2 CRÓNICAS 31 - Biblia Guarani Tumpa Iñee

¹ Opa kuae mbaembae oyeapo yave, opaete Israel iñemuña reta ñogüɨnoi joko pe vae ñogüɨnoe tëta guasu reta Judá pegua rupi jare oyoka reta mbae iä reta ita pegua, jare oyasɨa Asera iä reta jare omboai reta o mbaemboete renda ɨvɨtɨ rupigua reta, jare mɨmba oyeyuka oyeapɨ jese vae reta opaetei omboai reta regua ɨvɨ Judá pe jare ɨvɨ Benjamín pe, jökorai vi ɨvɨ Efraín pe jare Manasés pe. Javoi opaete Israel iñemuña reta oyerova ye jëta guasu reta rupi, metei ñavo iɨvɨ ae ae rupi.

Ezequías oñono kavi sacerdote reta jare levita reta iparavɨkɨa rupi

² Jare Ezequías oñono kavi sacerdote reta jare levita reta metei ñavo iparavɨkɨ ae rupi, omee reta vaerä mɨmba oyeyukagüe opaetei oyeapɨ vae jare mɨmba oyeyukagüe yembopɨakatu pegua, omee reta vaerä yasoropai jare omboete reta vaerä yandeYa, jökorai oyeokuai reta vaerä tupao ikësea jöke japɨpe tupao joka pe.

³ Mburuvicha guasu omee jɨmba reta güi mɨmba oyeyukagüe opaetei oyeapɨ vaerä, oñemee vaerä ndeimbove yave jare kaaru yave, jare mɨmba oyeyukagüe opaetei oyeapɨ vaerä ara mbutuu pegua pe, yasɨ pɨau pe jare arete reta mbaemboete pegua yandeYa pe oyeapo yave vae peguarä, yandeYa iporookuai pe oyekuatía oï rami.

⁴ Oyókuai vi Jerusalén pe yogüɨreko vae reta omee vaerä sacerdote reta pe jare levita reta imbaerä vae, oyeokuai reta vaerä opaete ara rupi yandeYa iporookuai jei rami.

⁵ Jare kuae mborookuai oñemoërakua yave, Israel iñemuña reta omee jeta imbaagüɨyerɨpɨ güi, vino, olivo iasaite, ei jare opaete jemitɨ reta iagüe. Güeru reta vi jeta rupi opaete iparavɨkɨ reta güi ombosɨrɨ reta payandepo ñavo güi metei vae.

⁶ Jökoraiño vi Israel pegua reta jare Judá pegua reta, tëta guasu reta Judá pegua rupi yogüɨreko vae reta omee iguaka reta güi jare ivecha reta güi payandepo ñavo vae güi metei jare güeru reta mbaembae oñono tee reta yandeYa peguarä vae güi payandepo ñavo vae güi metei. Jeta omboatɨ reta.

⁷ Mboapɨa yasɨ re omboɨpɨ reta oñono kavi jókuae oyemboatɨgüe, jare opa oñono kavi reta chiúa yasɨ re.

⁸ Ezequías jare mburuvicha reta yogüɨraja omae jókuae oyemboatɨgüe re yave, omee reta yasoropai yandeYa pe jare opaete Israel pegua reta pe.

⁹ Jayave Ezequías oparandu sacerdote reta pe jare levita reta pe jókuae oyemboatɨgüe vae regua,

¹⁰ jare sacerdote tenondegua Azarías, Sadoc iñemuña pegua jei chupe: “Jókuae ara kuae mbota reta oyemboɨpɨ oyemboatɨ yandeYa jo pe güire, oime jeta rokaru jare jeta jembɨre oreve, echa yandeYa iporerekua imbae vae reta re.”

¹¹ Jókuae jeko pegua Ezequías oyapouka o mbae oñeñovatúa yandeYa jo pe. Jare opa ma oyapo reta yave,

¹² oñono reta pɨpe mbaagüɨyerɨpɨ reta, jare payandepo ñavo vae güi metei oñemee vae reta jare mbaembae oñeñono tee yandeYa peguarä vae metei rami kavi. Jare oñono reta joko pe tenondeguarä, oyangareko vaerä opaete jókuae re levita Conanías jare jëtara Simei jae imborɨarä.

¹³ Conanías jare jëtara Simei imborɨarä ñogüɨnoi vae oiparavo mburuvicha guasu Ezequías jare Azarías Tumpa jo iyangarekoa reta itenondegua, jae ko: Jehiel, Azazías, Nahat, Asael, Jerimot, Jozabad, Eliel, Ismaquías, Mahat jare Benaía.

¹⁴ Jare levita Coré, Imna taɨ, öke kuaraɨ oëa kotɨgua iyangarekoa, oyangareko mbota reta pɨa-kɨ̈reɨ ngatu reve oñemee Tumpa peguarä vae re, jare omboyao vaerä mbota reta oñeñono tee yandeYa pe vae jare mbaembae oñeñono tee kavi yae Tumpa peguarä vae.

¹⁵ Jare Coré imborɨarä ñogüɨnoi Edén, Miniamín, Jesúa, Semaías, Amarías jare Secanías, sacerdote reta jëta guasu reta rupi, omboyao vaerä jupi rupi kavi jëtara reta pe mbaembae oyemboyao yao oï rupi, jökorai okuakuaa vae güive michia reta pe.

¹⁶ Kuimbae reta iñemuña ae rupi oyekuatía ñogüɨnoi rupi, mboapɨ año ma vae güive ɨvate kotɨ, opaete yandeYa jo pe oike oyapo vaerä iparavɨkɨ vae, iparavɨkɨ ñavo rupi, oyemboyao yao ñogüɨnoi ñavo rupi.

¹⁷ Jökoraiño vi sacerdote reta oyepapa iñemuña ñavo rupi vae; jare levita reta veinte año güi ɨvate, iparavɨkɨ ñavo rupi jare oyemboyao yao ñogüɨnoi rupi.

¹⁸ Oñemoapɨta ñogüɨnoi opaete imichia reta ndive, jembireko reta ndive, tayɨ reta jare taɨ reta ndive, opaete vae; echa jae reta ipɨa jupi kavi reve oñeñono tee reta Tumpa iparavɨkɨ pe.

¹⁹ Jökoraiño vi Aarón iñemuña sacerdote reta peguarä, jëta guasu reta güi mɨmba ikarúa rupi yogüɨreko vae reta, opaete tëta guasu reta rupi, kuimbae reta oyeparavo ñogüɨnoi omboyao vaerä tembíu opaete sacerdote reta pe jare opaete levita reta pe, oñemoapɨta ñogüɨnoi vae pe.

²⁰ Körai oyapo Ezequías opaete Judá pe. Oyapo jaekavi vae, jupi vae jare añete vae iYa Tumpa jóvai.

²¹ Opaete mbaembae oyapo Tumpa jo pe vae, mborookuai jei rami, oeka iTumpa jemimbota, oyapo opaete ipɨa ndive jare oë kavi chupe.