2 CRÓNICAS 4 - Biblia Guarani Tumpa Iñee

Tupao guasu pegua mbaembae reta

¹ Salomón oyapo vi mɨmba oyeyuka oyeapɨ jese vae jiero iyu vae pegua, chau metro güɨnoi ipukugüe jare ipɨgüe, jare ɨvategüe güɨnoi irundɨ metro y medio.

² Oyapo vi ɨrɨru tuicha vae jiero iyu vae oyemondɨkuigüe pegua, güɨnoi irundɨ metro y medio ipɨgüe, ɨvategüe güɨnoi mókoi metro jare veinticinco centímetro, jare ikúa oyere oñejäa vae güɨnoi trece metro y medio.

³ Jare jókuae ɨrɨru jembeɨ igüɨ rupi güɨnoi andai ia iä mókoi ñesɨro güɨroyere jese, cuarenta y cinco centimetroa pe oñono payandepo, jare kuae reta oyemondɨkui oyeapo ɨrɨru ndive metei ramiño.

⁴ Kuae ɨrɨru oguapɨ oï doce toro iä reta re: Mboapɨ omae ɨvɨtuguasu kotɨ, mboapɨ omae arayevɨ kotɨ, jare mboapɨ omae kuaraɨ oëa kotɨ mboapɨ omae kuaraɨ oikea kotɨ; opareve güɨnoi jumbɨ ɨrɨru igüɨ kotɨ.

⁵ Kuae ɨrɨru yandambusugüe güɨnoi juri centímetro; jembeɨ kopaecha, ani tüpa-ɨpɨ ipotɨ rami; iporusugüe oupitɨ sesenta y seis mil litro pegua.

⁶ Oyapo vi payandepo ɨrɨru, pandepo oñono ɨrɨru tuicha vae iyakatu kotɨ jare pandepo iyasu kotɨ. Pɨpe oyoe vaerä tembiporu reta mɨmba oyeyuka opaetei oyeapɨ vae re oyeporu vae, ërei ɨrɨru tuicha vae jae ko sacerdote reta oyeyoe pɨpe vaerä.

⁷ Oyapo vi payandepo mechero jenda oro pegua, kërai oyeapo vaerä rami, kuae reta oñono tupao guasu pe, pandepo iyakatu kotɨ jare ïru pandepo iyasu kotɨ.

⁸ Jaeramiño vi oyapo payandepo mesa jare oñono tupao guasu pe pandepo iyakatu kotɨ jare pandepo iyasu kotɨ. Oyapo vi cien tasa guasu oro pegua.

⁹ Oyapo vi oka sacerdote reta peguarä, jare oka tuicha vae jöke reta reve, kuae öke reta opa oñova jiero iyu vae pe.

¹⁰ Jare ɨrɨru tuicha vae oñono tupao guasu iyakatu kotɨ kuaraɨ oëa kotɨ, arayevɨ kotɨ äve mí.

¹¹ Hiram oyapo vi yapepo reta, sɨpe reta jare tasa guasu reta. Jökorai Hiram opa oyapo mbaravɨkɨ mburuvicha guasu Salomón pe, Tumpa itupao guasu peguarä.

¹² Oyapo mókoi okɨta guasu jare karena reta okɨta guasu reta iyapɨte omopöra vae, mókoi pɨsa rami oñeope vae, oñova vaerä okɨta iyapɨte omopöra vae yapúa vae.

¹³ Cuatrociento temitɨ granada ia iä oï mókoi pɨsa rami oñeope vae re, oñova vaerä mókoi reve jókuae okɨta iyapɨte omopöra vae yapúa vae.

¹⁴ Oyapo vi ɨrɨru iguapɨka reta, jare jókuae re omboguapɨ ɨrɨru reta,

¹⁵ ɨrɨru tuicha vae jare doce toro iä reta ɨrɨru igüɨ pegua,

¹⁶ jare yapepo reta, sɨpe reta, tɨ̈ai reta. Hiram-abi oyapo opaete tembiporu reta jiero iyu vae ikavi yae vae pegua mburuvicha guasu Salomón pe, yandeYa itupao guasu peguarä.

¹⁷ Mburuvicha guasu omondɨkuiuka oyapo ɨvɨkuitï pegua molde pe Jordán iɨvɨpe kavi pe, Sucot jare Seredata ipäu pe.

¹⁸ Salomón oyapo opaete kuae tembiporu reta jiero iyu vae pegua, jare jeta yae ramo mbaetɨ ipuere oñejäa ipoɨgüe.

¹⁹ Jökorai Salomón oyapo opaete tembiporu reta, Tumpa itupao guasu peguarä, jare ikäti kavi vae incienso oyeapɨ jese vae oro pegua, jare mesa oro pegua mbɨyape reta mbaemboete pegua oñeñono jese vae,

²⁰ jaeramiño vi mechero renda reta, jare mechero oro oyeambae pegua omoendɨ reta vaerä tupao japɨpe oñeñono tee kavi yae vae jóvai, mborookuai oñemee rami,

²¹ jare mbaepotɨ iä reta, mechero raɨ reta jare tenasa reta oyeapo oro oyeambae vae pegua yepeai,

²² mechero imecha oyeasɨa pɨpe vae tenasa reta, tasa guasu reta, kuchara reta, jare tätapɨi rɨru reta oro oyeambae pegua. Jare oro pegua vi yaikea öke japɨpe, tupao guasu japɨpe oñeñono tee kavi yae vae, jare jöke reta.