2 CRÓNICAS 28 - Biblia Guarani Tumpa Iñee

Acaz oiko mburuvicha guasurä Judá pe

¹ Acaz güɨnoi veinte año omboɨpɨ oï mburuvicha guasurä yave jare oiko mburuvicha guasurä diecisei año Jerusalén pe; ërei mbaetɨ oyapo jupi vae yandeYa jesa róvai, iñemuñagüe David rami,

² echa omomoe mburuvicha guasu reta Israel pegua oyapo vae, oyapo Baal reta iä oyemondɨkui oyeapo vae,

³ oapɨ vi ikäti kavi vae incienso ɨvɨtɨ päu ipe kavi vae Hinom pe, jare omee taɨ reta oapɨuka vaerä, ïru tëtaguasu reta ikavimbae yae vae oyapoñoi rami, jókuae yandeYa opa güɨnoe omombo Israel iñemuña reta jenonde güi vae.

⁴ Jaeramiño vi omee mɨmba oyeyukagüe jare oapɨ ikäti kavi vae incienso mbaemboete renda ɨvɨtɨ rupigua reta rupi, jare opaete ɨvɨra iküaraɨa kavi yae vae igüɨ rupi.

⁵ Jáeramo iYa Tumpa omee Siriaɨgua reta juvicha guasu ipo pe, jare kuae reta omoamɨri jare oipɨɨ reta jeta tembipɨɨrä güɨraja Damasco kotɨ. YandeYa omee vi mburuvicha guasu Israel pegua ipo pe, körai ñamɨriasɨ yae opɨta.

⁶ Peka, Remalías taɨ oyuka Judá pe metei ara pe ciento veinte mil kuimbae jëia vae, echa oeya reta ramo yandeYa iñemuñagüe reta Tumpa.

⁷ Jare Zicri, Efraín pegua kuimbae imbaepuere yae vae, oyuka Maasías, mburuvicha guasu taɨ, jare Azricam mburuvicha guasu jembiokuai reta itenondegua, jare mburuvicha Elcana mburuvicha guasu iyɨvɨrigua tenondegua ete.

⁸ Sundaro reta Israel pegua oipɨɨ dosciento mil tembipɨɨrä jëtara Judá pegua reta, kuña reta, kunumi reta jare kuñatai reta reve, jare opɨ̈ro reta jeta mbaembae jare güɨraja reta Samaria pe.

⁹ Jayave rupi oiko joko pe yandeYa iñeemombeúa Obed jee vae, jae oë sundaro reta japerä pe, oike retata ma Samaria pe yave, jei chupe reta: —YandeYa, peñemuñagüe reta iTumpa iyarasɨ Judá pegua reta kotɨ, jókuae jeko pegua omee pepo pe. Ërei pe reta peyukaasɨ katu pearasɨ yae reve.

¹⁰ Jaeramiño vi Judá pegua reta jare Jerusalén pegua reta opa peñono yogüɨreko vaerä perembiokuairä. Jayave ¿pe reta mbaetɨ pa ko peyoa yandeYa Tumpa kotɨ?

¹¹ Jáeramo peyapo kuae jae peve vae, pemboyerova ye tembipɨɨrä peipɨɨ peru perëtara reta vae; echa yandeYa iyarasɨ oï pekotɨ.

¹² Jayave Azarías, Johanán taɨ; Berequías, Mesilemot taɨ; Ezequías, Salum taɨ jare Amasa, Adlai taɨ jae ko Efraín iñemuña reta itenondegua reta, oñemopüa reta ñeraroa güi yogüeru ye vae reta kotɨ,

¹³ jare jei chupe reta: —Agüɨye peru kuae pe jókuae tembipɨɨ reta, echa jókuae rupi yandeyoata ko yandeYa kotɨ. Pe reta peipota pemoïru eteño yandeyoa jare yandereko, yandeYa iyarasɨ yaeta ko Israel kotɨ.

¹⁴ Jayave sundaro reta oyora jókuae tembipɨɨ reta, jare oeya mbaembae opɨ̈rogüe mburuvicha reta jóvai jare jeta vae jóvai.

¹⁵ Jayave jókuae tenondegua reta oipɨɨ tembipɨɨ reta jare jókuae temimonde oñepɨ̈rogüe reta pe omboemimonde inandi vae; omee reta ipɨɨrurä, javoi omee reta okaru jare omboɨu reta jare oipoano chugüi reta iperegüe, jare opaete ipuerembae ombopo güɨraja reta mburika re Jericó kotɨ, jae ko tëta guasu karandaɨtɨ pegua, jëtara reta pɨri. Javoi opa ye oyerova Samaria kotɨ.

¹⁶ Jókuae ara rupi mburuvicha guasu Acaz omondo oiporu yemborɨ mburuvicha guasu Asiria pegua pe,

¹⁷ echa Edom iñemuña reta oporepeña vi Judá pegua reta re, jare omoamɨri, jare güɨraja reta tembipɨɨrä joko güi.

¹⁸ Jaeramiño vi filisteo reta opa oñemoai tëta guasu reta ɨvɨpe kavi rupigua rupi jare Neguev ɨvɨ Judá pegua rupi, jare opɨ̈ro reta tëta Bet-semes, Ajalón, Gederot, Soco, Timna jare Gimzo; opaete kuae reta tëta ñavo tëta raɨ raɨ ndive, jare oñemoëta reta jokoropi.

¹⁹ Echa yandeYa omomichi Judá pegua reta, Acaz mburuvicha guasu Israel pegua jeko pegua, echa jae oiko oyeandumbae reve Judá pe, jare mbaetɨ etei jupi oiko yandeYa kotɨ.

²⁰ Ou vi Acaz kotɨ Tiglat-pileser, Asiriaɨgua reta juvicha guasu, omborɨ vaerägüe, ou omoambeko.

²¹ Echa yepe tëi Acaz güɨnoe mbaembae jepɨ vae yandeYa jo pegua, mburuvicha guasu jo pegua jare mburuvicha reta jo pegua omboepɨ vaerä mburuvicha guasu Asiria pegua pe, ërei jeseve jae mbaetɨ omborɨ.

²² Yepe tëi yemoambeko pe güɨnoi vae, jae jeieteño iyoa yandeYa kotɨ,

²³ echa omee mɨmba oyeyukagüe Damasco pegua reta itumpa reta pe, omoamɨriuka vae reta pe. Echa oyemongeta Siria pegua mburuvicha guasu itumpa reta omborɨ ko vae, jáeramo jae oyemongeta omborɨta vi ko jae omee chupe yave mɨmba oyeyukagüe. Ërei kuae oyapo jeko pegua ko jae ou iñamɨri jare opaete Israel iñemuña reta.

²⁴ Acaz omboatɨ tembiporu reta Tumpa jo pegua jare opa oyoka, javoi oyokenda yandeYa jo jöke jare oyapouka iyeupe mɨmba oyeyuka oyeapɨ jese vae opaete Jerusalén rupi.

²⁵ Oyapo vi mbaemboete renda ɨvɨtɨ reta rupi opaete tëta guasu reta Judá pegua rupi, oapɨ vaerä ikäti kavi vae incienso tumpa ambuae reta pe, jökorai omboarasɨuka yandeYa iñemuñagüe reta iTumpa.

²⁶ Ïru mbaembae Acaz oyapogüe reta jare kërai oiko tenonde rupi jare taɨkue rupi vae, oyekuatía oï tembikuatía Judá pegua jare Israel pegua mburuvicha guasu reta regua oyekuatía oïa pe.

²⁷ Omano yave oñotɨ reta iñemuñagüe reta oñeotɨa pe, tëta guasu Jerusalén pe, ërei mbaetɨ oñono reta mburuvicha guasu reta Israel pegua jɨvɨa pe. Jare taɨ Ezequías oguapɨ jekovia pe mburuvicha guasurä.