2 CRÓNICAS 36 - Biblia Guarani Tumpa Iñee

Joacaz oguapɨ tëi mburuvicha guasurä

¹ Jayave tëta pegua reta oipɨɨ Joacaz, Josías taɨ, jare omboguapɨ reta mburuvicha guasurä tu jekovia pe Jerusalén pe.

² Joacaz güɨnoi veintitré año omboɨpɨ oï mburuvicha guasurä yave, jare mboapɨ yasɨ oiko mburuvicha guasurä Jerusalén pe.

³ Jare mburuvicha guasu Egipto pegua güɨnoe Jerusalén güi, jare oñono tëtaguasu ombaemboepɨ vaerä tres mil tresciento kilo korepoti jare treinta y tres kilo oro.

⁴ Javoi mburuvicha guasu Egipto pegua oñono Judá jare Jerusalén pe mburuvicha guasurä Eliaquim, jae ko Joacaz tɨvɨ, oipoepɨ jee Joacim pe, jare Joacaz güɨraja Egipto pe.

Joacim oiko mburuvicha guasurä Judá pe

⁵ Joacim güɨnoi veinticinco año omboɨpɨ oï mburuvicha guasurä yave, jare once año oiko mburuvicha guasurä Jerusalén pe. Ërei oyapo ikavimbae iYa Tumpa jesa róvai.

⁶ Jare Nabucodonosor mburuvicha guasu Babilonia pegua oporepeña jese jare oipokua karena jiero iyu vae pegua pe güɨraja Babilonia pe.

⁷ Nabucodonosor güɨraja mbovɨ tembiporu reta Tumpa jo pegua, jare oñono itupao pe Babilonia pe.

⁸ Ïru mbae Joacim regua jare ikavimbae yae vae oyapo vae regua oyekuatía oï tembikuatía mburuvicha guasu reta Israel pegua jare Judá pegua regua oyekuatía oïa pe. Jare taɨ Joaquín oguapɨ jekovia pe mburuvicha guasurä.

Joaquín oyererajauka iɨvɨ güi Babilonia pe

⁹ Joaquín güɨnoi dieciocho año omboɨpɨ oï mburuvicha guasurä yave, jare oiko mboapɨ yasɨ payandepo ara, mburuvicha guasurä Jerusalén pe. Ërei oyapo ikavimbae yandeYa jesa róvai.

¹⁰ Año oväe ye vae re, mburuvicha guasu Nabucodonosor ombou güɨrajauka Babilonia pe, tembiporu reta jepɨ yae vae yandeYa jo pegua ndive, jare jëtara Sedequías omboguapɨ mburuvicha guasurä Judá jare Jerusalén re.

Sedequías oiko mburuvicha guasurä

¹¹ Sedequías güɨnoi veintiún año omboɨpɨ oï mburuvicha guasurä yave, jare once año oiko mburuvicha guasurä Jerusalén pe.

¹² Ërei oyapo ikavimbae iYa Tumpa jesa róvai. Mbaetɨ oñemomichi Tumpa iñeemombeúa Jeremías jóvai, jae omombeu tëi chupe yandeYa iporookuai vae.

¹³ Oyembopɨapochɨ vi mburuvicha guasu Nabucodonosor kotɨ, jókuae oyapouka tëi chupe Tumpa jee re oï vaerä imborɨarä vae; jare oyembopɨa täta jare oyembopɨarai agüɨye vaerä oyerova ye yandeYa, Israel iTumpa kotɨ.

¹⁴ Jökorai vi opaete sacerdote tenondegua reta, jare tëta pegua reta jeiete yae ikavimbae oyapo, omomoe reta tëtaguasu pegua reta jeko ikavimbae yae vae, jare yandeYa jo jae oñono tee Jerusalén pe vae omongɨa reta.

¹⁵ YandeYa, iñemuñagüe reta iTumpa ombou avei oikuaauka chupe reta mbae re iñeemombeúa reta rupi, echa güɨnoi mboroparareko tëta imbae vae reta re jare jae oikoa re.

¹⁶ Ërei jae reta oyóyai yóyai ñeemombeúa reta, güɨröɨro reta omombeugüe jare opuka reta Tumpa iñeemombeúa reta re, yandeYa iyarasɨ ou regua tëta imbae vae reta re, jare mbaetɨ ma oväe kërai oasayepe reta vaerä.

Tëtaguasu Judá oa tembɨpɨɨrä

¹⁷ Jáeramo yandeYa güeru Caldeaɨgua reta juvicha guasu oporepeña vaerä jese reta, jae oyuka kɨsepuku pe taɨrusugüe reta jare jókuae tupao pe etei, mbaetɨ etei oiparareko kunumi reta jare kuñatai reta, indechi vae reta ani ipuerembae reta ave. Opaetei yandeYa omee reta ipo pe.

¹⁸ Jaeramiño vi tembiporu Tumpa jo pegua, tuicha vae ani michi vae, jare tupao pe mbaembae oñeñovatu vae jare mburuvicha guasu imbae jare iyɨvɨrigua reta imbae, opaetei güɨraja Caldeaɨgua reta juvicha guasu Babilonia pe.

¹⁹ Oapɨ reta vi Tumpa jo, ombosururu reta Jerusalén ikësea, oapɨ reta vi mburuvicha jo jare omboai opaete mbae jepɨ yae vae.

²⁰ Jaɨkue rupi opa güɨraja reta Babilonia kotɨ oasayepe mano güi vae, jare yogüɨreko reta jembiokuairä jare taɨ reta jembiokuairä ou regua Persia mborookuaía guasu,

²¹ oyembopo vaerä Tumpa jeigüe iñeemombeúa Jeremías rupi vae. Jökorai jókuae ɨvɨ oputuu kavi; echa oputuu opaete ara ipombae oiko ramboeve setenta año oupitɨ regua.

Mburuvicha guasu Ciro omee mborookuai vae

²² Jare tenondegua año Ciro omboɨpɨ oï mburuvicha guasurä Persia pe yave, oyembopo vaerä yandeYa iñee Jeremías rupi omombeu vae, yandeYa oñono Ciro mburuvicha guasu Persia pegua ipɨa pe omoërakuauka vaerä mborookuai ñee rupi jare tupapire rupi opaete iporookuaía rupi, kuae mborookuai:

²³ “Ciro mburuvicha guasu Persia pegua jei körai: ‘YandeYa Tumpa ara pegua, omee chepo pe opaete mborookuaía reta ɨvɨ pegua, jare cheokuai amopüa vaerä chupe tupao Jerusalén pe, jae ko ɨvɨ Judá pe. Jayave oipotagüe pegüi reta jókuae ɨvɨ pegua, yandeYa imbae ko vae, yandeYa Tumpa tapemborɨ, pekua jokotɨ.’ ”