae. Eendu cheyerure kuae güi cheYa.

²¹ Jaeramiño vi eendu che nderembiokuai iporomoñera jare ndembae Israel iñemuña reta oyerure kuae güi yave. Eendu ara güi nde reikoa güi jare neɨ̈ro chupe reta.

²² Kia nunga vae iyoa yave japicha kotɨ, jare güeru jei vaerä añete vae nderee re mɨmba oyeyuka oyeapɨ jese vae jóvai kuae tupao guasu pe yave,

²³ nde eendu ara güi, eyapo jupi vae nderembiokuai reta pe. Jeko vae toiporara jeko re aeño, jare jekombae vae embojupi jeko kavi rupi.

²⁴ Ndembae Israel iñemuña reta iñamɨri jovaicho reta pe yave iyoa ramo ndekotɨ, ërei oyepoepɨ reta jeko güi jare omboete nderee jare oyerure reta ndeve kuae tupao guasu güi yave,

²⁵ nde eendu ara güi, neɨ̈ro Israel iñemuña reta pe iyoa re, jare emboyerova ye kuae ɨvɨ nde remee chupe reta jare iñemuñagüe reta pe vae pe.

²⁶ Ɨvɨ otini jare okɨä iyoa reta ndekotɨ jeko pegua yave, ërei oyerure reta yave ndeve kuae tupao guasu güi jare oyepoepɨ reta jeko güi, jare omboete nderee yave,

²⁷ nde eendu iyerure reta ara güi jare neɨ̈ro nderembiokuai reta pe jare ndembae Israel iñemuña reta pe iyoa re, jare emboe reta ikavi oguata vaerä. Javoi embou ama kuae ɨvɨ nde remee ndembae reta pe vae re.

²⁸ Oime karuai kuae ɨvɨ pe yave, ani mbaerasɨ guasu ani temitɨ imbaerasɨ, tuku reta, ani tovaicho reta oñova orerëta reta yave ani oipotagüe susere ani mbaerasɨ ovakatu vae,

²⁹ oipotagüe kuimbae ani opaete ndembae Israel iñemuña reta oyerure ndeve yave, oecha isusere jasɨ katu yave jare oyerure ndekotɨ ipo omopüa reve kuae tupao guasu kotɨ yave,

³⁰ nde eendu ara güi, reikoa güi, neɨ̈ro chupe jare emboekovia chupe oguata kavi rupi, echa ndeño reikuaa opaete kuimbae reta ipɨa jare iyemongeta.

³¹ Oipoɨu reta vaerä jare oguata kavi vaerä opaete ara yogüɨreko kuae ɨvɨ remee oreñemuñagüe reta pe vae pe.

³² Jaeramiño vi ketɨgua, tëta ndembae peguambae vae, ou yave mombɨrɨ güi nderee jërakua yae jeko pegua, ndembaepuere jare ndeporoparareko, jare oyerure kuae tupao guasu güi yave,

³³ nde eendu ara güi, reikoa güi, jare emee chupe opaete jae oiporu vae, opaete ɨvɨ pegua reta ndekuaa vaerä jare oipoɨu vaerä ndegüi, ndembae vae reta oipoɨu ndegüi rami, jare toikuaa reta oyemboete ko nderé kuae tupao guasu ayapo ndeve vae pe vae.

³⁴ Ndembae vae reta yogüɨraja ñeraroa pe jovaicho reta kotɨ remondoa pe yave, jare oyerure reta omae reve kuae tëta guasu kotɨ jare kuae tupao guasu amopüa ndeve vae kotɨ yave,

³⁵ nde eendu ara güi iyerure nemoñera reve vae, jare emborɨ.

³⁶ Iyoa reta yave ndekotɨ, jare ndearasɨ ikotɨ reta yave, jare nde remee jovaicho reta ipo pe jare jókuae reta güɨraja iɨvɨ güi mombɨrɨ ani köiño yave,

³⁷ jare jókuae ñogüɨnoia güi imaendúa yave ndekotɨ, oyepoepɨ reta jeko güi jare oyerure reta ndeve yave, jei reve: ‘Oreyoa, royapo ikavimbae.’

³⁸ Oyepoepɨ reta jeko güi ndekotɨ opaete ipɨa ndive jare jekove ndive jókuae ɨvɨ ñogüɨnoia güi yave, jare oyerure reta ndeve omae reve kuae ɨvɨ remee iñemuñagüe reta pe vae kotɨ yave, jare tëta guasu nde reiparavo vae kotɨ jare tupao amopüa nderee re vae kotɨ yave,

³⁹ nde eendu ara güi, reikoa güi iyerure nemoñera reve vae, jare emborɨ, neɨ̈ro ndembae vae reta pe iyoa re.

⁴⁰ Añave cheru Tumpa romoñera emae jare eendu yerure reta kuae güi oyeapo ndeve vae.

⁴¹ CheYa Tumpa añave eyu eputuu, nde jare nekäjou ndembaepuere pegua ndive. CheYa, ndesacerdote reta re toyekuaa ndembaepuere yemborɨ pegua, jare jupi yogüɨreko vae reta toyekou mbaembae güɨnoi vae pe.

⁴² CheYa Tumpa, agüɨye eröɨro nderembiparavo, nemaendúa nderembiokuai David reaɨu vae re.”