2 CRÓNICAS 5 - Biblia Guarani Tumpa Iñee

¹ Jare Salomón opa oyapo mbaembae yandeYa itupao guasu peguarä yave, güɨroike mbaembae jepɨ vae oñeñovatúa pe tu David oñono tee mbaembae yandeYa peguarä vae: Korepoti, oro jare opaete tembiporu reta.

Salomón güɨroyakavo Tumpa ikäjou tupao guasu pe

² Jayave Salomón omboatɨ Jerusalén pe opaete Israel iñemuña reta itenondegua reta, jare opaete ñemuña reta itenondegua, metei tëtara vae itenondegua, güɨroyakavo reta vaerä Tumpa ikäjou morogüɨrökuavee päve pegua David jëta güi, jae ko Sión.

³ Jare oyemboatɨ opaete kuimbae Israel iñemuña reta mburuvicha guasu ndive, chiúa yasɨ arete mbaemboete pegua pe.

⁴ Yogüeru opaete Israel iñemuña itenondegua reta, jare levita reta oipɨɨ reta Tumpa ikäjou.

⁵ Jare güɨraja reta tupao guakapi pegua yemboatɨ renda ndive, jare opaete tembiporu pɨpegua; kuaekuae reta opa güɨraja sacerdote reta jare levita reta.

⁶ Jare mburuvicha guasu Salomón, opaete Israel iñemuña reta ndive ñogüɨnoi Tumpa ikäjou jóvai vae, omee vecha reta jare toro reta oyeyukagüe Tumpa pe, jeta yae ramo oyepapa rapeä.

⁷ Jare sacerdote reta güɨroike yandeYa ikäjou morogüɨrökuavee päve pegua tupao guasu japɨpe, oñeñono tee kavi yaea pe, araɨgua iä reta ipepo igüɨ pe,

⁸ echa jókuae araɨgua iä reta omoata güɨnoi ipepo Tumpa ikäjou oïa iárambo, jökorai güɨnoi ipepo reta Tumpa ikäjou jare ivoɨka reta iárambo.

⁹ Jókuae ɨvɨra Tumpa ikäjou ivoɨka reta puku ete, oyekuaaño tupao japɨpe oñeñono tee vae güi, ërei mbaetɨ oyekuaa ikatu güi, jare jökorai opɨta añave regua.

¹⁰ Jókuae Tumpa ikäjou japɨpe pe oï vae jaeño mókoi ita oñeopagüe, Moisés oñono pɨpe Horeb pe ñogüɨnoi yave vae. Jókuae reta rupi yandeYa oyapo morogüɨrökuavee päve Israel iñemuña reta ndive, oë reta Egipto güi yave.

¹¹ Sacerdote reta ñogüɨnoe tupao guasu japɨpe oñeñono tee vae güi. Opaete sacerdote reta oyetɨo Tumpa jóvai, oärombae reve iparavɨkɨ pe oike reta regua.

¹² Levita otairari vae reta Asaf, Hemán, jare Jedutún taɨ reta jare jëtara reta ndive ndive, oyemonde reta temimonde lino pegua pe oyemboɨ ñogüɨnoi kuaraɨ oëa kotɨ mɨmba oyeyuka oyeapɨ jese vae güi platillo, ngitara jare arpa ndive. Kuae reta ndive ñogüɨnoi ciento veinte sacerdote mimbɨguasu imoñeea.

¹³ Omoñee reta mimbɨguasu reta yave, jare otairari reta metei rami omboete vaerä jare omee vaerä yasoropai yandeYa pe yave, jare mimbɨguasu reta iñee ndive omboete reta yandeYa, jei reve: “Echa jae ipɨakavi, iporoparareko jekuae avei.” Jayave amapɨtu tɨnɨe yandeYa itupao guasu.

¹⁴ Jare sacerdote reta mbaetɨ ipuere ñogüɨnoi joko pe oparavɨkɨ vaerä jókuae amapɨtu jeko pegua, echa yandeYa iyemboetea omotɨnɨe tupao guasu.